ယင်း လက်နက်ကိုင်များက ဆိုင်ပိုင်ရှင် ဦးတင်ဝင်း၏ နေအိမ်ကို ကားနှင့် ရောက်ရှိလာပြီး လက်နက်ကြီးဖြင့် ပစ်ခတ်ခဲ့သောကြောင့် မီးလောင်ပျက်စီးသွားကြောင်း သိရသည်။
ဆိုင်အနီးအနားရှိ အိမ်၂ လုံး အနည်းအငယ် ပျက်စီးသွားကြောင်း၊ ဆိုင်ပိုင်ရှင် ဦးတင်ဝင်းသည် မြန်မာ အစိုးရ အာဏာပိုင်များနှင့် နီးစပ်သူဟု ယူဆရကြောင်း ဒေသခံများက ပြောသည်။
ထိုလက်နက်ကိုင်များကို ဒေသ အခြေစိုက် ခြေလျင်တပ်ရင်း အမှတ်၂၄၈ မှ တပ်ဖွဲ့ဝင်များက ပြန်လည် ခုခံတိုက်ခိုက်ခဲ့ သော ကြောင့် ထွက်ပြေး တိမ်းရှောင်သွားကြောင်း သိရသည်။
ယင်း တိုက်ခိုက်မှုနှင့် ပတ်သက်ပြီး မည်သည့် အဖွဲ့အစည်းကမျှ ၎င်းတို့၏ လက်ချက်ဖြစ်ကြောင်း ကြေညာခြင်း မရှိသေးပေ။
ယခု ပစ်ခတ်မှုသည် လတ်တလောတွင် ကရင်အမျိုးသား အစည်းအရုံး(KNU)နှင့် တိုးတက်သော ဗုဒ္ဓဘာသာ ကရင်အမျိုး သား တပ်မတော်(DKBA) ပူးပေါင်းတပ်များက မဲ့ကသာကျေး ရွာတွင် တပ်စွဲထားသော အစိုးရစစ်တပ်များကို တနင်္လာနေ့က နောက်ဆုံးထားပြီး တပ်ဆုတ်ပေးရန် တောင်းဆိုချိန်နှင့်လည်း တိုက်ဆိုင်နေသည်။
ထိုဒေသတွင် KNU၊ အပစ်ရပ်အဖွဲ့များ ဖြစ်သော ဟောင်သရော အထူးဒေသ အဖွဲ့၊ ဗိုလ်မှူးချုပ် ထိန်မောင်၏ ကရင်ငြိမ်းချမ်းရေး ကောင်စီ KNU/ KNLA အဖွဲ့၊ မွန်ပြည်သစ်ပါတီ၏ တပ်ဖွဲ့တို့ လှုပ်ရှားနေကြသည်။
ဇွန်လ ၅ ရက်နေ့ကလည်း ဘုရားသုံးဆူ မြို့နယ်ရှိ စစ်ဖက်ဆိုင်ရာ လုံခြုံရေးတပ်ဖွဲ့ (စရဖ) ရုံးကို မျက်နှာဖုံးစွပ် လက်နက်ကိုင် တစုက သွားရောက် တိုက်ခိုက်မှုကြောင့် စရဖ တပ်ဖွဲ့ဝင် တဦး နှင့် ကလေးငယ် တဦး သေဆုံးပြီး ၄ ဦး ဒဏ်ရာရသွားသည်။
မတည်မငြိမ် ဖြစ်နေသည့် ဘုရားသုံးဆူတွင် တိုက်ပွဲများ ထပ်မံ ဖြစ်ပွားမည်ကို ဒေသခံများက စိုးရိမ်နေကြသည်။
ပြီးခဲ့သည့် နိုဝင်ဘာလဆန်းပိုင်းမှ စတင်ကာ ဘုရားသုံးဆူမြို့နယ်အတွင်း တိုက်ပွဲများကြောင့် ဒေသခံ အများအပြား ထိုင်းနိုင်ငံ ဘက်သို့ ထွက်ပြေး တိမ်းရှောင်ခဲ့ရသည်။
| < Prev | Next > |
|---|
