၈၈ မျိုးဆက်ကျောင်းသားများဖြစ်သော ကိုသိန်းသန်းထွန်းနှင့် ၁၃ ဦးအား ရုံးထုတ်စစ်ဆေးရာသို့ သွားရောက်သည့် ၎င်းတို့၏ ရှေ့နေ ဦးကျော်ဟိုးကို အာဏာပိုင်များက တရားရုံးတွင်းသို့ ၀င်ခွင့်မပေးခြင်းဖြစ်သည်ဟု အဆိုပါ ရှေ့နေနှင့် နီးစပ်သူ တဦးက ပြောသည်။
“ဦးကျော်ဟိုးက သူ့ကို ဘာလို့ဝင်ခွင့်မပေးရတာလဲလို့ ထောင်အာဏာပိုင်တွေကို မေးတော့ ထောင်အာဏာပိုင်က သူတို့ လည်း မသိဘူးတဲ့၊ အထက်အမိန့်အရ လုပ်ရတာလို့ပြောတယ်”ဟု ၎င်းက ဆိုသည်။
နိုင်ငံရေးလှုပ်ရှားသူများ၏ အကျိုးဆောင်ရှေ့နေများဖြစ်သော ဦးအောင်သိန်းနှင့် ၎င်းတို့ကိုလည်း လှိုင်မြို့နယ် တရားရုံးတွင် တရားရင်ဆိုင်နေရသူများ၏ ရှေ့နေပါဝါရုပ်သိမ်းမှုနှင့် ပတ်သက်ပြီး တရားရုံးကို မထေမဲ့မြင်ပြု လုပ်မှု ပုဒ်မ ၃ ဖြင့် အာဏာ ပိုင်များက တရားစွဲဆိုခြင်း ခံထားရသည်ဟု ရှေ့နေ ဦးခင်မောင်ရှိန် က ပြောပြသည်။
“ကျနော်တို့ကို လှိုင်မြို့နယ် တရားရုံးကိစ္စနဲ့ ပတ်သက်ပြီး တရားရုံးချုပ်က စွဲတာ၊ မနက်ဖြန် လျှောက်လွှဲချက် သွားပေး ရမယ်”ဟု ဦးခင်မောင်ရှိန်က ပြောသည်။
စစ်အာဏာပိုင်များက ဖမ်းဆီးထားသည့် ဒီမိုကရေစီရေးလှုပ်ရှားသူများ၏ အမှုများကို လိုက်ပါအကျိုးဆောင်ပေး နေသော ရှေ့နေများအား ယင်းသို့ ဖိအားပေးအကျပ်ကိုင်မှုများပြုလုပ်လျှက်ရှိရာ လွန်ခဲ့သည့် အောက်တိုဘာ လ ကုန်ပိုင်းတွင် ရှေ့နေ ကိုညီညီထွေးကို ဖမ်းဆီးအရေးယူ၍ ထောင်ဒဏ် ချမှတ်မှုပြုလုပ်ခဲ့သည်။
ရှေ့နေ ကိုညီညီထွေးကို ၎င်း၏အမှုသည်များဖြစ်သော လှိုင်သာယာမြို့နယ် အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) အဖွဲ့ဝင် ကိုဝေလွင်မျိုး၊ ကိုအောင်မင်းနိုင်၊ ကိုရန်နိုင်ထွန်းတို့နှင့်အတူ တရားရုံးအား အနှောင့် အယှက်ပေးသည့် ပုဒ်မ ၂၂၈ ဖြင့် မြောက်ပိုင်းခရိုင် တရားရုံးက လွန်ခဲ့သော အောက်တိုဘာ ၃၀ ရက်တွင် ထောင်ဒဏ် ၆ လစီ ချမှတ်ခဲ့ခြင်းဖြစ်သည်။
ကိုညီညီထွေးသည် ၂၀၀၇ ခု ဇွန်လ ၁၉ ရက်က မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည် လွတ်မြောက်ရေး လှုပ်ရှားမှုပြုလုပ်သည့်အတွက် အဖမ်းဆီးခံရသော လှိုင်သာယာမြို့နယ် အန်အယ်လ်ဒီ အဖွဲ့ဝင် ၁၁ ဦး၏ အမှုကို လိုက်ပါ အကျိုးဆောင်ပေးနေစဉ် ဤကဲ့သို့ ဖမ်းဆီး အရေးယူခံရခြင်းဖြစ်သည်။
“ဒီလို နိုင်ငံရေးလှုပ်ရှားသူတွေရဲ့အမှုလိုက် ရှေ့နေတွေကို ပိုပြီး တားဆီးပိတ်ပင်မှုတွေလုပ်လာလေ မမျှတတဲ့ တရားစီရင် ရေးစနစ်က ပိုပြီးထင်ရှားလာလေဖြစ်မှာပါပဲ”ဟု နိုင်ငံရေး အကျဉ်းသားဟောင်း တဦးက ဝေဖန်ပြောဆိုသည်။
| < Prev | Next > |
|---|
