ကြံ့ဖွံ့ပါတီ၏ လွှတ်တော်ကိုယ်စားလှယ် လောင်းများကိုသာ မဲပေးကြရန်ဟူသော ဦးသိန်းစိန်၏ ညွှန်ကြားချက်ကို ၀န်ကြီး ဌာနများနှင့် တက္ကသိုလ်ကောလိပ်များသို့ ဖြန့်ဝေပြီး သက်ဆိုင်ရာ ဌာန အကြီးအကဲများ၊ ပါမောက္ခချုပ်များက ၎င်းတို့၏ ၀န်ထမ်းများ၊ ဆရာ၊ ဆရာမများနှင့် ကျောင်းသား ကျောင်းသူများကို ဖတ်ကြားစေခဲ့ကြောင်း သိရသည်။သြဂုတ်လ ၃၁ ရက်နေ့က နေပြည်တော်ရှိ အစိုးရ၀န်ကြီးဌာနများ၊ သစ်တောတက္ကသိုလ်၊ စိုက်ပျိုးရေးတက္ကသိုလ် အပါအ၀င် တက္ကသိုလ်တချို့တွင် ကြံ့ဖွံ့ပါတီခေါင်းဆောင် ဦးသိန်းစိန်က ၎င်းပါတီမဲပေးရေး ညွှန်ကြားချက်မိန့်ခွန်းများ၊ ရှင်းလင်းပြောကြား ပွဲများ ပြုလုပ်ခဲ့သည်ဟု နေပြည်တော်ဝန်ထမ်းအသိုင်းအ၀န်းမှ သတင်းရရှိသည်။
“ပြည်ခိုင်ဖြိုးကိုပဲ မဲပေးဖို့၊ မဲပေးမမှားကြဖို့နဲ့ တိုင်းပြည်အေးချမ်း တည်ငြိမ်ရေးကို ပြည်ခိုင်ဖြိုး ပါတီကပဲ လုပ်ဆောင်နိုင်တယ် ဆိုတဲ့ ၀န်ကြီးချုပ်မိန့်ခွန်းကို ညွှန်ချုပ်က ဖတ်ပြတယ်” ဟု နေပြည်တော်ရှိ ၀န်ထမ်းတဦးက ပြောသည်။
နေပြည်တော်အပြင် နိုင်ငံတ၀န်းရှိ အစိုးရ ၀န်ကြီးဌာနရုံးများနှင့် တက္ကသိုလ်ကောလိပ် များတွင်လည်း ကြံ့ဖွံ့ပါတီမဲပေးရေး ၀န်ကြီးချုပ် မိန့်ခွန်းနှင့် ရှင်းလင်းပွဲများ ယခုလအတွင်း ဆက်တိုက် ပြုလုပ်သွားမည်ဟု သိရှိရသည်။
ဦးသိန်းစိန်၏ မိန့်ခွန်းတွင် အစိုးရ၀န်ထမ်းများသည် သက်ဆိုင်ရာမိမိတို့၏ အသိုင်းအ၀န်းကိုလည်း ကြံ့ဖွံ့ပါတီမဲပေးရေးအတွက် တိုက်တွန်းသင့်သည်ဆိုသော မေတ္တာရပ်ခံချက်ကို ထည့်သွင်းပြောကြား ထားသည်။
တပ်မတော် တပ်ရင်း၊ တပ်ခွဲများတွင်လည်း ကြံ့ဖွံ့ပါတီမဲပေးရေး စည်းရုံး လှုပ်ရှားမှုများ ရှိနေပြီဖြစ်ကြောင်း သိရှိရသည်။
ရန်ကုန်အခြေစိုက် ကြံ့ဖွံ့ပါတီ မြို့နယ်ဥက္ကဋ္ဌ တဦးကမူ ကြံ့ဖွံ့ပါတီသည် တပ်မတော်သားများနှင့် မိသားစုများထံမှ ကြိုတင်မဲ အရေအတွက် သန်းပေါင်းများစွာ ရရှိမည်ဟု ခန့်မှန်းသည်။
ဒီမိုကရက်တစ် ပါတီ (မြန်မာ) ၏ ဥက္ကဋ္ဌ ဦးသုဝေက ကြိုတင်မဲနှင့် ပတ်သက်ပြီး ပြည်ထောင်စု ရွေးကောက်ပွဲကော်မရှင်ထံ မေးမြန်းစုံစမ်းရာ မကျန်းမာသူနှင့် ခရီးထွက်မည့်သူများကိုသာ ကြိုတင်ဆန္ဒမဲပေးခွင့် ပြုသည်ဟု အကြောင်းပြန် ဖြေကြားကြောင်း ပြောပြသည်။
ကြိုတင်ဆန္ဒမဲဆိုသော မဲပြားသည် ကြံ့ဖွံ့ပါတီ ရွေးကောက်ပွဲ အနိုင်ရရှိရန် ဆောင်ရွက်ပေးမည့် လျှို့ဝှက်ချက်ဖြစ်ကြောင်း နိုင်ငံရေးပါတီတခုမှ တာဝန်ရှိသူတဦးက ပြောသည်။
“ပါတီတခုရဲ့ လွှတ်တော် ကိုယ်စားလှယ်လောင်းတဦး ကို ကြိုတင်မဲ ဘယ်လောက်ပေးထားတယ်ဆိုတာ ရွေးကောက်ပွဲလုပ်တဲ့ နေ့ကျ သက်ဆိုင်ရာ မဲရုံကို သွားကြည့်မှ တရားဝင်သိရမှာ။ ရွေးကောက်ပွဲ မတိုင်ခင် အချိန်မှာတော့ ဘယ်လွှတ်တော် ကိုယ်စားလှယ် လောင်းက ကြိုတင်မဲဘယ်လောက် ရထားတယ် ဆိုတာ ဘယ်လိုမှ မသိနိုင်ဘူး” ဟု ၎င်းက ဆိုသည်။
စစ်အစိုးရက ရွေးကောက်ပွဲကို လာမည့် နိုဝင်ဘာလ ၇ ရက်နေ့တွင် ကျင်းပမည်ဟု တရားဝင် ကြေညာထားသည်။
| < Prev | Next > |
|---|
