နေပြည်တော် တည်ဆောက်ရေး စတင်ခဲ့သည့် ၂၀၀၃ ခုနှစ်ခန့်မှစကာ မြန်မာနိုင်ငံအရပ်ရပ်ရှိ ရွှေ့ပြောင်းလုပ်သားများ အလုပ်အကိုင် ရှာဖွေရန် ၀င်ရောက်လာခဲ့ပြီး ယခုကဲ့သို့ ခေါင်းပုံဖြတ်မှုများကို ခံနေရကြောင်း အလုပ်သမားများက ပြောကြသည်။
“အလုပ်က မိန်းကလေးဆို ပန်းပင်ရေလောင်း၊ ယောက်ျားလေးကတော့ ပန်းပင်စိုက်ရမယ် ဆိုပြီး ခေါ်လာပေမယ့် တကယ်တန်းကျတော့ မြေသယ်ရတယ်။ အရမ်းပင်ပန်းပါတယ်” ဟု ပျဉ်းမနား - တောင်ညို လမ်းချဲ့ရာတွင် လုပ်ကိုင်နေသူ အောင်လံမြို့နယ် စခန်းကြီးကျေးရွာမှ မခင်စန်း က ပြောကြားသည်။တရက်လျှင် မိန်းကလေးတဦးအတွက် နေ့စားခ ကျပ် ၂၀၀၀ ပေးမည်ဟု ပြော၍ ခေါ်လာသော်လည်းကျပ် ၁၄၀၀ သာ ပေးကြောင်း၊ ယောက်ျားလေး တဦးအတွက် နေ့စားခ ၃၀၀၀ ကျပ် ပေးမည်ဟု ဆိုသော်လည်း ၁၈၀၀ သာ ပေးကြောင်း သိရသည်။
နေ့စား အလုပ်သမားများအား ၄၅ ရက် အနည်းဆုံး လုပ်ကိုင်ရမည်ဟု ဆိုကာ ခေါ်လာသောကြောင့် မလုပ်ချင်တော့သော်လည်း မပြန်နိုင် သေးကြောင်း အဆိုပါ အလုပ်သမားများက ဆိုသည်။
“ကျမတို့ရွာက အားလုံး ၂၈ ယောက်ကို အရင်ရောက်နှင့်တဲ့ ကျမတို့ရွာသားက တဆင့် လာခေါ်တာပါ။ ၄၅ ရက် မပြည့်ဘဲ ပြန်ရင် လာခေါ်တဲ့သူက လျော်ကြေး ကျပ် ၁ သိန်းပေးရမယ် ဆိုတော့ သူ့ကိုငဲ့ပြီး မပြန်ဖြစ်ကြဘူး” ဟု မခင်စန်းက ပြောသည်။
ပျဉ်းမနား - တောင်ညိုလမ်းကို ၈ လမ်းသွား လမ်းမကြီးအဖြစ် တာဝန်ယူ ဖောက်လုပ်နေသည့် ဆောက်လုပ်ရေး လုပ်ငန်းမှာ လွှတ်တော် အဆောက်အအုံကို ဆောက်လုပ်ခွင့်ရခဲ့သော ACE ဆောက်လုပ်ရေး ဖြစ်သည်။
ACE ဆောက်လုပ်ရေး လုပ်ငန်းပိုင်ရှင် ဦးတင့်ဆန်းမှာ ယခုအခါ ပြည်ထောင်စု ၀န်ကြီးအဖွဲ့တွင် ဆောက်လုပ်ရေး ဝန်ကြီး သို့မဟုတ် ဟိုတယ်နှင့် ခရီးသွားလာရေး ၀န်ကြီးဖြစ်လာမည့်သူဟု အမည်ထွက်နေသူလည်း ဖြစ်သည်။
“အိပ်ရတာလည်း အဆင်မပြေဘူး။ ကြပ်ညပ်နေတာ။ ရေကလည်း ပုံမှန်မလာဘူး၊ ရေမချိုးရတာ ၅ ရက်ရှိပြီ။ ရွာပဲ ပြန်လုပ် စားချင်နေတယ်” ဟု မခင်စန်းက ဆိုသည်။
