ယင်းသို့ ဝန်ထမ်းများကို အလုပ်ထုတ်ပယ်ရာတွင် ခံစားခွင့်ငွေကြေး တစုံတရာမယူဘဲ အလုပ်ထွက်ကြောင်း ဝန်ခံကတိလက်မှတ် ထိုးခိုင်းမှုများလည်း ရှိသည်ဟု ဇေယျဝတီ သကြားစက်မှ ဝန်ထမ်းတဦးက ပြောသည်။
ဝန်ခံကတိများထိုးခိုင်း၍ အလုပ်ထုတ်ပယ်ရာတွင် အသက် ၆၀ အရွယ်ရှိဝန်ထမ်းအများစု ပါဝင်နေပြီး အငြိမ်းစား (ပင်စင်)လစာခံစားခွင့် ပေးမည်မဟုတ်ကြောင်း ၎င်းကဆိုသည်။
ယင်းဇေယျဝတီ သကြားစက်ရုံတွင် နှစ်၂၀ကျော် ရုံးဝန်ထမ်းအဖြစ် လုပ်ကိုင်ခဲ့သူ ဦးဘသိန်းက“ကျနော် ဒီစက်ရုံ မှာလုပ်တာကြာပါပြီ။ အသက်ကလည်း ၆၀ ပြည့်ပြီ။ အခု အလုပ် ထွက်ရတာတောင် ပင်စင် မပေးတော့ စိတ် မကောင်းဖြစ်မိတယ်”ဟု ပြောသည်။
ဇေယျဝတီသကြားစက်ရုံကို ယခုလဆန်းပိုင်းက ဦးပိုင်လီမိတက်က စက်မှု(၁) ထံမှလွှဲပြောင်း ယူလိုက်ခြင်းဖြစ် သည်။
ယခင်စက်မှု(၁)ဌာနပိုင် အုတ်တွင်းသကြားစက်၊ တောင်ဇင်အေးသကြားစက်၊ အင်းဝါးခွ သကြားစက်များကို စီးပွားရေးဦးပိုင်လီမိတက်မှ လွှဲပြောင်းလုပ်ကိုင်စဉ်က ပင်စင်လစာ ပေးခဲ့ပြီးနေရပ်သို့ပြန်ခိုင်းခဲ့ကြောင်း အုတ်တွင်း သကြားစက်တွင် လုပ်ကိုင်ခဲ့သူ ဦးနှင်းမောင် ဆိုသူက ပြောသည်။
အစိုးရအနေဖြင့် မိမိတို့၏ ဝန်ထမ်းများကို ငဲ့ညှာသင့်ကြောင်း ယခုကဲ့သို့ပြုမှုလိုက်ခြင်းကြောင့် နှစ်ရှည်လများ လုပ်ကိုင်ခဲ့ရသော်လည်း ဘဝအာမခံချက်နည်းပါးသည်ကို သိရှိရ၍ စိတ်မကောင်းဖြစ်မိကြောင်း ၎င်းက ဆိုသည်။
လုပ်သက်၂၈ နှစ်ဝန်းကျင်ရှိသူများအနေဖြင့်လည်းပင်စင်လစာ ရရှိခြင်းမရှိ၍ အလုပ်လက်မဲ့ ဖြစ်နေရကြောင်း သိရသည်။
ယခုလွှဲပြောင်းယူလိုက်သော စက်ရုံများကို ဦးပိုင်လီမိတက်အနေဖြင့် လက်ရှိလုပ်ငန်း ပြန်လည်ပတ်ရန် အစီအစဉ် ရှိမရှိကို အတည်မပြုနိုင်သေးကြောင်း တာဝန်ရှိသူတဦးက ပြောသည်။
အစိုးရ ဝန်ထမ်းများ အငြိမ်းစားယူသောအခါရရှိနိုင်မည့် လုပ်သက်ဆုငွေနှင့် ပင်စင်လစာကို အကျိုးခံစားခွင့်ရှိ ကြောင်း ဥပဒေ ထုတ်ပြန်ထားသည်။
“အစိုးရ ၀န်ထမ်းတွေဟာ အသက်ကြီးလာရင် ဒီပင်စင်လေးဘဲ မှီခိုရတာ သိပါတယ်။ ဒါပေမယ့် အထက်က ညွှန်ကြားတဲ့ အတိုင်း လုပ်ဆောင်ရတာပါ။ရှိတဲ့ အလုပ်သမားအားလုံးကို အလုပ်ဖြုတ်ပစ်တာတော့ မဟုတ်ပါဘူး” ဟု အရက်ချက်စက်ရုံမှ အကြီးတန်း စစ်ဆေးရေးမှူးက ပြောသည်။
ဦးဘသိန်းကမူ“ဒီလိုဥပဒေမဲ့လုပ်နေတဲ့အတွက် တသက်လုံးလုပ်လာတဲ့ဝန်ထမ်းတွေမှာ ရသင့်ရထိုက်တဲ့ အိုနာစာလေး မရတော့ စိတ်ဓာတ်ကျပြီး သားသမီးတွေဆီပြန်ကြတာပေါ့”ဟု သက်ကြီးဝန်ထမ်းအများစု၏ လက်ရှိအခြေအနေကို ပြောပြသည်။
| < Prev | Next > |
|---|
