ယင်းစစ်ပြေး ဒုက္ခသည်များတွင် ကူးစက်ရောဂါပိုးများ ပါရှိနိုင်သည်ဟူသော ထိုင်းဒေသခံ ရွာသားများ၏ အကြောင်းပြချက် ဖြင့် ထိုင်း အာဏာပိုင်များက မြန်မာဘက်သို့ ဒီဇင်ဘာလ ၂၅ ရက်နေ့က ပြန်ပို့ခဲ့ခြင်း ဖြစ်သည်။
အမျိုးသမီး ၅၀ ကျော်နှင့် ကလေး ၇၀ ကျော် ပါဝင်နေသည့် အဆိုပါဒုက္ခသည်များမှာ စစ်ဖြစ်နေဆဲ ဝေါ်လေဒေသသို့ ပြန်ရန် အသင့်မဖြစ်သေးဟု သိရကြောင်း ယမန်နေ့က UNHCR ၏ ထုတ်ပြန် ကြေညာချက်တွင် ဖော်ပြထားသည်။
တိုက်ပွဲကြောင့် ထွက်ပြေးတိမ်း ရှောင်လာသည့် ဒုက္ခသည်များကို ထိုင်းနိုင်ငံ အနေဖြင့် နိုင်ငံတကာ စည်းမျဉ်း စည်းကမ်းများ အရ အကာအကွယ်ပေးသင့်ကြောင်းလည်း UNHCRက ဆိုသည်။
ထိုင်း အာဏာပိုင်များက ဒုက္ခသည်များကို ပြန်ပို့သော်လည်း ဒုက္ခသည်အများစုက နီးစပ်ရာ အသိမိတ်ဆွေများထံသို့ တိမ်း ရှောင်နေကြရသည်။ သို့သော် တိုးတက်သော ဗုဒ္ဓဘာသာ ကရင် အမျိုးသား တပ်မတော် (DKBA)နှင့် နအဖတပ်များ တိုက်ပွဲ များ ဆက်လက် ဖြစ်ပွားနေကြောင်း ဒုက္ခသည်များကို ကူညီဆောင်ရွက် နေသူများက ပြောသည်။
“ထိုင်းနိုင်ငံမှာ ခိုလုံခွင့်ဟာ လုံးဝ အတည်တကျ မရှိတော့ဘူး၊ တချိန်လုံးပဲ ဟိုရွှေ့ဒီရွှေ့လုပ်နေရတယ်၊ ရွာထဲမှာ တကယ် မပြန်ရဲဘူး၊ စစ်တပ်ကို ကြောက်တယ်၊ ပေါ်တာဆွဲမှာ ကြောက်တယ်၊ တိုက်ပွဲဖြစ်ရင် ပြေးလို့ မရဘူး အချောင်သေမယ်၊ အဲဒါ ရွာသားတွေက ပြောပြကြတယ်”ဟု ယမန်နေ့က ဒုက္ခသည်များကို တွေ့ဆုံစကားပြောခွင့်ရခဲ့သည့် ကရင် အမျိုးသမီး အစည်း အရုံး(KWO) ပြောရေး ဆိုခွင့်ရှိသူ နော်ဘလူးမင်း နိုက်ဇန်က ဧရာဝတီသို့ ပြောသည်။
ထွက်ပြေးတိမ်းရှောင်လာသော စစ်ပြေး ဒုက္ခသည်များထဲတွင် ကိုယ်ဝန်ဆောင် အမျိုးသမီး ၂၄ ဦးပါဝင်သည်ဟု ကြားသိရ
ကြောင်း ၎င်းက ဆိုသည်။
စစ်ပြေးဒုက္ခသည်များသည် ကရင်ပြည်နယ် ကော့ကရိတ်မြို့နယ် ရှိ ဝေါ်လေဒေသ၌ DKBA နှင့် နအဖ တပ်များ အကြား နိုဝင် ဘာ လဆန်းပိုင်းမှ စတင်ဖြစ်ပွားနေသည့် ရက်ရှည် တိုက်ပွဲများ ကြောင့် ထွက်ပြေးလာသူများ ဖြစ်သည်။
ဒုက္ခသည်များကို မဲဆောက်မြို့ရှိ မယ်တော်ဆေးခန်း(MTC) အဖွဲ့၊ ကရင် လူ့အခွင့်အရေးလှုပ်ရှား နေသော အဖွဲ့များ အပါအ၀င် ထိုင်း - မြန်မာ နယ်စပ်တလျှောက် ကူညီစောင့် ရှောက်ရေး ညွန့်ပေါင်း အဖွဲ့(TBBC)တို့က ကူညီပေးထားသည်။
လူ့အခွင့်အရေး လေ့လာစောင့်ကြည့်ရေးအဖွဲ့(HRW)ကလည်း ယင်း စစ်ပြေး ဒုက္ခသည်များသည် ထွက်ပြေး တိမ်းရှောင်လာ လိုက်၊ ပြန်လည် အပို့ခံရလိုက်နှင့် ပင်ပေါင် ဘောလုံးကဲ့သို့ ကြုံတွေ့နေကြရကြောင်း ဝေဖန်ပြောဆိုထားသည်။
ထို့အပြင် နယ်စပ်ဒေသများတွင် ဖြစ်ပွားနေသော တိုက်ပွဲများကြောင့် ထိုင်းနိုင်ငံသို့ ထွက်ပြေးရောက်ရှိလာသော ဒုက္ခသည်များ ကို အချိန်မတန်သေးဘဲ ပြန်မပို့ရန်လည်း HRW က ထိုင်း အာဏာပိုင်များအား ဒီဇင်ဘာ ၄ ရက်နေ့က တောင်းဆိုထားသည်။
ရွေးကောက်ပွဲ ကျင်းပနေစဉ် နိုဝင်ဘာလ ၇ ရက် နှင့် ၈ ရက်နေ့က မြ၀တီမြို့နယ် အပါအ၀င် ဘုရားသုံးဆူမြို့နှင့်ကြာအင်းဆိပ် ကြီးမြို့နယ်များတွင် စစ်အစိုးရတပ်နှင့် DKBA တပ်မဟာ ၅ တို့ တိုက်ပွဲများ စတင်ဖြစ်ပွားခဲ့ပြီးနောက် နေ့စဉ် နီးပါး တိုက်ပွဲများ ဆက်တိုက် ဖြစ်ပွားလျက်ရှိသည်။
| < Prev | Next > |
|---|
