အဖွဲ့ချုပ်က ခြွင်းချက်ဖြင့် ၂၀၁၀ ရွေးကောက်ပွဲကို လက်ခံ

E-mail Print
အမျိုးသား ဒီမိုကရေစီ အဖွဲ့ချုပ်က ၂၀၁၀ တွင် စစ်အစိုးရ ကျင်းပမည့် ရွေးကောက်ပွဲကို ခြွင်းချက် သုံးခုဖြင့်  လက်ခံသည်ဟု ယမန်နေ့က သဘောထား ကြေညာချက် ထုတ်ပြန် လိုက်သည်။

အဆိုပါ ခြွင်းချက် သုံးခုမှာ နိုင်ငံရေး အကျဉ်းသား လွှတ်ပေးရန်၊ ၂ဝဝ၈ ခုနှစ် အခြေခံ ဥပဒေကို ပြင်ဆင်ရန်၊ ရွေးကောက်ပွဲတွင် အလွှာ အသီးသီး ပါဝင်ပြီး နိုင်ငံတကာက စောင့်ကြည့်ခွင့်ပြုရန် တို့ ဖြစ်သည်။

ထိုအချက်များမှာ ကုလသမဂ္ဂ၊ အရှေ့တောင် အာရှ နိုင်ငံများ အဖွဲ့၊ ဥရောပသမဂ္ဂ စသည့် နိုင်ငံတကာ အင်အားစုက စစ်အစိုးရကို တစိုက်မတ်မတ် တောင်းဆိုထားသည့် အချက်များလည်း ဖြစ်သည်။

ဤသို့ ဆုံးဖြတ်လိုက်ခြင်းမှာ မြန်မာ တပြည်လုံး ကြုံတွေ့နေရသော အခက်အခဲများကြောင့် ဖြစ်သည်ဟု အဖွဲ့ချုပ် ခေါင်းဆောင် တဦး ဖြစ်သူ ဦးခင်မောင်ဆွေက ပြောသည်။

“နိုင်ငံရေး အကျဉ်းသားတွေရဲ့ နှစ်ရှည်လများ ဒုက္ခ သုက္ခတွေကို မျှဝေနေတဲ့ မိသားစုတွေ၊ စီးပွားရေး၊ လူမှုရေး၊ နိုင်ငံရေးမှာ ခြေကုန် လက်ပန်း ကျနေတဲ့ ပြည်သူတွေရဲ့ အကျိုးစီးပွားကို မျှော်တွေးပြီးတော့ လက်ကမ်းလိုက်တာ ဖြစ်ပါတယ်” ဟု ဗဟို အလုပ်အမှုဆောင် အဖွဲ့ဝင် ဦးခင်မောင်ဆွေက ပြောသည်။

အဖွဲ့ချုပ်သည် အာဏာပိုင်များက ပြုလုပ်ပေးသည့် ၁၉၉ဝ ပြည့်နှစ် ရွေးကောက်ပွဲတွင် အပြတ်အသတ် နိုင်ခဲ့သည့် နိုင်ငံရေးပါတီ ဖြစ်သည်။ အစိုးရက အဆိုပါ ရလဒ်ကို အကောင်အထည် မဖော်ဘဲ ရွေးကောက်ပွဲတခု ပြုလုပ်ပါက အဖွဲ့ချုပ် အနေဖြင့် လက်မခံနိုင်ကြောင်း ယခင်က ကြေညာထားသည်။

ယမန်နေ့က ထုတ်ပြန်သည့် စာမျက်နှာ ၃ မျက်နှာပါ ရွှေဂုံတိုင် ကြေညာစာတမ်းသည် အနယ်နယ် အရပ်ရပ်မှ အဖွဲ့ချုပ် ကိုယ်စားလှယ်များ ရန်ကုန်တွင် အထူး အစည်းအဝေး ပြုလုပ်ခဲ့ရာမှ ထွက်ပေါ်လာခြင်း ဖြစ်သည်။

ထွက်ပေါ်လာမည့် အဖြေကို သိလိုသဖြင့် အာဏာပိုင်များကပင် အဆိုပါ အစည်းအဝေးကို ဖြစ်မြောက်စေလိုသည် ဟု အကဲခတ်များက သုံးသပ်ကြသည်။ အထူး အစည်းအဝေးသို့ သွားရောက်မည့်သူများကို ကန့်သတ်ပိတ်ပင်၊ ဖမ်းဆီးခြင်း မပြုခဲ့သည့် အချက်ကို ၎င်းတို့က ထောက်ပြကြသည်။

