အာဏာပိုင်များက NLD သင်္ဃန်းကျွန်းမြို့နယ်စည်းရုံးရေးအဖွဲ့ဝင် မနီမိုလှိုင်အား ပြီးခဲ့သည့်၂၀၀၈ ခုနှစ် နာဂစ် မုန်တိုင်းဒဏ်ခံဒုက္ခသည်များကို အကူအညီပေးမှုကြောင့် ဖမ်းဆီးခံခဲ့ရပြီးနောက်ပိုင်း အင်းစိန်ထောင် တွင်း တရားရုံး၌် ထောင်ဒဏ် စုစုပေါင်း ၅ နှစ်ချမှတ်ခံခဲ့ရသည်။ မနီမိုလှိုင်၏အစ်မ ဖြစ်သူ မစုစုလှိုင်က“သူ့ (မနီမိုလှိုင်)ရောဂါ လက္ခဏာက ခေါင်း မခံမရပ်နိုင်အောင်ကိုက် တယ်၊ ခြေတွေ လက်တွေ တုန်တယ်၊ လူနုန်းတယ်၊ ခြေတွေ၊ လက် တွေကိုက်တယ်ပေါ့နော်၊ အောက်တိုဘာ ၃၁ ရက်နေ့ က မေမေတို့ သွားတွေ့တယ်၊ သူ့ကို လူနှစ်ယောက် တွဲခေါ်ပေးရတယ်၊ ခါတိုင်း သွားတွေ့ရင် သူတယောက်တည်း လာတွေ့နေကျလေ၊ အဲလို မြင်လိုက်တော့ မေမေလည်း စိတ်ထိခိုက် သွားတယ်” ဟု ဧရာဝတီ ကိုပြောသည်။
အသက် ၄၀ အရွယ်ရှိ မနီမိုလှိုင်၏ ဖခင်ဖြစ်သူအပါအဝင် မောင်တဦး၊ ညီမ တဦးတို့သည် ဦးနှောက်အမှေး ရောင် ရောဂါဖြင့် ကွယ်လွန်ခဲ့ဖူးသဖြင့် မနီမိုလှိုင်သည်လည်း ၎င်းဝေဒနာခံစားနေရသည်ဟု ထင်မြင်ကြောင်း မိသားစုဝင်က ဆိုသည်။ ပြီးခဲ့သည့် အောက်တိုဘာလ ပထမပတ်ကတည်းက ယင်းဝေဒနာ ခံစားနေရသည် ဟု သိရသည်။
မစုစုလှိုင် က “ ဆရာဝန်နဲ့ ဆေးကုဖို့အတွက် သံတိုင်ကြားထဲက သူက လက်ထုတ် ပေးတယ်၊ ဆရာဝန်က ဗိုက်ကို စမ်းသပ်ချင်တယ် ဆိုတာတောင် ထောင် တံခါးမဖွင့်ပေးဘူး၊ ပထမတော့ အစာအိမ်ထင်လို့ အစာအိမ် ဆေးပေးတယ်၊ သုံးရက် အထိ မသက်သာဘူး၊ အဲတော့ တိုက်ဖိုက်ဆိုပြီး တိုက်ဖိုက်ဆေး ၆ လုံး ထိုးပေးတယ်၊ ဒါလည်း အဖျားလုံးဝကျ မသွားဘူး” ဟု ပြောသည်။
ဆက်လက်ပြီး ၎င်း က “နောက်ဆုံး ဆရာဝန်က သွေးဖောက်စစ်တယ်၊ ဘာရောဂါ ဖြစ်တယ်ဆိုတာ ဆရာဝန်က မပြောဘူး။ ဆေးစာရွက်ကို သူလှမ်းမြင်လိုက်တာတော့ ဦးနှောက်အမှေးရောင်လို့ ထင်နေတယ်” ဟု ပြောပြသည်။
ထောင်တွင်း ဆရာဝန်က ထောင်ဝန်ထမ်းများကို ဆေးရုံတင်ရန် ပြောဆိုသော်လည်း မနီမိုလှိုင်က သူ၏ မိသားစုဝင်များ သူ့အားကျန်းမာရေးစောင့်ရှောက်မှုခက်ခဲမည်ကို စိုးရိမ်သဖြင့် ဆေးရုံတင်ကုသမှုကို ငြင်းဆို ခဲ့ကြောင်းသိရသည်။
သူ၏ စိတ်ဓာတ်ခံယူချက်နှင့် ပတ်သက်ပြီး မစုစုလှိုင်က “သူ့ရဲ့ ပင်ကိုစိတ်ကိုက မဟုတ်မခံ၊ မှန်တာဆို ပြောမယ်၊လုပ်မယ်၊ သူမှန်တယ်ထင်ရင် သူ့ကို သတ်မယ်ဆိုရင် ရအောင်လုပ်မယ်ဆိုတဲ့စိတ်၊ အိမ်မှာ မောင်နှမသုံးယောက်ထဲမှာ သူက ခံယူချက်ပြင်းတယ်၊ စာမှာပဲဖြစ်ဖြစ်၊ လက်မှုပညာမှာပဲဖြစ်ဖြစ် ထက် လည်းထက်တယ်” ဟု ပြောသည်။
သရက်ထောင်တွင် ဆေးဝါးမပြည့်စုံခြင်း၊ ဆေးကုသခွင့်မရခြင်း၊ အဓမ္မအလုပ်စေခိုင်းခြင်းနှင့် အစား အသောက်ချို့တဲ့ခြင်းများ ရှိကြောင်းသိရသည်။
မြန်မာနိုင်ငံရှိ စစ်အစိုးရအကျဉ်းထောင်းများအတွင်း နိုင်ငံရေးအကျဉ်သားများ ကျန်းမာရေး စောင့်ရှောက်မှု အလုံအလောက်မရရှိကြောင်းနှင့် အစာအဟာရချို့တဲ့မှုများ ရှိကြောင်း မကြာသေးခင်က လွတ်မြောက်လာ သူများက ပြောသည်။
ထိုင်း နိုင်ငံအခြေစိုက် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) စာရင်းအရ စစ်အစိုးရ ဖမ်းဆီးထားသော နိုင်ငံရေးအကျဉ်းသားပေါင်း ၂၁၆၈ ဦးရှိပြီး NLD အဖွဲ့ဝင် ၄၃၅ ဦး ပါဝင် ကြောင်းသိရသည်။
| < Prev | Next > |
|---|
