ယင်း အကျဉ်းသားများအား မွန်ပြည်နယ်ရှိ မုပ္ပလင်၊ တောင်စွန်း စသည့် ရဲဘက်စခန်းများသို့ ပို့ဆောင်ရန်ဟု အကြောင်းပြ၍ ရှေ့တန်း စစ်မြေများသို့ ပေါ်တာအဖြစ် ဖေဖော်ဝါရီ လကုန်ပိုင်းက ပို့ဆောင်ခဲ့ကြောင်း အင်းစိန် အကျဉ်းဦးစီးဌာန တာဝန်ကျ ၀န်ထမ်း တဦးက ပြောသည်။
မည်သည့် နေ့ရက်တွင် ပို့ဆောင်သည်နှင့် မည်သည့် အကျဉ်းထောင်များမှ အကျဉ်းသားဦးရေ မည်မျှ ပါဝင်သည် ဆိုသည်ကိုမူ ၎င်းက ဖြေဆိုရန် ငြင်းဆန်သည်။
ယခု အကြိမ်သည် ၂၀၁၀ ဒီဇင်ဘာမှ ၂၀၁၁ ဖေဖော်ဝါရီလ အတွင်း အင်းစိန် အကျဉ်းဦးစီး မှတဆင့် အကျဉ်းသားပေါ်တာ အဖြစ် တတိယ အကြိမ်မြောက် ပို့ဆောင်ခြင်း ဖြစ်ကြောင်း သိရသည်။
“ဒီလိုပဲ ကျောက်ထု ရဲဘက်စခန်း အမည်တပ်ပြီး မြ၀တီ စစ်မြေပြင်ပေါ်တာ အဖြစ် ပို့မှာပဲ။ မြ၀တီ စစ်ကြောင်းဆီကို ဘယ်နှဦး အပို့ခံရမလဲတော့ မပြောတတ်ဘူး”ဟု အင်းစိန် အကျဉ်းဦးစီးဌာန ၀န်ထမ်းက ပြောသည်။
ထို့ကြောင့် မြ၀တီ စစ်ကြောင်း ပေါ်တာ အဖြစ်မှ ငွေပေး၍ နုတ်ယူရန် အကျဉ်းသား တချို့၏ မိသားစုဝင်များက အင်းစိန်အကျဉ်း ဦိးစီး သို့ လာရောက်စုံစမ်းကာ ယခုရက်များအတွင်း မွန်ပြည်နယ် ရဲဘက်စခန်းများသို့ လိုက်သွားကြသည်ဟု သိရသည်။
ပြီးခဲ့သည့် ဖေဖော်ဝါရီ လဆန်းပိုင်းကလည်း အင်းစိန်ထောင်မှ အကျဉ်းသားများကို စစ်မြေပြင်၌ ပေါ်တာအဖြစ်သုံးရန် ၁၀ ဘီး ကား ၅ စီးဖြင့် ခေါ်ထုတ်သွားသည်ဟု နော်ဝေးနိုင်ငံ အခြေစိုက် ဒီမိုကရက်တစ် မြန်မာ့ အသံ(DVB)သတင်း၌ ဖော်ပြထားသည်။
ထို့အပြင် ဇန်န၀ါရီ ဒုတိယ အပတ်က အင်းစိန်ထောင်မှ အကျဉ်းသား ၂၀၀ ကို မြ၀တီစစ်မြေပြင်သို့ ပေါ်တာအဖြစ် ထပ်မံစေလွှတ် ကြောင်း၊ လက်နက်ကြီးများဒဏ်ကြောင့် အကျဉ်းသားပေါ်တာ ၇ ဦးသာ အသက်ရှင် ကျန်ရစ်ကြောင်း၊ ၎င်းတို့သည် ဒဏ်ရာ အသီး သီးနှင့် အင်းစိန်ထောင်ဆေးရုံ၌ လက်ရှိ တက်ရောက်ကုသနေဆဲဖြစ်ကြောင်း၊ ထောင် ဆေးရုံတွင် အကျဉ်းသားလူနာ ၈၀ ထက် မနည်း တက်ရောက်လျက်ရှိပြီး ကျန်းမာရေး စောင့်ရှောက်မှု လုံလောက်စွာ မရရှိကြောင်း အကျဉ်းသားပေါ်တာများက ပြော သည်။
၂၀၁၀ ဒီဇင်ဘာ လလယ်ခန့်ကလည်း ဧရာဝတီတိုင်း ပုသိမ်၊ မအူပင်၊ မြောင်းမြ အကျဉ်းထောင်များမှ အကျဉ်းသား ၂၀၀ သည် အင်းစိန် အကျဉ်းထောင်သို့ ရောက်ရှိလာပြီး မြ၀တီ ရှေ့တန်း စစ်မြေပြင်သို့ ပေါ်တာ အဖြစ် ပို့ဆောင်ခဲ့သေးသည်။
အင်းစိန် အကျဉ်းဦးစီးဌာန တာဝန်ရှိသူများသို့ လာဘ်လာဘ ငွေကြေးပေးနိုင်သူ အကျဉ်းသားများသည် ရန်ကုန်တိုင်းအတွင်းရှိ လှည်းကူး - လှေလှော်အင်း၊ တွံတေး - တောကြီးတန်းအပြင် တခြား ကျောက်ထု ရဲဘက် စခန်းများသို့သာ ပို့ဆောင်ခံရပြီး ငွေကြေး မတတ်နိုင်သည့် အကျဉ်းသား အများစုမှာ လတ်တလော၌ ကရင်ပြည်နယ် ရှေ့တန်း စစ်မြေပြင်သို့ ပို့ဆောင်မှုများ ရှိနေကြောင်း အင်းစိန် အကျဉ်းဦးစီးနှင့် နီးစပ်သူများက ပြောသည်။
ယင်း အကျဉ်းသားပေါ်တာများကို စစ်အစိုးရတပ်ဖွဲ့ဝင်များက မိုင်းရှင်း ကိရိယာများအဖြစ်သုံးခြင်း၊ နှိပ်စက်ညှဉ်းပန်း သတ်ဖြတ်ခြင်း များ ပြုလုပ်သောကြောင့် ထိုင်းနိုင်ငံဘက် သို့ ထွက်ပြေး တိမ်းရှောင်သူများလည်း ရှိခဲ့သည်။
၂၀၁၀ နိုဝင်ဘာ ၇ ရက် နှင့် ၈ ရက်နေ့များမှစ၍ ကရင်ပြည်နယ် မြ၀တီနှင့် ကော့ကရိတ်မြို့နယ်များအတွင်း တိုးတက်သော ဗုဒ္ဓဘာသာ ကရင်အမျိုးသား တပ်မတော်(DKBA)နှင့် စစ်အစိုးရ တပ်များသည် တိုက်ပွဲများဖြစ်ပွားလျက်ရှိပြီး ယင်းတိုက်ပွဲများတွင် စစ်အစိုးရ တပ်က အကျဉ်းသားပေါ်တာ အသုံးပြုမှုများရှိခဲ့သည်။
< Prev | Next > |
---|