အရပ်သား အစိုးရသစ်၏ ပထမဆုံးသော လွှတ်တော် မိန့်ခွန်း၌ ပြည်သူလူထုအတွက် ရှေ့တန်းတင် ကြိုးစားနေသည်၊ ဒီမိုကရေစီ အသွင်ကူးပြောင်းရေး လမ်းကြောင်းပေါ်တွင် လျှောက်လှမ်းနေသည်ဟု ဆိုသော်လည်း စကားနှင့်အလုပ် ရှေ့နောက် မညီညွတ်မှုများကို နောက်ဆက်တွဲလုပ်ရပ် များက ပြသနေပေသည်။
ပမာပြရလျှင် ဒီမိုကရေစီကို ဖော်ဆောင်နေသည့် ပြည်သူလူထု တင်မြှောက်ထားသော အစိုးရတရပ်ဆိုပါက ဒီမိုကရေစီ နိုင်ငံတိုင်းတွင် ပြုလုပ်သကဲ့သို့ လွှတ်တော် အစည်းအဝေးပွဲများ၏ ဆွေးနွေးချက်များအား ပြည်သူလူထု ထင်သာမြင်သာ ရှိစေရန် အစိုးရမီဒီယာများက တိုက်ရိုက် ထုတ်လွှင့် ပြသရပေလိမ့်မည်။
လက်တွေ့တွင်မူ လွှတ်တော်တွင်း တင်ပြချက်၊ ဆွေးနွေးချက်များမှာ စိစစ်ရေးက ဖြတ်တောက်ပြီးမှသာ ပြည်သူလူထု မြင်တွေ့ ဖတ်ရှုခွင့် ရရှိသည်။ နိုင်ငံတော်၏ ငွေစာရင်းရှင်းတမ်းများ၊ ဘတ်ဂျက်လိုငွေပြမှုများကိုလည်း ပြည်သူလူထုက ရှင်းရှင်းလင်းလင်း သိခွင့်မရှိပေ။
ထို့အပြင် သမ္မတဦးသိန်းစိန်သည် ၎င်းသမ္မတ အဖြစ်တာဝန်ယူပြီးချိန်မှစ၍ မီဒီယာကို တိုင်းပြည်၏ စတုတ္ထမဏ္ဍိုင် အဖြစ် လက်ခံယူဆသည်ဟု ဆိုကာ လွှတ်တော်တွင်း ပြည်တွင်း ပုဂ္ဂလိက သတင်းမီဒီယာများအား ဝင်ရောက် သတင်းယူခွင့် ပေးထားသော်လည်း ယခင် စစ်အစိုးရ အသုံးပြုခဲ့သည့် နည်းလမ်းအတိုင်း လုံခြုံရေး အကြောင်းပြ၍ ကိုယ်စားလှယ်များအား မေးမြန်းခွင့်၊ လွတ်လပ်စွာ သတင်းယူခွင့်တို့ကို ပိတ်ပင်ထားခဲ့သောကြောင့် တံခါးပိတ် ဆွေးနွေးပွဲဟု အမည်မတပ်သာရုံသာ ရှိခဲ့သည်။
ပြည်သူ့လွှတ်တော် ဥက္ကဋ္ဌ ဦးရွှေမန်းကလည်း နိုင်ငံသားများ၏ မူလအခွင့်အရေး၊ ဒီမိုကရေစီအရေးနှင့် လူ့အခွင့်အရေးများကို ကာကွယ် စောင့်ရှောက်ရေး အတွက် လွှတ်တော်က ဆောင်ရွက်ပေးသွားမည်ဟု မိန့်ခွန်း ပြောဆိုသွားခဲ့သေးသည်။
