ကိုညီညီညီအောင်ကို နိုင်ငံသား စိစစ်ရေး ကတ်ပြားအတု ကိုင်ဆောင်မှု ပုဒ်မ (၄၆၈)၊ နိုင်ငံခြားငွေ တရားမဝင် လက်ဝယ် ထားရှိသည့် ပုဒ်မ (၂၄/၁)၊ မြန်မာနိုင်ငံ အတွင်း နေထိုင်သူများ မှတ်ပုံတင်ရေး အက်ဥပဒေ ပုဒ်မ ၆ (၃) တို့ဖြင့် တရားစွဲဆိုခဲ့ခြင်း ဖြစ်သည်။ဦးဉာဏ်ဝင်းက “ပုဒ်မ (၄၆၈) အတွက် ၃ နှစ် ချပါတယ်၊ ပုဒ်မ(၂၄/၁) က ၁ နှစ်၊ နောက် ပုဒ်မ၊ အားလုံးပေါင်း ၅ နှစ်ပါ၊ ဒါပေမယ့် ဒါတွေကို တပေါင်းတည်း ကျခံဖို့ အမိန့်မှာပါတဲ့ အတွက် ၃ နှစ်ကျခံ ရမှာပါ၊ တွေ့ရှိတဲ့ သုံးသပ်ချက်ပေါ်မှာ ကျနော်တို့ အယူခံ တက်ဦးမယ်” ဟု ဧရာဝတီသို့ ပြောသည်။
ပုဒ်မ(၄၆၈)အတွက် ၇ နှစ်၊ ပုဒ်မ (၂၄/၁)အတွက် ၃ နှစ်နှင့် ပုဒ်မ ၆(၃)က အတွက် ၂ နှစ်အထိ ပြစ်ဒဏ်ချမှတ်နိုင်ကြောင်းလည်း ၎င်းက ဆက်လက်ပြောဆိုသည်။
ကိုညီညီအောင်၏ အဒေါ်ဖြစ်သူ ဒေါ်ခင်ခင်ဆွေက“ချုပ်ရက် ၅လ နုတ်လိုက်ရင်တော့ ၂ နှစ်နဲ့ ၇ လ ကျန်တာပေါ့၊ အန်တီတို့က ဘာမှလုပ်လို့ မရဘူး၊ ဒါကြောင့်လည်း အယူခံတင်မှာပါ၊ နောက်အပတ်ဆို စလုပ်တော့မယ် အယူခံတင်ဖို့ပေါ့၊ ဒီနေ့လည်း တွေ့ခွင့်မရဘူး၊ သူ့ကို ပါဆယ်ယူဖို့ ရှေ့နေတွေက တဆင့်ပြောခိုင်းထားတယ်၊ အခု ပါဆယ်သွားပေးမလို့”ဟု ပြောသည်။
ကိုညီညီအောင်အပေါ် ချမှတ်သော ပြစ်ဒဏ်သည် မှားယွင်းစွာစွပ်စွဲ၍ ချမှတ်ခြင်း ဖြစ်ပြီး အမေရိကန် မြန်မာ ဆက်ဆံရေး၏ ပထမဦးစားပေး အဖြစ် ကိုညီညီအောင် လွတ်မြောက်ရေးကို ဆောင်ရွက်ပေးရန် အမေရိကန် သမ္မတ အိုဘားမားနှင့် နိုင်ငံခြားရေး ၀န်ကြီး ဟီလာရီ ကလင်တန်တို့ကို အမေရိကန်အခြေစိုက် Freedom Now အဖွဲ့က ကြေညာချက်ထုတ်ပြန်၍ ယနေ့ တောင်းဆို လိုက်သည်။
အမေရိကန်နိုင်ငံ မေရီလန်းပြည်နယ်တွင် နေထိုင်သည့် ကိုညီညီအောင်နှင့်စေ့စပ်ထားသူ မ၀ါဝါကျော်က“ဒါဟာ မှားယွင်းတဲ့ စွပ်စွဲချက်ဆိုတာ မြန်မာတွေအားလုံး သိပါတယ်၊ မြန်မာအစိုးရက အမေရိကန် နိုင်ငံသားကို မတရားထောင်ဒဏ် ချမှတ်ထား တာကို အမေရိကန်အစိုးရ အနေနဲ့ လက်မခံဖို့ဘဲ ကျမအနေနဲ့ မျှော်လင့်ရပါတော့မယ်”ဟု ယင်းထုတ်ပြန်ချက်တွင် ပါရှိသည်။
ကိုညီညီအောင်သည် ၁၉၈၈ ခုနှစ် လူထု လှုပ်ရှားမှုတွင် ပါဝင်ခဲ့ပြီး ၂ လခန့် အထိန်းသိမ်းခံရသည်။ နောက်ပိုင်းတွင် ထိုင်း နယ်စပ် သို့ရှောင်တိမ်းလာခဲ့ပြီး မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး(ABSDF)တွင် ခေတ္တ ပါဝင်ခဲ့သည်။
ထို့နောက် အမေရိကန် ပြည်ထောင်စုတွင် သွားရောက် ခိုလှုံခွင့်ယူခဲ့သည်ဟု သိရသည်။
ပြီးခဲ့သည့်နှစ် စက်တင်ဘာ ၃ ရက်နေ့ ညနေပိုင်းတွင် ကိုညီညီအောင်သည် ဘန်ကောက်မှ ရန်ကုန်မြို့သို့ သွားရောက်စဉ် မင်္ဂလာဒုံလေဆိပ်၌ ဖမ်းဆီးခံခဲ့ရခြင်းသည်။ သူ အဖမ်းခံရပြီး ၃ ပတ်အကြာ ရန်ကုန်မြို့တွင် ဗုံးပေါက်ကွဲမှုများ ဖြစ်ပေါ်ချိန်နှင့် တိုက်ဆိုင်နေရာ ထိုပေါက်ကွဲမှုများအတွက် တာဝန်ရှိသည်ဟုလည်း အစိုးရ သတင်းစာထဲတွင် စွပ်စွဲထားသည်။
ကိုညီညီအောင်သည် ၂၀၀၅ မှ ၂၀၀၉ အတွင်း လူမှုရေးဗီဇာ(Social Visa) ဖြင့် မြန်မာနိုင်ငံသို့ (၈) ကြိမ် ပြန်ခဲ့ကြောင်းလည်း သတင်းစာတွင် ရေးထားသည်။
ကိုညီညီအောင်၏ မိခင်အပါအဝင် မိသားစုဝင် ၅ ဦးသည် နိုင်ငံရေးလှုပ်ရှားမှုဖြင့် နှစ်ရှည်ထောင်ဒဏ် ချမှတ်ခံထားရသည်။
မြန်မာနိုင်ငံတွင် စစ်အစိုးရက ဖမ်းဆီးထားသော နိုင်ငံရေးအကျဉ်းသားပေါင်း ၂၁၉၅ ဦးရှိကြောင်း ထိုင်းနိုင်ငံအခြေစိုက် နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) စာရင်းအရ သိရသည်။
| < Prev | Next > |
|---|
