အသက် ၃၅ နှစ်အရွယ် မညွန့်ညွန့် ဆိုသော မီလာကာဆင်ထရယ်ရှိ စားသောက်ဆိုင်ပိုင်ရှင်နှင့် ၎င်း၏ အလုပ်သမားဖြစ်သူ အသက် ၃၁ နှစ်ရှိ မသော်သော်ညို ဟု ဆိုသည့် အမျိုးသမီး၂ ဦး အသတ်ခံရခြင်းဖြစ်ကြောင်း မလေးရှားစတား သတင်းစာတွင် ဖော် ပြထားသည်။
ပြည်နယ် မှုခင်းရေးရာ စုံစမ်းစစ်ဆေးရေး လက်ထောက်ညွှန်ကြားရေးမှူး ရာဂျာအဒူလတ်(Raja Abdullah)က မိမိတို့ ရဲတပ်ဖွဲ့မှ မှုခင်းဖြစ်သည့်နေရာအား စစ်ဆေးရာ လက်နက်အဖြစ် အသုံးပြုခဲ့သော ဓားတလက်နှင့် တူတချောင်းတွေ့ ရှိသည်ဟု ပြောသည်။
မညွန့်ညွန့်၏ ရုပ်အလောင်းကို နေအိမ်၏ ဧည့်ခန်းတွင် တွေ့ရခြင်းဖြစ်ပြီး အလုပ်သမားဖြစ်သူ၏ ရုပ်အလောင်းအား မီးဖိုချောင် အတွင်း တွေ့ရှိခြင်းဖြစ်သည်ဟု ၎င်းက ဆိုသည်။
အသက် ၅ လသားအရွယ် သမီးငယ်လေးတဦးကို နေအိမ်၏ ပထမထပ်တွင် တွေ့ရှိသော်လည်း မည်သည့်ဒဏ်ရာမှ မတွေ့ရှိရကြောင်း၊ မည်သည့် အဖိုးတန် ပစ္စည်းကိုမျှ ယူသွားခြင်း မရှိကြောင်း ရဲတပ်ဖွဲ့၏ စစ်ဆေးချက်များ အရသိရသည်။
အသတ်ခံရသူ မညွန့်ညွန့်၏ ခင်ပွန်း အသက် ၃၅ နှစ်ရှိ ကိုစည်သူသည် နေအိမ်သို့ ပြန်ရောက်လာပြီး အိမ်တံခါးပိတ်ထားသည်ကို တွေ့ရှိသည့်အတွက် ယောက်ဖဖြစ်သူ ကိုနန္ဒအား ဖုန်းဆက်ခေါ်ကာ မီးဖိုခန်းတံခါးမှ ကြိုးပမ်းဝင်ရောက်ခဲ့ပြီးနောက် အဆိုပါရုပ် အလောင်းများကို တွေ့ရှိခဲ့ခြင်းဖြစ်သည်။
မညွန့်ညွန့်နှင့် ကိုစည်သူတို့မှာ လွန်ခဲ့သည့် ၆ နှစ်ကတည်းက အဆိုပါနေအိမ်အား ငှားရမ်းနေထိုင်ခဲ့ခြင်းဖြစ်သည်။ ၎င်းတို့မှာ စားသောက်ဆိုင် တဆိုင်ဖွင့်လှစ်ထားသကဲ့သို့ မြန်မာရွှေ့ပြောင်း အလုပ်သမားများ အတွက် အေးဂျင့်အဖြစ် လုပ်ကိုင်နေသူများဖြစ် သည်။
“အိမ်ထဲမှာ ဆူညံပြီး စကားများသံတွေကြားရတယ်။ နောက်ထပ် တနာရီလောက်ကြာတော့ ယောက်ျား၂ ယောက် အိမ်ထဲကနေ အေးအေး ဆေးဆေး လမ်းလျှောက် ထွက်သွားတာ တွေ့လိုက်တယ်”ဟု အိမ်နီးချင်းတဦးက မလေးရှားစတား သတင်းစာသို့ ပြော ထားသည်။
အဆိုပါမှုခင်းတွင် ပါဝင်ပတ်သတ်နိုင်သည်ဟု သံသယဖြစ်ဖွယ် မြန်မာနိုင်ငံသား အသက် ၁၉ နှစ်မှ ၃၄ နှစ်အတွင်း လူ ၄ ဦးအား ဖမ်းဆီးထားကြောင်း မှုခင်းရေးရာ စုံစမ်းစစ်ဆေးရေး အဖွဲ့က ကြေညာထားသည်။
အဆိုပါ သံသယဖြစ်ဖွယ် လူ ၄ ဦးအား အမှုကိစ္စ စစ်ဆေးမေးမြန်းရန်အတွက် ၇ ရက်ခန့် ဖမ်းဆီးထားမည်ဟုလည်း ရဲတပ်ဖွဲ့က ပြောဆိုသည်။
| < Prev | Next > |
|---|