အမှန်တကယ် ဒီမိုကရေစီနှင့် လူ့အခွင့်အရေးကို ကာကွယ်စောင့်ရှောက်လိုသော အစိုးရဆိုလျှင် နိုင်ငံရေး အကျဉ်းသားများ အရေးကိစ္စ၊ တိုင်းရင်းသားဒေသများ၌ အပစ်ရပ်ရေး၊ ဒေသခံတိုင်းရင်းသား တို့၏ လုံခြုံရေး၊ လူမှုရေး၊ စီးပွားရေးများအား ဦးစားပေး ဆောင်ရွက်သင့်သည် မဟုတ်ပါလား။ သို့သော် ထိုအရေးကိစ္စများအား မဆောင်ရွက်ဘဲ ပြောဆိုလိုက်သည့် ဦးရွှေမန်း၏ မိန့်ခွန်းမှာ ကုလသမဂ္ဂ လူ့အခွင့်အရေးကိုယ်စားလှယ် မစ္စတာ သောမတ်စ် အိုဟေး ကင်တားနား မြန်မာပြည်သို့ မလာမီ နားထောင်ကောင်းရုံ အသံလွှင့်လိုက်ခြင်းသာ ဖြစ်သည်။
မစ္စတာ ကင်တားနားနှင့် အစိုးရ တာဝန်ရှိသူများ တွေ့ဆုံစဉ် ၎င်းက မြန်မာနိုင်ငံရှိ နိုင်ငံရေးအကျဉ်းသားများ လွှတ်ပေးရန် ကုလသမဂ္ဂ အထွေထွေအတွင်းရေးမှူးအပါအဝင် အာဆီယံနိုင်ငံများနှင့် ၎င်း ကိုယ်တိုင် တောင်းဆိုသည်ဟု ဆိုရာ၌ ယခင် စစ်အစိုးရ အဆက်ဆက် ပြောခဲ့သည်အတိုင်း နိုင်ငံရေးအကျဉ်းသားမရှိ၊ ယုံကြည်ချက်ကြောင့် အကျဉ်းကျသူ မရှိဟု ပြန်လည်ပြောဆိုခဲ့ကြသည်။
ယနေ့ထုတ် သတင်းစာတွင်လည်း တိုင်းပြည်တည်ငြိမ်အေးချမ်းမှုကို အနှောင့်အယှက် မပြုကြောင်း သေချာမှသာ အကျဉ်းသားများအား လွှတ်ပေး နိုင်မည်ဖြစ်ကြောင်း အမျိုးသားလွှတ်တော်ဥက္ကဋ္ဌ ဦးခင်အောင်မြင့်က မစ္စတာ ကင်တားနား၏ တောင်းဆိုချက်ကို ပြန်ကြားသည်ဟု ပါရှိသည်။ သို့ဆိုလျှင် မတရား ဖမ်းဆီခံထားရသော နိုင်ငံရေး အကျဉ်းသားများအား လွှတ်မည်မဟုတ်ဟု ယုံကြည်ရသည်။
ကျင်းပနေသည့် လွှတ်တော်အတွင်း၌ ဒီမိုကရေစီ အင်အားစုကိုယ်စားလှယ် များက နိုင်ငံရေးအကျဉ်းသားများအား လွှတ်ပေးရေး ကိစ္စ၊ လွတ်ငြိမ်းချမ်းသာခွင့်ကိစ္စ၊ နယ်စပ်ဒေသ တိုင်းရင်းသားများ အရေးကိစ္စများကို တင်သွင်းမည်ဆိုသည့် သတင်းများ ထွက်ပေါ်ခဲ့သော်လည်း စစ်အစိုးရ ဝန်ကြီးဟောင်းများနှင့် ကြံ့ဖွံ့ပါတီခေါင်းဆောင်များသာ လွှမ်းမိုးနေသော လွှတ်တော်အတွင်း၌ အဆိုပါကိစ္စရပ်များ အရာမထင်ဟုပင် ဆိုရပေမည်။
