ယနေ့ထုတ် အစိုးရ သတင်းစာများတွင်“မှတ်ပုံတင်ခွင့် ရရှိပြီးသော နိုင်ငံရေး ပါတီများက သတ်မှတ်ထားသည့် ပါတီဝင် အင်အား စာရင်းကို ကော်မရှင်သို့ တင်ပြရန် အသိပေးကြေညာခြင်း”ဟူသော ခေါင်းစဉ်ဖြင့် ရွေးကောက်ပွဲကော်မရှင်က သတိပေး ကြေညာ ချက် ထုတ်ပြန်ထားခြင်းဖြစ်သည်။
ဝန်ခံချက်နှင့် အညီ သတ်မှတ်ချက်အတိုင်း ပါတီဝင်ဦးရေကို စည်းရုံးရရှိပြီးဖြစ်ကြောင်း ကော်မရှင်သို့ တင်ပြ ဆောင်ရွက်ခြင်း မပြုနိုင်လျှင် ယင်းပါတီအား နိုင်ငံရေး ပါတီအဖြစ် မှတ်ပုံတင်ထားခြင်းကို ပယ်ဖျက်၍ ပါတီကို လည်း ဖျက်သိမ်းရမည်ဟု နိုင်ငံရေး ပါတီများ မှတ်ပုံတင်ခြင်း ဥပဒေ ပုဒ်မ ၁၂ ၌ ပြဌာန်းထားကြောင်း လည်း ရွေးကောက်ပွဲ ကော်မရှင်၏ ကြေညာချက်တွင် ဖော်ပြ ထားသည်။
နိုင်ငံရေး ပါတီ များကမူ ပါတီဝင် အင်အားစာရင်းကို သတ်မှတ်ချိန်အတွင်း ရွေးကောက်ပွဲ ကော်မရှင်သို့ တင်ပြနိုင်ကြမည် ဖြစ်ကြောင်း ပြောဆိုကြသည်။
ပြည်ထောင်စု ဒီမိုကရေစီ ပါတီ ဥက္ကဌ ကိုဖြိုးမင်းသိန်းက“သတ်မှတ်ရက်အတွင်း ပါတီဝင်အင်အား ၁၀၀၀ ရဖို့ဆိုတာ ကျနော်တို့ ပါတီတွေအတွက် အခက်အခဲမရှိပါဘူး။ အနည်းဆုံးအားဖြင့် ဒီအင်အားလောက်ကို စုစည်းနိုင်တဲ့အတွက်လည်း ပါတီထောင်ခဲ့ တာပါ။ တခြားသောပါတီတွေအတွက်လည်း အခက်အခဲရှိမယ် မထင်ဘူး"ဟု ပြောသည်။
ပြည်ထောင်စု ဒီမိုကရေစီ ပါတီ သည် ယမန်နေ့က ပါတီ မှတ်ပုံတင်ခွင့် ရရှိခဲ့ပြီးဖြစ်သည်။
နိုင်ငံရေးပါတီများ မှတ်ပုံတင်ရာတွင် မှတ်ပုံတင် ဥပဒေ ပုဒ်မ ၅(စ)အရ"ပြည်ထောင်စု တ၀န်းလုံးတွင် စည်းရုံးမည့်ပါတီဖြစ်ပါက နိုင်ငံရေးပါတီအဖြစ် မှတ်ပုံတင်ခွင့်ပြုသည့်နေ့မှစ၍ ရက်ပေါင်း ၉၀ အတွင်း ပါတီဝင်ဦးရေ အနည်းဆုံး ၁၀၀၀ ကိုစည်းရုံးမည် ဖြစ်ကြောင်း ၀န်ခံချက်၊ (သို့မဟုတ်) တိုင်းဒေသကြီး ၊ ပြည်နယ်တခုအတွင်း၌သာ စည်းရုံးမည့်ပါတီဖြစ်ပါက နိုင်ငံရေးပါတီ မှတ်ပုံတင်ခွင့်ပြုသည့်နေ့မှစ၍ ရက်ပေါင်း ၉၀ အတွင်း ပါတီဝင်ဦးရေ အနည်းဆုံး ၅၀၀ ကို စည်းရုံးမည်ဖြစ်ကြောင်း ၀န်ခံချက် များနှင့် လျှောက်ထားခဲ့ကြရခြင်းဖြစ်သည်။
