ကျင့်ဝတ်သိက္ခာနှင့်ညီညွတ်ပြီး လူ့အခွင့်အရေး ချိုးဖောက်မှုများ၊ သဘာဝပတ်ဝန်းကျင် ထိခိုက်မှုများ မရှိစေသော ခရီးသွားလုပ်ငန်းကို ကြိုဆိုကြောင်း အမျိုးသား ဒီမိုကရေစီအဖွဲ့ချုပ် (NLD) ကထုတ်ပြန်သော ကြေညာချက်၌ ဖော်ပြထားသည်။
“NLD အနေဖြင့် သာမန်ပြည်သူများ၏ သက်သာချောင်ချိရေးကို မြှင့်တင်လျက် ပတ်ဝန်းကျင် ထိန်းသိမ်းရေးကို အားပေးပြီး တိုင်းပြည်၏ ယဉ်ကျေးမှု၊ နိုင်ငံရေး လူမှုဘ၀တို့ကို ရှုမြင်နားလည်သည့် ပျော်ရွင်ချမ်းမြေ့ဖွယ်ရာ အပန်းဖြေ နေ့ရက်များကို ဖြတ်သန်းလိုသော ခရီးသွားများကို ကြိုဆိုသည်” ဟု မေလ ၂၀ ရက်နေ့ ရက်စွဲဖြင့် ထုတ်ပြန်ထားသည်။
NLD သည် မြန်မာ့ခရီးသွားနှစ် ၁၉၉၆ ခုနှစ်ကို သပိတ်မှောက်၍ ပြည်ပခရီးသွားများ မြန်မာနိုင်ငံသို့ လာရောက် လည်ပတ်ခြင်း မပြုရန် တိုက်တွန်းထားခဲ့ပြီး ၁၅ နှစ်အကြာတွင် ယခုကဲ့သို့ ကြေညာချက် ထုတ်လိုက်ခြင်း ဖြစ်သည်။
ထိုအချိန်က NLD အနေဖြင့် သပိတ်မှောက်ခဲ့ရခြင်းမှာ ပြည်တွင်း၌ လူ့အခွင့်အရေး ချိုးဖောက်မှုများရှိနေသည့် အပြင်၊ စစ်အစိုးရနှင့် ၎င်းတို့၏ နီးစပ်သူများသာ ခရီးသွားလုပ်ငန်းမှ အကောင်းဆုံး လုပ်ကွက်များကို လက်ဝါးကြီးအုပ် ချယ်လှယ်မှုများ ရှိနေသည်ကို နိုင်ငံတကာမှ အာရုံစိုက်လာစေရန် ဖြစ်သည်ဟု သိရသည်။
ယခင် စစ်အစိုးရခေါင်းဆောင်များက NLDသည် အနောက်နိုင်ငံများ၏ စီးပွားရေးပိတ်ဆို့မှုကို ထောက်ခံသည့် အနေဖြင့် ခရီးသွား လုပ်ငန်းကို သပိတ်မှောက်ခြင်းကြောင့် ပြည်သူတို့၏ လူနေမှုဘ၀ နိမ့်ကျရသည်ဟု ဝေဖန်ခဲ့သည်။
၂၀၁၀ ရွေးကောက်ပွဲအပြီးတွင် NLD ခေါင်းဆောင် တဦးဖြစ်သူ ဦးဝင်းတင်က မြန်မာ့ခရီးသွားလုပ်ငန်းနှင့် ပတ်သက်၍ အစိုးရစီစဉ်ပေးသော အုပ်စုလိုက် လာရောက်မှု (Package Tour) ထက် တဦးချင်း ခရီးသွားများကို ကြိုဆိုကြောင်း ပြောဆိုခဲ့ပြီး ဒေါ်အောင်ဆန်းစုကြည်ကလည်း ကျင့်ဝတ်နှင့်ညီသော (Responsible Tourism) ခရီးသွားလုပ်ငန်းကို လိုလားကြောင်း ပြောဆိုခဲ့သည်။
ခရီးသွားလုပ်ငန်းများအား ကြိုဆိုသော်လည်း ခရီးသွားများ လာရောက်ခြင်းကြောင့် ဖိနှိပ်မှုများ၊ မတော် မတရားမှုများကို နိုင်ငံရေးဆောင်ရွက်ချက်နှင့်သာ တားဆီး လုပ်ဆောင်နိုင်သည်ဟု NLD ကြေညာချက်က ဆိုသည်။
