မြန်မာနိုင်ငံ၏ လက်ရှိ အခြေအနေ များနှင့် ပတ်သက်၍ မစ္စတာ ကင်တာနာက ပွင့်လင်းစွာ ဝေဖန် ပြောကြားခဲ့ သောကြောင့် စာပေ စိစစ်ရေးက သတင်း ဂျာနယ်များတွင် ထည့်သွင်းခွင့် မပြုခြင်း ဖြစ်ကြောင်း သိရသည်။စစ်အစိုးရ အနေနှင့် နိုင်ငံရေး အကျဉ်းသားများ အားလုံးကို လွှတ်ပေးမည့် အရိပ်အရောင် မတွေ့ရသေး သောကြောင့် ၂၀၁၀ ပြည့်နှစ် ရွေးကောက်ပွဲသည် တရားမျှတ၊ လွတ်လပ်မည့် အနေအထား မမြင်ကြောင်း၊ စစ်အစိုးရတွင် လူ့အခွင့် အရေးကို လေးစားမည့် သဘောလည်း မရှိကြောင်း၊ မြန်မာနိုင်ငံ၏ လူ့အခွင့် အရေး အခြေ အနေများ ဆိုးရွား နေဆဲ ဖြစ်ပြီး ရခိုင် ပြည်နယ်တွင် ရိုဟင်ဂျာ များအပေါ် ခွဲခြား ဆက်ဆံမှုများ ရှိနေကြောင်း မြန်မာနိုင်ငံသို့ ၅ ရက်တာ လာရောက် လည်ပတ်ပြီး ပြန်လည် မထွက်ခွာမီ ဖေဖော်ဝါရီလ ၁၉ ရက်နေ့က သတင်းထောက်များကို မစ္စတာ ကင်တာနာက ပြောခဲ့သည်။
“ဘာအကြောင်းပြချက်မှ မပေးဘဲ ဒေါ်အောင်ဆန်းစုကြည်နဲ့ တွေ့ခွင့် မပြုခဲ့တဲ့အတွက် ကျနော် အရမ်း စိတ်မကောင်း ဖြစ်မိပါတယ်” ဟု သူက ဆိုခဲ့သည်။
မစ္စတာ ကင်တာနာ၏ ရန်ကုန်လေဆိပ် သတင်းစာရှင်းလင်းပွဲသို့ မြန်မာနိုင်ငံ စာပေစိစစ်ရေးနှင့် မှတ်ပုံတင်ဌာန ညွှန်ကြားရေးမှူး
ဗိုလ်မှူးတင့်ဆွေ ကိုယ်တိုင် တက်ရောက်ခဲ့သည်ဟုလည်း သိရသည်။
“ဗိုလ်မှူးတင့်ဆွေကိုယ်တိုင် သတင်းစာရှင်းလင်းပွဲမှာ ရှိတယ်။ ကင်တာနာ ဘာပြောတယ်ဆိုတာလည်း သူသိတယ်” ဟု သတင်းဂျာနယ် အယ်ဒီတာတဦးက ပြောသည်။
ပြည်တွင်း သတင်းဂျာနယ်များတွင် ကုလသမဂ္ဂ လူ့အခွင့်အရေး စုံစမ်းစစ်ဆေးရေးမှူး မြန်မာနိုင်ငံသို့ လာရောက်ပြီး နိုင်ငံရေး သမားများ၊ ရှေ့နေများနှင့် တွေ့ခွင့်ရသည်ဆိုသောသတင်းများနှင့် အကျဉ်းထောင်များသို့ သွားရောက်ကြည့်ရှုခဲ့သည် ဆိုသော သတင်းများကိုသာ ဖော်ပြခွင့်ရကြသည်။
မစ္စတာ ကင်တာနာ၏ ပြောကြားချက်ကို ရေးသားခွင့် ပိတ်ပင်သော စစ်အစိုးရ၏ လုပ်ရပ်သည် လွတ်လပ်စွာ ထုတ်ဖော် ပြောကြားခွင့် ဟူသော အခြေခံလူ့အခွင့်အရေးကို ချိုးဖောက်ခြင်းဖြစ်သည်ဟု ရန်ကုန်အခြေစိုက် သတင်းထောက်များက သုံးသပ်သည်။
မစ္စတာ ကင်တာနာ၏ မြန်မာနိုင်ငံအပေါ် မှတ်ချက်ပေးမှုများကို ပြည်ပသတင်းဌာနများ၊ အသံလွှင့်ဌာန များတွင် ကျယ်ကျယ် ပြန့်ပြန့် ထုတ်လွှင့်နေသည့်အတွက် ပြည်တွင်း သတင်းဂျာနယ်များတွင် ဖော်ပြခြင်း မရှိသော်လည်း ပြည်သူအများအပြား သိရှိနေကြပြီ ဖြစ်သည်။
“စစ်အစိုးရရဲ့ လိမ်လည် လှည့်ဖြားမှုတွေအောက်မှာေ၀၀ါးနေတဲ့သူတွေကို လူ့အခွင့်အရေး စုံစမ်းစစ်ဆေးရေးမှူးရဲ့ စကားက လှုပ်နှိုးလိုက်တာပါပဲ။ သူ ပြောသွားတွေက မြန်မာပြည်မှာ လက်ရှိဖြစ်နေတဲ့ အခြေအနေနဲ့ တထပ်တည်းကျတယ်” ဟု
ရန်ကုန်မြို့နေ အထက်တန်းရှေ့နေ တဦးက ဆိုသည်။
မစ္စတာ ကင်တာနာသည် မြန်မာနိုင်ငံသို့ ၂၀၀၇ ခုနှစ် နိုဝင်ဘာလတွင် ပထမအကြိမ်၊ ၂၀၀၈ ခုနှစ် သြဂုတ်လတွင် ဒုတိယအကြိမ် လာရောက်ခဲ့ပြီး ယခုခရီးစဉ်သည် တတိယမြောက် ခရီးစဉ်ဖြစ်သည်။
| < Prev | Next > |
|---|