နိုင်ငံရေးပါတီများ မှတ်ပုံတင်ခြင်း ဥပဒေကို စစ်အစိုးရက မတ်လ ၈ ရက်နေ့က ထုတ်ပြန်ခဲ့ခြင်း ဖြစ်သည်။
မေလ၂၁ ရက်က ပါတီ မှတ်ပုံတင်ခွင့်ရရှိထားသော ဒီမိုကရက်တစ်ပါတီ(မြန်မာ) အတွင်းရေးမှူး ဒေါ်သန်းသန်းနု ကလည်း သတ်မှတ်ရက်အတွင်း အနည်းဆုံးပါတီဝင် ၁၀၀၀ တင်ပြနိုင်ရန်စုစည်းထားပြီး ဖြစ်ကြောင်း ပြောဆိုသည်။
ယင်း ဒီမိုကရက်တစ် ပါတီ(မြန်မာ)ကို ၀ါရင့် နိုင်ငံရေးသမားကြီး ဦးသုဝေက ပြီးခဲ့သည့်နှစ် စက်တင်ဘာလ အတွင်း၌ ယခင် ပါလီမန် ဒီမိုကရေစီခေတ် ၀န်ကြီးချုပ်များ ဖြစ်ခဲ့သည့် ဦးနု ၊ ဦးဗဆွေ၊ ဦးကျော်ငြိမ်းတို့၏ သားသမီးများဖြစ်သော ဒေါ်သန်းသန်းနု၊ ဒေါ်ချိုချိုကျော်ငြိမ်း နှင့် ဒေါ်နေရီဗဆွေ တို့ ဖြင့် ဖွဲ့စည်းခဲ့ပြီး ဥက္ကဋ္ဌ အဖြစ်တာဝန်ယူ ဆောင်ရွက်သည်။
ပြည်ထောင်စု မြန်မာနိုင်ငံ အမျိုးသားနိုင်ငံရေး အဖွဲ့ချုပ် ဥက္ကဌ ကိုအေးလွင်ကလည်း ၄င်းတို့ပါတီအနေဖြင့် ရွေးကောက်ပွဲ ကော်မရှင်က သတ်မှတ်သော အနည်းဆုံး ပါတီဝင် အင်အားကို ရရှိထားပြီးဖြစ်ရာ ယင်း သတ်မှတ်ချက်သည် အခက်အခဲမရှိ ဖြစ်ကြောင်းပြောပြသည်။
ပြည်ထောင်စု မြန်မာနိုင်ငံ အမျိုးသားနိုင်ငံရေးအဖွဲ့ချုပ်သည် မေလ ၂၆ ရက်တွင် ပါတီ မှတ်ပုံတင်ခွင့် ရထားသည်။
ယနေ့အချိန်ထိ တည်ထောင်ခွင့်တောင်းသည့် ပါတီ ၄၂ ပါတီရှိပြီး မှတ်ပုံတင်ခွင့်လျှောက်ထားသည့် ပါတီ ၃၁ ပါတီ ရှိနေကြောင်း သိရသည်။ ပါတီ ၂၂ ခုကို မှတ်ပုံတင်ခွင့်ပြုထားပြီးဖြစ်ကြောင်း ရွေးကောက်ပွဲ ကော်မရှင် က ကြေညာထားသည်။
အဓိက ပါတီကြီးတခုဖြစ်သော ၁၉၉၀ ရွေးကောက်ပွဲအနိုင်ရ အမျိုးသားဒီမိုကရေစီအဖွဲ့ချုပ် (NLD) သည် စစ်အစိုးရရေးဆွဲ ထားသော ၂၀၀၈ ဖွဲ့စည်းပုံ အခြေခံဥပဒေနှင့် ရွေးကောက်ပွဲဥပဒေများကို လက်ခံနိုင်ခြင်း မရှိဟုဆိုကာ ပါတီထပ်မံ မှတ်ပုံတင် ခြင်းမပြုရန် ဆုံးဖြတ်ခဲ့ပြီးဖြစ်သည်။
စစ်အစိုးရက ရွေးကောက်ပွဲဆိုင်ရာ ဥပဒေများကို ထုတ်ပြန်ခဲ့သော်လည်း ရွေးကောက်ပွဲ ကျင်းပမည့်နေ့ရက် ကိုမူ ထုတ်ပြန် ကြေညာခြင်း မရှိသေးပေ။
| < Prev | Next > |
|---|
