ကမ္ဘာ့ဈေးကွက်တွင် ရွှေဈေးနှုန်း တက်နေသော်လည်း ပြည်တွင်း ဈေးကွက်၌ ပြီးခဲ့သည့် လအတွင်းက အကယ်ဒမီ အခေါက်ရွှေ ၁ ကျပ်သားကို ကျပ် ၆၇၅၁၀၀ ရှိနေခဲ့ရာမှ ယနေ့ညနေတွင် ကျပ် ၆၃၄၀၀၀ သာရှိသဖြင့် တလအတွင်း ကျပ် ၄ သောင်းခန့် ဈေးကျဆင်းသွားသည်။
သို့ရာတွင် ၀ယ်လိုအား တက်မလာဘဲ ငွေပြန်ဖော်ရန် ပြန်လည်ထုတ်ရောင်းသူ များပြားလာသည်ဟု ရန်ကုန်မြို့ခံ ရွှေဆိုင်များထံမှ စုံစမ်းသိရှိရသည်။ရွှေနန်းတော် စိန်ရွှေရတနာဆိုင်မှ တာဝန်ရှိသူ တဦးက “ကျမတို့ဆိုင်အနေနဲ့ ပြောရရင် လက်တလော ဈေးကျနေလို့ဆိုပြီး လာဝယ်ကြတာမျိုး သိသိသာသာမရှိဘူး။ ဒါပေမယ့် ၀ယ်ထားပြီးသား ပြန်လာရောင်းတဲ့သူတွေက ပိုများနေတယ်။ ပုံမှန်ဆို ရွှေဈေးကျရင် အ၀ယ်တက်ပြီး အရောင်း မရှိ တော့ဘူးဖြစ်ရမှာလေ။ ဘယ်သူကမှ ဈေးကျနေချိန်မှာ အရှုံးခံ မရောင်းချင်ဘူး” ဟု ဧရာဝတီကို ပြောသည်။
အေးနေသည့် ရွှေအရောင်းဈေးကွက်အတွင်း မတည်ငြိမ်သည့် ဈေးနှုန်းများဆက်လက် ဖြစ်ပေါ်နေကြောင်း၊ ငွေကြေး လက်ဝယ် ကိုင်ဆောင်ရန် လိုအပ်နေသူများမှာ ပြန်လည် ရောင်းချမှုများကြောင်း ရွှေလီ ရတနာ ရွှေဆိုင်မှ အရောင်းတာဝန်ခံ တဦးက ဆိုသည်။
ယခင်လက ရွှေဈေးတက်သောကြောင့် ၀ယ်ယူသူ နည်းပါးခြင်း ဖြစ်သော်လည်း ယခုအခြေအနေမှာမူ စားသုံးသူလက်၌ သုံးစွဲရန် ငွေကြေး ရှားပါးလာသောကြောင့် ၀ယ်လိုအား တက်မလာခြင်းဖြစ်သည်ဟု မြန်မာနိုင်ငံ ရွှေလုပ်ငန်းရှင်များ အသင်းမှ တာဝန်ရှိသူ တဦးက ပြောသည်။
“အသင်းအနေနဲ့ကတော့ ရွှေဈေး ထိန်းညှိတာလိုမျိုး၊ ဈေးကစားတာ မျိုးတွေ လုပ်တာ မရှိပါဘူး။ ခက်တာက ၀ယ်လိုအား မရှိ တာပဲ” ဟု ၎င်းက ဆိုသည်။
မြန်မာနိုင်ငံ ရွှေလုပ်ငန်းရှင်များ အသင်းသည် ရွှေဈေး ထိန်းသိမ်းရန် ကုန်သည်များနှင့် စက်မှုလုပ်ငန်းရှင်များ အသင်းချုပ် (UM FCCI) နှင့် အာဏာပိုင်များ၏ ပူးပေါင်း လမ်းညွှန်မှုကို ခံယူကာ ဖွဲ့စည်းထားသည့် အသင်း ဖြစ်သည်။