ထိုကဲ့သို့သော လုပ်အားနှင့် လုပ်ခ ခေါင်းပုံဖြတ်ခံရမှု ဖြစ်ရပ်များသည် ယခု လုပ်ငန်းခွင် တွင်သာမက တခြားသော နေပြည်တော် ဆောက်လုပ်ရေး လုပ်ငန်းခွင် များတွင်လည်း ဖြစ်ပွားနေကြောင်း ဆောက်လုပ်ရေး လုပ်ငန်းများသို့ အုတ်၊ သဲ၊ကျောက် သွင်းသည့် ကန်ထရိုက် တဦးက ပြောပြသည်။
“နေရာတိုင်းမှာလိုလို ဖြစ်နေတာပဲ။ တချို့ လုပ်ငန်းရှင်က ပေးတယ်၊ ကြားကလူက ခေါင်းပုံဖြတ်တယ်။ တချို့ ဆောက်လုပ်ရေး လုပ်ငန်းခွဲတွေ ကတော့ ပိုင်ရှင်ကိုယ်တိုင် ခေါင်းပုံ ဖြတ်တာ ရှိပါတယ်။ တည်ဆောက်ရေး လုပ်ငန်းတွေအတွက် မိန်းကလေး အလုပ်ကြမ်း ကျပ် ၂၀၀၀၊ ယောက်က်ျားလေးက ကျပ် ၃၀၀၀ ဆိုပြီး အနည်းဆုံး သတ်မှတ်ထားတာပါ” ဟု သူက ဆိုသည်။
တချို့လုပ်ငန်းခွင် များတွင် ဆောက်လုပ်ရေး လုပ်ငန်းခွဲတချို့က လုပ်ခမပေးဘဲ ထွက်ပြေးသည့် ဖြစ်ရပ်များ လည်း ဖြစ်ပွားဖူးကြောင်း သိရသည်။
“ပြီးခဲ့တဲ့ တလလောက်က ပျဉ်းမနား ၈၅ တံတားအောက်မှာ မွန်းရေး ဆောက်လုပ်ရေးက ငလိုက်ချောင်းကို ဆည်ဖို့တာ လုပ်သားတွေကို နှစ်ပတ်စာ လုပ်ခမပေးဘဲ လုပ်ငန်းသိမ်းသွားတယ်။ ဘယ်သူ မှ မတိုင်ရဲကြဘူး။ ငြိမ်ခံလိုက်ရတာပဲ။ လုပ်သား ၁၀၀ ကျော်ရဲ့ နှစ်ပတ်စာလုပ်ခကို တကျပ်မှ ရှင်းမသွားဘူး” ဟု အဆိုပါလုပ်ငန်းခွင်တွင် လုပ်ကိုင်ခဲ့သူ တဦးက ပြောသည်။
အဆိုပါလုပ်ငန်းခွင်တွင် နှစ်ပတ်တခါ လုပ်ခများ အဖြစ် ယောက်ျားလေး နေ့စားခ ကျပ် ၃၀၀၀၊ မိန်းကလေး နေ့စားခ ကျပ် ၂၀၀၀ နှင့် တွက်ကာ ရှင်ပေးခဲ့သော်လည်း နောက်ဆုံးနှစ်ပတ်အတွက် လုပ်ခမရှင်းဘဲ လုပ်ငန်း သိမ်းသွားခြင်း ဖြစ်ကြောင်း သူက ဆိုသည်။
လုပ်အားနှင့် လစာ ခေါင်းပုံဖြတ်မှု ဖြစ်ရပ်ကို နေပြည်တော် စည်ပင်သာယာရေး ကော်မတီသို့ တိုင်ကြားမှု တချို့ ရှိခဲ့သော်လည်း တစုံတရာ အရေးယူ ဆောင်ရွက်ပေးခြင်း မရှိကြောင်း စုံစမ်းသိရှိရသည်။
“ကျနော်တို့ တခါက တိုင်ဖူးတယ်။ သပြေကုန်း ဈေးပွဲရုံတန်းတွေ ဆောက်တုန်းက နေ့စားခ မရှင်းတဲ့ကိစ္စပါ။ တလစာလောက် လုပ်အားခကို ကြားထဲက အလုပ်သမားခေါင်းက ယူပြီး ထွက်ပြေးသွားတာ။ ဘာမှ မရှင်းပေးဘူး။ တိုင်တာလည်း အပိုပါပဲ” ဟု ကိုယ်တွေ့ ကြုံခဲ့ရသူ နေပြည်တော် ဒေသခံ ကိုမင်းဇော်က ပြောပြသည်။
| < Prev | Next > |
|---|
