SSC ဆေးခန်း တာဝန်ရှိသူများက ယခုလဆန်းပိုင်းတွင် လူနာရှင်၏ မိသားစုထံ သွားရောက်ပြီး လျော်ကြေးပေးခဲ့ကြောင်း ဧရာဝတီက စုံစမ်း သိရှိရသည်။
“ကျနော်တို့ ဂျာနယ်တင် မကဘူး၊ ဂျာနယ် အားလုံး လိုလိုကို ခွင့်မပြုတာပါ၊ အဲဒါတင် မကဘူး၊ မခိုင်ရွှန်းလဲ့ရည်လို အဖြစ်အပျက်မျိုး သတင်းတွေကိုလည်း စာပေစိစစ်ရေးက လုံးဝ ခွင့်မပြုတော့ဘူး” ဟု သတင်းဂျာနယ်တစောင်မှ အယ်ဒီတာတဦးက ပြောသည်။
စာနယ်ဇင်းများ ပုံနှိပ်ခြင်း မပြုမီ စစ်ဆေးသည့် စာပေစိစစ်ရေးဌာနက ထိုသတင်း ပိတ်ပင်ရသည့် အကြောင်းရင်းကို ရှင်းပြခြင်း မရှိပေ။
“ကျမတို့က ၀န်ထမ်းတွေပါ၊ အထက်က ချပေးတဲ့ မူအတိုင်း လုပ်နေရတာ ဆိုတော့ ကိုယ့်သဘောနဲ့ကိုယ် ခွင့်ပြုလို့ မရသလို၊
ကိုယ့်သဘောနဲ့ကိုယ် ပိတ်တာမျိုးလည်း လုပ်လို့မရပါဘူး” ဟု စာစစ်မှူးတဦးက ပြောသည်။
အသက် ၁၅ နှစ် အရွယ် အထက်တန်းကျောင်းသူ မခိုင်ရွှန်းလဲ့ရည်သည် အောက်တိုဘာလက ရွှေဂုံတိုင်ရှိ အထူးကု ဆေးခန်းတွင် ကုသမှု ခံယူစဉ် သေဆုံးသွားခဲ့သည်။ စာနယ်ဇင်းများတွင် ထိုသတင်းကို ကျယ်ကျယ်ပြန့်ပြန့် ရေးသား ဖော်ပြကြပြီး နောက်တွင် မြန်မာနိုင်ငံ ဆေးကောင်စီက ထိုအမှုကို စုံစမ်း စစ်ဆေးခဲ့သည်။ ထို့နောက် ကုသမှုတွင် တာဝန်ရှိသည်ဟု ဆိုသည့် ဆရာဝန်ကြီးကို ဆေးကုသခွင့် ၅ နှစ် ပိတ်ပင်လိုက်သည်။ SSC ဆေးခန်းကိုလည်း ပြင်းထန်စွာ သတိပေးလိုက်သည်။ ထိုသို့ သတိပေးပြီး နောက်ပိုင်းတွင် ဆေးခန်းက လူနာရှင်ကို လျော်ကြေးငွေ ပေးအပ်ခဲ့ခြင်း ဖြစ်သည်။
ဤအတောအတွင်း ဆေးရုံများ၊ အထူးကု ဆေးခန်းများနှင့် ပတ်သက်သည့် တိုင်ကြားချက်များသည် စာနယ်ဇင်းသမားများသို့ ရောက်ရှိနေသည်ဟု သိရသည်။ လူနာရှင်များထံမှ ရောက်လာသည့် စာများထဲတွင် အထူးကုဆေးခန်းများတွင် ကုသစရိတ် အလွန်များပြားမှု၊ လူနာသေဆုံးသည့်အခါ ကုသစရိတ်အားလုံး ရသည့်အချိန်အထိ ရုပ်အလောင်းကို ထိန်းသိမ်းထားမှု စသည့် အကြောင်းအရာများလည်း ပါဝင်သည်။
မခိုင်ရွှန်းလဲ့ရည် သေဆုံးမှု နှင့် နောက်ဆက်တွဲ သတင်းများကို စာဖတ်ပရိသတ်များက အလွန်စိတ်ဝင်စားနေကြဆဲ ဖြစ်သည်။
မခိုင်ရွှန်းလဲ့ရည်၏ မိသားစုဝင်တဦးက ဂျာနယ်များတွင် ထိုသတင်းကို ဖော်ပြကြသည့် အတွက် ကျေးဇူးတင်ကြောင်း၊ အလားတူ အဖြစ်အပျက်များ ထပ်မံ ပေါ်ပေါက်ခြင်း မရှိရန် စာနယ်ဇင်းများသို့ ဖွင့်ပြောခဲ့ရခြင်း ဖြစ်ကြောင်း ရှင်းပြသည်။
သန်းထိုက်ဦးနှင့် ကြည်ဝေတို့ ပူးတွဲ ရေးသားသည်။
< Prev | Next > |
---|