လက်ရှိ အခြေအနေတွင် ရွှေအရောင်းအ၀ယ်သည် ပုံမှန် အနေအထား၌သာ ရှိနေသည်ဟု ရန်ကုန် ကမာရွတ်မြို့နယ် လှည်းတန်းဈေးအနီးတွင် ဖွင့်လှစ်ထားသည့် တာလီ ရတနာရွှေဆိုင်မှ တာဝန်ရှိသူတဦးက ပြောသည်။
ယင်းကဲ့သို့ ပြည်တွင်းရွှေဈေး ကျဆင်းနေသောကြောင့် အေးနေသည့် ရွှေအရောင်းအ၀ယ် ဈေးကွက် လည်ပတ်လာမည်ဟု မျှော်လင့်ထားသော်လည်း ထင်သလိုဖြစ်မလာဟု ရွှေကုန်သည်တဦးက ဆိုသည်။
“ရွှေဈေးကွက်သဘောက ဈေးတက်ရင် ၀ယ်သူတွေဘက်က ပြန်ထုတ်ရောင်းတော့ ဈေးကွက်ကို ပြန်စီးဆင်းစေတဲ့ သဘောရှိတယ်။ ဈေးပြန်ကျရင် ၀ယ်လိုအား တက်ပြီး ဈေးကွက်က ပုံမှန် လည်ပတ်သွားပြန်တယ်။ သဘောတရားကိုက ပုံမှန် လည်ပတ်ဖို့ အခြေအနေတွေက ရှိပြီးသား” ဟု သူက ရှင်းပြသည်။
လက်ရှိ အခြေအနေတွင် ပြည်သူများလက်ထဲ၌ ကျပ်ငွေရှားပါးသည့် ပြဿနာအပြင်၊ ဒေါ်လာဈေးကျသဖြင့် လက်ထဲတွင် ဒေါ်လာ ကိုင်ဆောင်ထားသူများလည်း အခက်တွေ့နေကြသောကြောင့် ရွှေရောင်းချ၍ ငွေဖော်သည့် နည်းလမ်းကို သုံးကြရာ ရွှေဈေးကွက်အတွင်း ရောင်းလိုအား မြင့်တက်လာခြင်းဖြစ်နိုင်သည်ဟု စီးပွားရေး တက္ကသိုလ်မှ အငြိမ်းစား ပါမောက္ခတဦးက ဆိုသည်။
“ဈေးကွက်တခုမှာ သဘောတရားအရ စဉ်ဆက်မပြတ် လည်ပတ်နေဖို့ လိုတယ်။ အကြောင်းအမျိုးမျိုးကြောင့် ရောင်းတဲ့ နေရာ မှာ ဖြစ်ဖြစ်၊ ၀ယ်တဲ့ နေရာမှာ ဖြစ်ဖြစ် ရပ်တန့် နေပြီဆို ပြဿနာတက်ပြီ။ အခု ဖြစ်နေတဲ့ အခြေအနေက ပြည်တွင်းမှာ အဓိက အသုံးပြုနေတဲ့ ကျပ်ငွေက မာနေတယ်။ နိုင်ငံခြားငွေ တန်ဖိုး ကျနေတယ်။ ဒီတော့ ပြည်သူတွေက စားဝတ်နေရေးကို ဖြေရှင်းနိုင်ဖို့ ကိုယ့်မှာရှိနေတဲ့ ကုန်ပစ္စည်းကို ထုတ်ပြီး ငွေကြေးနဲ့ လဲလှယ်တဲ့ သဘောပေါ့” ဟု သူက ပြောသည်။
အမေရိကန် တဒေါ်လာ၏ ယနေ့ပေါက်ဈေးမှာ ၇၅၂ ကျပ် နှင့် ၇၅၇ ကျပ် ကြားတွင် ရှိကြောင်း သိရသည်။
| < Prev | Next > |
|---|
