ဒီမိုကရေစီ အရေး လှုပ်ရှားသူ ကိုညီညီအောင် ခေါ် ကိုကျော်ဇောလွင်သည် အမေရိကန် နိုင်ငံသားအဖြစ် ခံယူထားသူတဦး ဖြစ်သည်။“ပြည်ပတွင် အထိန်းသိမ်း ခံနေရသည့် အမေရိကန် နိုင်ငံသားတိုင်း၏ ကျန်းမာရေး၊ လုံခြုံရေး၊ မျှတစွာ ဆက်ဆံမှု ရရှိရေးတို့အတွက် အမေရိကန် နိုင်ငံခြားရေး ဝန်ကြီးဌာနက ဆောင်ရွက်ရမည် ဖြစ်သည်" ဟု အထက် လွှတ်တော် အမတ် Barbara A. Mikulski က နိုင်ငံခြားရေး ဝန်ကြီးသို့ မကြာသေးမီက ပေးပို့သည့်စာတွင် ဖော်ပြထားသည်။
ညီညီအောင်အပေါ် စစ်အစိုးရ၏ အပြုအမူများကို စိုးရိမ်မိသည်ဟု မေရီလန်းပြည်နယ် အထက်လွှတ်တော်အမတ် Mikulski ၏ စာတွင် ရေးထားသည်။ “သူ၏ ရှေ့နေနှင့် အဆက်အသွယ် ရစဉ်က ကိုညီညီအောင်သည် စစ်ကြောရေး ကာလအတွင်း နှိပ်စက်ခံခဲ့ရကြောင်း ထုတ်ဖော် ပြောပြခဲ့သည်” ဟု ဆိုသည်။
ကိုညီညီအောင်အား ထိန်းသိမ်းထားသဖြင့် အပြင်းထန်ဆုံးသော အသုံးအနှုန်းများ အသုံးပြုပြီး ကန့်ကွက်ရန်၊ နိုင်ငံခြားရေး ဝန်ကြီးဌာနက သူ၏ လွတ်မြောက်ရေးအတွက် အစွမ်းကုန် လုပ်ဆောင်ရန် စာတွင် တိုက်တွန်းထားသည်။
ကိုညီညီအောင်သည် စက်တင်ဘာလက ရန်ကုန်လေဆိပ်တွင် ထိန်းသိမ်းခံခဲ့ခြင်းဖြစ်သည်။ ယခုအခါ အာဏာပိုင်တို့က သူ့ကို လိမ်လည်မှု၊ စာရွက် စာတမ်း အတု ပြုလုပ်မှု၊ နိုင်ငံခြားငွေ တရားမ၀င် လက်ဝယ်ထားရှိမှု တို့ဖြင့် တရားစွဲဆိုထားသည်။ စတင် ဖမ်းဆီးစဉ်ကမူ ရန်ကုန်မှ ဗုံးပေါက်ကွဲမှုများနှင့် ပတ်သက်သူအဖြစ် အာဏာပိုင်တို့က ကြေညာခဲ့သည်။
ဤအတောအတွင်း အမေရိကန် နိုင်ငံခြားရေး ဝန်ကြီးဌာနက ကိုညီညီအောင် ထိန်းသိမ်းခံနေရမှုနှင့် ပတ်သက်ပြီး စိုးရိမ်ပူပန်ကြောင်း ပြောကြားလိုက်သည်။
“သူ့ဆီကို (ရန်ကုန်) ကောင်စစ်ဝန်ရုံးက သွားရောက်ခွင့် ရဖို့အတွက် အလေးထား ဆောင်ရွက်နေပါတယ်။ ဒီဇင်ဘာ ၃ ရက်နေ့တုန်းကတော့ သူ့ဆီကို ကောင်စစ်ဝန်ရုံးက သွားတွေ့ပြီးပါပြီ” ဟု နိုင်ငံခြားရေး ဝန်ကြီးဌာန ပြောခွင့်ရ ပုဂ္ဂိုလ် Ian Kelly က ပြောသည်။
“ဒီဇင်ဘာ ၁၁ ရက်နေ့မှာ တရားရုံး ရုံးချိန်း ရှိပေမယ့် သူ့ကျန်းမာရေးကြောင့် ရက်ရွှေ့လိုက်ရတယ်လို့ မြန်မာအာဏာပိုင်တွေက ပြောပါတယ်” ဟု သူက ရှင်းပြသည်။
ပြီးခဲ့သည့်အပတ်ကလည်း အထက်လွှတ်တော်အမတ် တဦးဖြစ်သူ Jim Webb က အင်းစိန်ထောင်ရှိ ကိုညီညီအောင်၏ အခြေအနေနှင့် ပတ်သက်ပြီး စိုးရိမ်မိကြောင်း ထုတ်ပြန် ကြေညာခဲ့သည်။ ဥပဒေအရ ပြဌာန်းထားသည့် ရပိုင်ခွင့်များကို ကိုကျော်ဇော်လွင် ရရှိရေးအတွက် တောင်းဆိုကြောင်းလည်း အထက်လွှတ်တော်အမတ် Jim Webb က ပြောကြားလိုက်သည်။
| < Prev | Next > |
|---|
