အင်းစိန် အကျဉ်းထောင်သို့ ယနေ့ ထောင်ဝင်စာ သွားရောက် တွေ့ဆုံစဉ် ထိုသို့ တရားစွဲထားသည်ကို သိရှိခဲ့ရခြင်း ဖြစ်ကြောင်း မိခင်ဖြစ်သူ ဒေါ်ရီရီတင့်က ဧရာဝတီသို့ ပြောသည်။
တရားမ၀င် အဖွဲ့အစည်းနှင့် ဆက်သွယ်မှု ပုဒ်မ ၁၇/၁ သည် ပြစ်မှု ထင်ရှားပါက ထောင်ဒဏ် ၃ နှစ် အထိ ကျခံရနိုင်ကြောင်း သိရသည်။
ဧပြီ ၁၅ ရက်နေ့က ရန်ကုန်မြို့ရှိ X2O သင်္ကြန်မဏ္ဍပ် ဗုံးပေါက်ကွဲမှုအပြီး ဓာတ်ပုံရိုက်နေသော ကိုစည်သူဇေယျကို အာဏာပိုင်တို့က ဖမ်းဆီးခဲ့ပြီး နောက်တနေ့တွင် သူ၏ ဖခင်ဖြစ်သူ ဦးဇေယျကို နေအိမ်တွင် သွားရောက် ဖမ်းဆီး လိုက်သည်။ ဖမ်းဆီးရသည့် အကြောင်းရင်းကို အာဏာပိုင်တို့က ကြေညာခြင်း မရှိပေ။
ဗဟန်းမြို့နယ် ရဲစခန်းတွင် ထိန်းသိမ်းခံနေရသည့် ဦးဇေယျကို မိသားစုက တွေ့ဆုံခွင့် မရသေးဟု သိရသည်။
ဦးဇေယျကို ယခုလ ၁၇ ရက်၊ ကိုစည်သူဇေယျကို ၁၈ ရက်နေ့ တို့တွင် ရုံးထုတ်မည်ဟု သိရကြောင်း ဒေါ်ရီရီတင့်က ပြောသည်။
ဦးဇေယျနှင့် စည်သူဇေယျတို့သည် ကွယ်လွန်သူ စာရေးဆရာ လင်းယုန်မောင်မောင်၏ သားနှင့် မြေးတော်စပ်သည်။
ကြာသပတေးနေ့က ပြုလုပ်သည့် သင်္ကြန်ဗုံးပေါက်ကွဲမှု ဆိုင်ရာ သတင်းစာ ရှင်းလင်းပွဲတွင် ရဲချုပ် ဗိုလ်မှူးချုပ် ခင်ရီက ဦးဇေယျတို့ သားအဖကို စစ်ဆေး မေးမြန်းနေဆဲ ဖြစ်ကြောင်း ပြောဆိုခဲ့သည်။
X2O မဏ္ဍပ်တွင် ဗုံးပေါက်ကွဲမှု ၃ ခု ဖြစ်ပွားခဲ့ရာ စုစုပေါင်း ၁၀ ဦး သေဆုံးပြီး ၁၇၀ ဒဏ်ရာရကြောင်း စစ်အစိုးရက သတင်း ထုတ်ပြန်ထားသည်။
| < Prev | Next > |
|---|