ကြေညာစာတမ်းတွင် ပါရှိသော အဖွဲ့ချုပ်၏ ရပ်တည်ချက်များမှာ မှန်ကန်သည်ဟု ရခိုင် ဒီမိုကရေစီ အဖွဲ့ချုပ် အတွင်းရေးမှူး ဦးအေးသာအောင်က ပြောသည်။

“အရင်တုန်းကတော့ အဖွဲ့ချုပ်ဟာ ပါတီ ရှင်သန်ရေး၊ ပါတီရှိမှ ဒီမိုကရေစီရေး အတွက် ဆောင်ရွက်လို့ရမယ် လို့ ဒီလိုပဲ ရပ်တည်ခဲ့တယ်။ ဒါပေမယ့် ဦးဝင်းတင်တို့ မလွတ်ခင် ပါတီ ရှင်သန်ရေးထက် ပါတီရဲ့ အခြေခံမူတွေကို ဆုပ်ကိုင်ရေးဘက်ကို ပြောင်းလဲလာပါတယ်။ အခုလည်း ဒီအတိုင်း ရပ်တည်နေပါတယ်။ ဒါကို အကြိုက်ဆုံးပဲ” ဟု ဦးအေးသာအောင်က ဧရာဝတီကို ပြောသည်။

သို့သော်လည်း အာဏာပိုင်တို့နှင့် ညှိနှိုင်းသည့် အခြေအနေသို့ ရောက်လာပါက အလျှော့ပေးရဦးမည်ဟု ဦးအေးသာအောင်က သုံးသပ်သည်။

“တပ်နဲ့ လက်တွဲရမယ်၊ အပေးအယူ လုပ်ရမယ်၊ ကိုယ့်ဘက်က များများ ပေးရမယ်” ဟု ဦးအေးသာအောင်က ပြောသည်။

ရွှေဂုံတိုင် ကြေညာစာတမ်းသည် အဖွဲ့ချုပ် အဖွဲ့ဝင်များအတွက် အလုပ်လမ်းညွှန်တခု ဖြစ်လာကြောင်း၊ ဒီမိုကရေစီ လိုလားသူများ၏ ပူးပေါင်းဆောင်ရွက်မှု ပိုမို ရလာဖွယ်ရှိကြောင်း ပြည်ပရောက် လူ့ဘောင်သစ် ဒီမိုကရက်တစ် ပါတီက ယူဆနေသည်။

သို့သော်လည်း အဖွဲ့ချုပ်၏ တောင်းဆိုချက်တခုဖြစ်သည့် အခြေခံဥပဒေ ပြန်လည် ပြင်ဆင်ရေးကိုမူ စစ်အစိုးရက သဘောတူနိုင်မည်ဟု မယူဆကြောင်း လူ့ဘောင်သစ်ပါတီ တွဲဖက် အထွေထွေ အတွင်းရေးမှူး ကိုငွေလင်းက ဧရာဝတီကို ပြောပြသည်။

အဖွဲ့ချုပ်က ပြီးခဲ့သည့် ရက်ပိုင်းအတွင်း ပြုလုပ်သည့် အထူး အစည်းအဝေးတွင် ဆွေးနွေးကြရာ အခြေခံ ဥပဒေရှိ အငြင်းပွားဖွယ်ရာ အချက် ၁၂ ချက် ကို ပြင်ဆင်ရန် ထောက်ပြထားသည်။ ယင်းသို့ ထောက်ပြချက်များအနက် နိုင်ငံရေးတွင် တပ်မတော်၏ ဦးဆောင်မှု၊ လွှတ်တော်တွင် တပ်မတော်သား ၂၅ ရာခိုင်နှုန်း ပါဝင်မှု စသည့် အချက်များ ပါဝင်သည်။

“အခြေခံ ဥပဒေကို လူထု ၉၂.၄၈ ရာခိုင်နှုန်းက အတည်ပြုထားတယ်၊ ပြန်ပြင်ရင် လူထုကို မလေးစားရာကျတယ် လို့ စစ်အစိုးရက ပြောထားတယ်။ လိုက်လျောမှာ မဟုတ်ဘူး။ အခုအတိုင်းကတော့ ဖြစ်နိုင်ချေ နည်းတယ်” ဟု ကိုငွေလင်းက ပြောသည်။