“အသိအမြင်တိမ်ပြီး အရေအတွက် များပြားလှသည့် ခရီးသွားတို့ကြောင့် ဒေသခံတို့၏ ဓလေ့ထုံးစံ၊ ယဉ်ကျေးမှုနှင့် လူမှုကျင့်ဝတ်များ အခြေခံမှအစ တဖြည်းဖြည်း ပျက်စီးစေနိုင်သည်” ဟုလည်း NLD ကြေညာချက်၌ ပါရှိသည်။
မြန်မာနိုင်ငံသည် ခရီးသွားလုပ်ငန်း၏ အကျိုးအမြတ်ကိုသာ အာရုံစိုက်ခဲ့သည့်အတွက် လူမှုပတ်ဝန်းကျင်တခုလုံး အတိ ဒုက္ခရောက်ခဲ့ရခြင်းများ ရှိကြောင်း၊ ဟိုတယ်နှင့်ခရီးသွား အထောက်အကူပြု လုပ်ငန်းများ တည်ဆောက်ရန် ဒေသခံ ပြည်သူလူထုတို့မှာ နေရာပြောင်းရွှေ့ခံရခြင်း၊ နစ်နာကြေ မရခြင်း၊ အိုးမဲ့ အိမ်မဲ့ ဖြစ်သွားရခြင်း တို့အပြင် ဒေသခံတို့၏ အသက်မွေး လုပ်ငန်းများကိုပါ ထိခိုက်စေခဲ့ကြောင်း ကြေညာချက်၌ ထောက်ပြထားသည်။
တချို့သော စီမံကိန်းများတွင် အဓမ္မ လုပ်အားပေး ခိုင်းစေခံရခြင်း၊ လူ့အခွင့်အရေး ချိုးဖောက်ခံရခြင်း စသည်ဖြင့် ထပ်ဆင့် အနိုင်ကျင့်ခံနေရကြောင်း၊ လိင်ပိုင်းဆိုင်ရာ အမြတ်ထုတ်ခဲ့သည့် ခရီးသွားများသည် ဒေသခံများကို လက်ဆောင်ငယ်များ ပေးရုံဖြင့် နှစ်သိမ့်ခဲ့သည့် ဖြစ်ရပ်များလည်း ရှိကြောင်း NLD က ဆိုသည်။
NLD ကြေညာချက်အား ကူညီရေးသားပေးသူ ပြည်သူ့လွှတ်တော် ကိုယ်စားပြု ကော်မတီ (CRPP) အဖွဲ့ဝင် ဦးစိုးဝင်းက “အစိုးရနဲ့ အဖွဲ့အစည်းတွေက တာဝန်ယူမှုရှိရမယ်၊ ကျင့်ဝတ်ရှိရမယ်၊ ဂေဟ စနစ်ကို ထိန်းသိမ်း စောင့်ရှောက်မယ် ဆိုရင် ကျနော်တို့က ပါဝင်ကူညီဖို့ အဆင်သင့်ပါ” ဟု ဆိုသည်။
ရှေးဟောင်း ယဉ်ကျေးမှု အမွေအနှစ်များ ပေါများသော မြန်မာနိုင်ငံသည် ခရီးသွားလုပ်ငန်း၌ အရှေ့တောင် အာရှ နိုင်ငံများ နှင့် နှိုင်းယှဉ်ပါက မဖြစ်စလောက် အဆင့်မျှသာ ရှိနေကြောင်း NLD က ထောက်ပြသည်။
အိမ်နီးချင်း နိုင်ငံများဖြစ်သော ထိုင်းနိုင်ငံ၏ ခရီးသွားအရေအတွက်သည် နှစ်စဉ် ၁၄ သန်း ၀န်းကျင်ရှိပြီး ဗီယက်နမ်နိုင်ငံသည်၎ သန်းဝန်းကျင်၊ ကမ္ဘောဒီးယားနှင့် လာအိုနိုင်ငံတို့သည် နှစ်စဉ် ၂ သန်းကျော်ရှိနေကာ မြန်မာနိုင်ငံ၏ ခရီးသွားဝင်ရောက်မှုအရေအတွက်မှာ ၂၀၀၉ - ၂၀၁၀ တွင် ၂ သိန်းနီးပါးသာ ရှိကြောင်း NLD ကြေညာချက်၌ ပါရှိသည်။
| < Prev | Next > |
|---|
