ယနေ့ နံနက် ၉ နာရီခန့်က ဖြစ်ပွားခဲ့သည့် ၁၆ ရပ်ကွက်၊ သုမင်္ဂလာလမ်းရှိ မော်တာ အထည်ချုပ် စက်ရုံမီးလောင်မှုတွင် စက်ရုံအနီး နေထိုင်သူတို့က ၀ိုင်းဝန်းကူညီ ငြှိမ်းသတ်ကြသည်ဟု ဒေသခံတဦးက ပြောသည်။“မီးခိုးတွေက လုံးပြီး ထွက်လာတယ်။ စက်ရုံက အကာအရံတွေနဲ့ ဆိုတော့ ၀င်လို့မရ ဖြစ်နေတယ်။ မီးသတ်ယာဉ်တွေ မရောက်သေးတော့ ရပ်ကွက်က စက်ရုံဘေးကပဲ ၀ိုင်း ပက်နေရတယ်” ဟု စက်ရုံ နောက်ဘက်တွင် နေထိုင်သူ တဦးက ရှင်းပြသည်။
မီးသတ်ကားများ ရောက်ရှိသွားပြီး နံနက် ၉ နာရီခွဲခန့်တွင် မီးညွန့် ကျိုးသွားကြောင်း၊ စက်ရုံအတွင်း လောင်စာများကို လှိုက်၍ လောင်ကျွမ်းခဲ့ပုံရပြီး ၁၀ နာရီ ခွဲခန့်တွင် မီး လုံးဝ ငြိမ်းသွားကြောင်း ဒေသခံတို့က ပြောသည်။
ဝန်ထမ်း ၃၀ ကျော် လုပ်ငန်းခွင် ၀င်နေစဉ် လောင်ကျွမ်းခြင်း ဖြစ်ပြီး အထည်ချုပ်လုပ်ငန်း တည်ရှိရာ အဆောက်အအုံ ၂ လုံးတွဲအနက် လက်ယာဘက် အဆောက်အအုံ လုံးဝ ပျက်စီးသွားသည်ဟု သိရသည်။
ယမန်နေ့ည ည ၇ နာရီခွဲခန့်က ဖြစ်ပွားခဲ့သည့် ၁၆ ရပ်ကွက်၊ ရတနာလမ်းမကြီးပေါ်ရှိ New Dream အနှိပ်ခန်း မီးလောင်ကျွမ်းမှုသည် အနှိပ်ခန်း အပေါ်ထပ်မှ စတင်ခဲ့ခြင်း ဖြစ်သည်ဟု အိမ်နီးချင်းများက ပြောပြသည်။
“၇ နာရီ ၄၅ မိနစ်မှာ မီးညွန့်က အိမ်လုံးကို ကျော်နေပြီ။ မီးညွန့် အတော်ကြီးတယ်။ မီးသတ် နီးနေတာရယ်၊ ရပ်ကွက်လူထု ညီတာရယ်ကြောင့် ခုလောက်အချိန်နဲ့ ငြိမ်းတာ” ဟု ဒေသခံ တဦးက ပြောသည်။
တနာရီခန့်ကြာသော ထိုလောင်ကျွမ်းမှုကြောင့် အနှိပ်ခန်း အဆောက်အအုံ ပျက်စီးသွားပြီး အနီးရှိ ဓာတ်ပုံဆိုင်၊ KMK မိတ္တူကူးဆိုင်တို့ အနည်းငယ် မီးဟပ်ခံရသည်။
အနီးဝန်းကျင်ရှိ ဘုန်းတော်ကြီးကျောင်းမှ သံဃာများလည်း မီးငြှိမ်းသတ်ရေးတွင် ကူညီ ဆောင်ရွက်ကြသည်။
မီးလောင်မှု နှစ်ခုလုံးသည် ၀ါယာရှော့ခ်ဖြစ်ရာမှ စတင်ခြင်း ဖြစ်ဖွယ်ရှိသည်ဟု ဒေသခံတို့က သုံးသပ်ကြသည်။
| < Prev | Next > |
|---|