မကြာသေးမီက စစ်အုပ်ချုပ်ရေး ထိပ်ဆုံးခေါင်းဆောင်များ တခါမှ မျက်နှာချင်း မဆိုင်ခဲ့ဘူးသော မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကို သမ္မတဦးသိန်းစိန်က လက်ခံတွေ့ဆုံခဲ့ခြင်း၊ သမ္မတ အိမ်တော်တွင် အမျိုးသား ခေါင်းဆောင် ဗိုလ်ချုပ်အောင်ဆန်းနှင့် တခြားသော နိုင်ငံ့ခေါင်းဆောင်ဟောင်းများ၏ ဓာတ်ပုံများကို ချိတ်ဆွဲ ပြသထားခြင်း စသည့် အချက်များကို ကြည့်ခြင်းဖြင့် ယခု အစိုးရအနေဖြင့် ယခင်စစ်အာဏာရှင် ဗိုလ်ချုပ်မှူးကြီး သန်းရွှေ၏ စစ်အစိုးရနှင့် မတူ ကွဲပြားကြောင်း ပြသလိုပုံရသည်။
သို့သော် ထို ပျော့ပြောင်းမှုများနှင့် ချိုသာသော စကားလုံးများမှလွဲ၍ ဒီမိုကရေစီ လမ်းကြောင်းကို ဦးတည်သည့် တန်းတူရည်တူ နိုင်ငံရေးစကားဝိုင်းများ စတင်နိုင်မည့် အခြေအနေကို မမြင်တွေ့ရသေးပေ။
ထိုသို့ စကားလုံးအလှများနှင့် တန်ဆာဆင်ထားသည့် မိန့်ခွန်းများကို ပြောနေခြင်း၊ ပြော့ပြောင်းဟန် ဆောင်နေခြင်းမှာ ၂၀၁၄ ခု၌ အာဆီယံ ဥက္ကဋ္ဌ ဖြစ်ခွင့်နှင့် နိုင်ငံတကာက အသိအမှတ်ပြုသော အစိုးရတရပ် ဖြစ်ရေးကို မျှော်လင့်နေခြင်းကြောင့် ဟု ကောက်ချက်ဆွဲရန်သာ ရှိတော့သည်။
သမ္မတက ၎င်း၏ မိန့်ခွန်းတွင် ပြည်သူလူထု တခဲနက် ထောက်ခံခဲ့သော အခြေခံဥပဒေ ရှိနေကြောင်း၊ ပြည်သူလူထု တင်မြှောက်သော အစိုးရတရပ် ရှိနေပြီဖြစ်ကြောင်း ပြောဆိုခဲ့သော်လည်း ၂၀၀၈ မေလက မြန်မာနိုင်ငံအတွင်း နာဂစ် ဆိုင်ကလုန်းမုန်တိုင်း ဝင်ရောက်စဉ် ပြည်သူအများစု၏ ဆန္ဒမပါဘဲ အတည်ပြုခဲ့သော အခြေခံဥပဒေ ဖြစ်ကြောင်း၊ ပြည်သူ့ဆန္ဒမပါဘဲ မဲမသမာ မှုများဖြင့် အနိုင်ရခဲ့သော ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ (ကြံ့ဖွံ့ပါတီ) က ဦးဆောင်သည့် အစိုးရသာ ဖြစ်ကြောင်း ပြည်တွင်းပြည်ပက နားလည်ထားပြီးဖြစ်သည်။
ဦးသိန်းစိန် အစိုးရအနေဖြင့် အကျိုးလို၍ ညောင်ရေလောင်းသည်ဟု ဆိုသည့်တိုင်အောင် အပြောသက်သက် မဟုတ်ဘဲ အမှန်တကယ် ပြည်သူလူထု၏ တခဲနက် ထောက်ခံမှုကို ရရှိစေရန် ပထမဦးစွာ ကြိုးစားသင့်ပါသည်။ ပြည်သူ့ အစိုးရဟု အမည်ခံပြီး ပြည်သူလူထု ထောက်ခံမှုအတွက် မကြိုးစားဘဲ နိုင်ငံတကာ၏ ယုံကြည်မှုအတွက် စကားလုံးတန်စာ ဆင်ပြနေခြင်းက အဓိပ္ပာယ် မဲ့လွန်းလှပေသည်။
| < Prev | Next > |
|---|