လာမည့် ရွေးကောက်ပွဲတွင် ဝင်ရောက် ယှဉ်ပြိုင်မည်ဟု ဆိုသော်လည်း အဖွဲ့ချုပ်က ကိုင်စွဲထားသည့် ၁၉၉ဝ ရွေးကောက်ပွဲ ရလဒ်နှင့် ပတ်သက်ပြီးလည်း ရွှေဂုံတိုင် ကြေညာစာတမ်းတွင် အကြိမ်ကြိမ် ဖော်ပြထားသည်။

“ရွေးကောက်ပွဲဥပဒေ ပုဒ်မ (၃) နှင့်အညီ ၁၉၉ဝ ပြည့်နှစ် ရွေးကောက်ပွဲရလဒ် ဖြစ်သော ပြည်သူ့လွှတ်တော်ကို တနည်းနည်းဖြင့် အသိအမှတ်ပြုရေး စီစဉ် ဆောင်ရွက်ရန်” ဟု စစ်အစိုးရကို တိုက်တွန်းထားသည်။

အထူး အစည်းအဝေးကို အဖွဲ့ချုပ်၊ ဌာနချုပ်ရုံး တည်ရှိရာ ရန်ကုန်တိုင်း၊ ဗဟန်းမြို့နယ်၊ အနောက် ရွှေဂုံတိုင်လမ်းတွင် ပြုလုပ်ခဲ့ခြင်း ဖြစ်သောကြောင့် ထုတ်ပြန်ချက်ကို “ရွှေဂုံတိုင် ကြေညာစာတမ်း”ဟု အမည်ပေးခဲ့ခြင်း ဖြစ်သည်။

ရွှေဂုံတိုင် ကြေညာစာတမ်းတွင် ဖော်ပြထားချက်များအရ အဖွဲ့ချုပ်၏ လှုပ်ရှားမှုများ လက်တွေ့ကျလာသည်ဟု ထိုင်းနိုင်ငံတွင် အခြေစိုက်ပြီး မြန်မာ့ နိုင်ငံရေးကို လေ့လာ အကဲခတ်နေသော ကိုဝင်းမင်းက သုံးသပ်လိုက်သည်။

“ရွေးကောက်ပွဲနဲ့ ပတ်သက်ပြီး သူတို့ စပြောလာပြီ။ အရင်ကဆိုရင် ရွေးကောက်ပွဲအကြောင်း သူတို့ မပြောဘူး။ အခု သူတို့ဆီမှာ ရွေးကောက်ပွဲနဲ့ ပတ်သက်ပြီး သေနင်္ဂဗျူဟာ စရှိလာပြီ၊ လက်တွေ့ကျလာပြီလို့ ပြောလို့ရတာပေါ့” ဟု ကိုဝင်းမင်းက ပြောသည်။

တိုင်းရင်းသားအရေးနှင့် ပတ်သက်ပြီး ဖော်ပြထားသဖြင့် ပြည့်စုံသည့် ထုတ်ပြန်ချက် တခု ဖြစ်သည်ဟု ကိုဝင်းမင်းက သုံးသပ်သည်။
 
Facebook Video Blog
ကာတွန်း
ကာတွန်း
စစ်သည်တော် စာမျက်နှာ
Ads-for-Cmnat224tg
  • အယ်ဒီတာ့အာဘော်
  • သူ့အတွေး သူ့အမြင်

ဒီမိုကရက်တစ် ယဉ်ကျေးမှု တည်ဆောက်ကြပါစို့

မြန်မာပြည် စာနယ်ဇင်းလောက အတွက် အံ့အားသင့်စရာကောင်းသော၊ သို့သော် ဝမ်းမြောက်ဖွယ်ကောင်းသော သတင်းတပုဒ်ကို ယခုရက်ပိုင်းတွင် ကြားလိုက်ရသည်။ ပြည်ပအခြေစိုက်

အပြည့်အစုံသို့

ဆန္ဒမစောကြပါနှင့်

ဧရာဝတီမြစ်ဆုံ ရေအားလျှပ်စစ် စီမံကိန်းကြီးအား သမ္မတ ဦးသိန်းစိန်မှ ဆိုင်းငံ့ကြောင်း ကြေညာချက်သည် မြန်မာ တမျိုးသားလုံး၏ ညီညွတ်မှုကြောင့် အောင်မြင်မှုရသည်ဟု ပြောရပါမည်။

အပြည့်အစုံသို့

Donate to Irrawaddy

ငွေလဲနှုန်း

အောက်တိုဘာ ၀၆၊ ၂၀၁၁
us ဒေါ်လာ = ၈၃၀ ကျပ်
th ဘတ် = ၂၅.၆ ကျပ်