ထိုင်းနိုင်ငံတောင်ပိုင်း ရနောင်းဒေသရှိ ရဲအရာရှိ Veerasilp Kwanseng ၏ အဆိုအရ ၎င်းရိုဟင်ဂျာ ၆၆ ဦးမှာ ယမန်နေ့က ထိန်းသိမ်းလိုက်သော ရိုဟင်ဂျာ ၇၈ ဦးထဲမှ ဖြစ်သည်ဟု သိရသည်။ ကျန် ၁၂ ဦးမှာ အရွယ်မရောက် သေးသည့် ကလေးငယ်များဖြစ်ပြီး ယခုအခါ ရနောင်း ရဲစခန်းတွင် ထိန်းသိမ်းထားဆဲဖြစ်သည်။
ထိုင်းနိုင်ငံတွင်း တရားမဝင် ဝင်ရောက်လာသူများ အနေနှင့် တဦးလျှင် ဘတ်ငွေ ၁၀၀၀ မှ ၂၀၀၀ အတွင်း ပေးဆောင်ကြရမည်ဖြစ်ပြီး ဒဏ်ငွေဆောင်စရာ ငွေကြေးမရှိပါက ရနောင်း ထောင်တွင်းတွင် မိခင်နိုင်ငံသို့ မပြန်နိုင်မချင်း နေကြရမည်ဖြစ်ကြောင်း ရဲအရာရှိက ဆက်ပြောသည်။
ဆက်လက်၍ ၎င်းက ဒေသခံ အာဏာပိုင်များအနေနှင့် ထိန်းသိမ်းထားသော ရိုဟင်ဂျာ ၇၈ ဦးစလုံးကို ကောင်းမွန်စွာ ဆက်ဆံခဲ့သည်ဟု ဆိုသည်။
ရိုဟင်ဂျာ ၇၈ ဦးပါလာသည့် လှေသည် စက်ပျက်ကာ ရနောင်းဒေသပိုင် ဆူရင်ကျွန်းအနားတွင် မျောနေစဉ် ယမန်နေ့က ထိုင်းရေတပ်က တွေ့ရှိခဲ့ခြင်းဖြစ်ကြောင်း ထိုင်းရေတပ်မှ တာဝန်ရှိသူတဦးဖြစ်သည့် Narong Theswisal ကပြောသည်။
လှေပေါ်ပါလာသည့် ရိုဟင်ဂျာများအားလုံးတွင် အရှိုးရာများ၊ မီးလောင်ရာများနှင့်ဖြစ်နေပြီး ၎င်းတို့ကို မြန်မာ့ရေပိုင်နက် မြိတ်ကျွန်းစုအနီးတွင် စခန်းချနေသည့် မြန်မာရေတပ်က ရိုက်နှက်လွှတ်လိုက်ခြင်း ဖြစ်ကြောင်း သိရသည်။
ထိုင်းရေတပ်က ထိန်းသိမ်းထားသော ဒဏ်ရာရ ရိုဟင်ဂျာ ၇၈ ဦးကို ရနောင်းဒေသရှိ ထိုင်းသူနာပြုများက ပြုစု ကုသပေးခဲ့ရာ ထိုအထဲမှ ၄ ဦးသည် ဒဏ်ရာပြင်းထန်သဖြင့် ဆေးရုံသို့ ပို့ထားရကြောင်း တီအန်အေက ရေးသားထားသည်။
ထိုင်းနိုင်ငံသို့ တရားမဝင် ရောက်ရှိလာသည့် ရိုဟင်ဂျာများမှာ တနေ့ထက်တနေ့ အရေအတွက်များပြားလာ လျှက်ရှိရာ ယခုကဲ့သို့ ထိုင်းနိုင်ငံက ခုံရုံးတင်တရားစွဲခြင်းမှာ ပထမဦးဆုံးအကြိမ်ဖြစ်သည်။ အစောပိုင်းက လှေဖြင့် ရောက်ရှိလာသော ရိုဟင်ဂျာများကို ထိုင်းရေတပ်က သေနတ်ဖြင့်ချိန်ကာ ပင်လယ်ထဲသို့ ပြန်မောင်းထုတ်ခဲ့သဖြင့် ကမ္ဘာ့ လူ့အခွင့်အရေး အဖွဲ့များက ပြစ်တင်ဝေဖန်ခဲ့သည်။
မြန်မာစစ်အစိုးရ ဒုဗိုလ်ချုပ်မှူးကြီးမောင်အေးက ရိုဟင်ဂျာပြဿနာကို ပါဝင်ဖြေရှင်းပေးမည်ဟု ထိုင်း စစ်သေနာပတိချုပ် အလည်လာစဉ် ပြောခဲ့ကြောင်း ယမန်နေ့က တီအန်အေ သတင်းတွင် ဖော်ပြပါရှိသည်။
မြန်မာအစိုးရပိုင် သတင်းစာများတွင် ထိုင်းစစ်သေနာပတိချုပ် လာရောက်လည်ပတ်ကာ ပြန်လည်ထွက်ခွာ သွားသည်ဟူသော သတင်းမှအပ မည်သည့်ကိစ္စရပ်များ ပြောဆိုဆွေးနွေးခဲ့ကြောင်း ဖော်ပြခြင်းမရှိပေ။
| < Prev | Next > |
|---|
