ကိုရင်ငယ်များနှင့် သီလရှင်ငယ်များကို အောက်တိုဘာလ ၁၉ ရက်နေ့ ရန်ကုန်လေဆိပ်အရောက်တွင် သာသနာရေး ၀န်ကြီး ဌာနမှ အရာရှိများက ခေါ်ဆောင်သွားခဲ့ပြီး ယမန်နေ့ကမှ ပြန်လွှတ်ပေးခဲ့သည်ဟု သိရသည်။သီရိလင်္ကာမှ ပြန်ရောက်လာသည့် ကိုရင်ငယ်များထဲတွင် ပဲခူးတိုင်း က၀ မြို့နယ် ရွှေပေါက်ပင်ကျေးရွာ ဘုန်းတော်ကြီးသင် ပညာရေးကျောင်းမှ ၄ ပါး ပါဝင်ခဲ့ကြောင်း ယင်းကျောင်းတိုက် ဆရာတော် အရှင်ဝိစိတ္တက မိန့်ကြားသည်။
ဆရာတော် အရှင်ဝိစိတ္တက“မနေ့က သူတို့မိဘတွေ နေထိုင်ရာကို ပြန်ပို့ပေးလိုက်တယ်လို့ ဦးပဉ္ဇင်းတို့ သိရတယ်။ သူတို့ကို သတင်းထောက်တွေက မေးမြန်း ချဲ့ကား ရေးသားမှာစိုးလို့ ကလေးဝတောရကျောင်းကို ခေါ်ထားတာလို့ ကိုရင်တွေကို သူတို့ က ပြောသတဲ့”ဟု ဧရာဝတီသို့ မိန့်သည်။
ပြည်တွင်းမှ သတင်းထောက်တဦးကလည်း“အဲဒီသတင်းရထားလို့ လေဆိပ်မှာ သွားစောင့်ပါတယ်။ ကလေးတွေကို သာသနာရေး က လူတွေက အတင်းခေါ်ထုတ်သွားတယ်။ သူတို့ မဟုတ်တာလုပ်ထားတော့ ပေါ်ကုန်မှာစိုးလို့ပေါ့။ ကလေးတွေ ခေါ်သွားတုန်းက သာသနာရေး၊ ပြည်ထဲရေးဝန်ကြီးဌာနတွေရဲ့ ခွင့်ပြုချက်နဲ့ ခေါ်သွားတာလေ။ ဒါဟာ တကယ်ဆိုရင် အစိုးရ၀န်ကြီးဌာနတွေ ကိုယ်တိုင် ပါဝင်ပတ်သက်ထားတဲ့ ခေတ်သစ်လူကုန်ကူးမှု တရပ်ပါပဲ”ဟု ဝေဖန်ပြောဆိုသည်။
ကိုရင်နှင့် သီလရှင်ငယ်များကို ကြိုဆိုရန် ရောက်ရှိနေခဲ့သည့် မိဘများ၊ အုပ်ထိန်းသူ သံဃာတော်များကိုလည်း လေဆိပ် စားသောက်ဆိုင်တွင် သီတဂူအဖွဲ့က ကျွေးမွေးဧည့်ခံခဲ့ကြောင်း၊ လေယာဉ် ဆိုက်ရောက်လာချိန်တွင် သာသနာရေးဝန်ကြီးဌာန၊ သာသနာတော် ထွန်းကား ပြန့်ပွားရေးမှ အရာရှိများက မင်္ဂလာဒုံလေဆိပ် VIP တံခါးပေါက်မှ ခေါ်ထုတ်သွားကာ နာဂလှိုဏ်ဂူ ကလေးဝတောရကျောင်းသို့ ပို့လိုက်သဖြင့် ဆွမ်းပင် မကပ်လိုက်နိုင်ကြောင်း သီတဂူ အင်တာနက်စာမျက်နှာတွင် ဖော်ပြထားသည်။
သီရိလင်္ကာရဟန်းတော် ဒေါက်တာ စန္ဒိမာသည့် နာဂစ်မုန်တိုင်း တိုက်ခတ်ပြီးနောက် မြန်မာနိုင်ငံသို့ ရောက်ရှိလာပြီး ကယ်ဆယ်ရေး လုပ်ငန်းများ လုပ်ဆောင်ခဲ့ကာ မြန်မာကလေးငယ် ၁၀၀ ကျော်ကို သီရိလင်္ကာနိုင်ငံတွင် ပညာသင်ကြားပေးမည်ဟုဆိုကာ ခေါ်ဆောင်သွားခဲ့ခြင်းဖြစ်သည်။
ကလေးများ သီရိလင်္ကာနိုင်ငံသို့ ရောက်ရှိချိန်တွင် နာဂစ်မိဘမဲ့ကလေးများဟု သုံးနှုန်းကာ ထိုင်ဝမ်ရှိ ဒကာများထံမှ အလှူငွေများ လက်ခံခဲ့ကြောင်း၊ အမှန်တွင် ကလေးများမှာ မြန်မာနိုင်ငံတ၀န်းလုံးမှ ခေါ်ယူထားသော ကလေးများဖြစ်ပြီး မိဘမဲ့များလည်း မဟုတ်ကြောင်း သီတဂူ အင်တာနက်စာမျက်နှာတွင် ဖော်ပြထားသည်။
ကလေးများ နေထိုင် ပညာသင်ကြားရေး အဆင်ပြေရန် စီစဉ်ပေးခြင်းမရှိ၍ အကူအညီတောင်းသည့် သတင်းများအရ သီတဂူဆရာတော်က ဦးဆောင်ကာ ပြန်လည်ခေါ်ယူခြင်းဖြစ်သည်။
နောက်တသုတ် ပြန်လာကြဦးမည့် ကလေးများအားလုံးအတွက် ဒေါက်တာ စန္ဒိမာက အပြန်လေယာဉ်ခရီးစရိတ် ထောက်ပံ့ ပေးလှူပါမည်ဟု သီတဂူဆရာတော်အား အောက်တိုဘာ ၁၅ ရက်နေ့က ဖက်စ်ဖြင့် လျှောက်ထားခဲ့ကြောင်းလည်း သိရှိရသည်။
| < Prev | Next > |
|---|
