ယခုအခါ ပဲခူးမြစ်၊ ရွှေကျင်မြစ်နှင့် စစ်တောင်းမြစ်တို့သည် စိုးရိမ်ရေမှတ်နှင့် စိုးရိမ်ရေမှတ်အထက်သို့ ရောက်ရှိနေပြီး မြစ်တလျှောက်ရှိ ဒေသများတွင် ရေကြီးလျက်ရှိသည်။
ဒေါ်အောင်ဆန်းစုကြည်၏ ပထမဆုံး နိုင်ငံရေး ခရီးစဉ်ဖြစ်သော သြဂုတ်လ ၁၄ ရက်နေ့ ပဲခူးမြို့ နေ့ချင်းပြန်ခရီးစဉ်တွင် ရွှေမော်ဓောစေတီတော်ကို ပထမဆုံး ဖူးမျှော်မည်ဟု သိရသည်။
အမျိုးသား ဒီမိုကရေစီအဖွဲ့ချုပ် (NLD) မှ ပြောခွင့်ရပုဂ္ဂိုလ် ဦးဉာဏ်ဝင်းက “ရွှေမော်ဓောဘုရားဖူးပြီးရင် သာသနမဏ္ဍိုင် ပါဠိတက္ကသိုလ် ဆရာတော်ကို သင်္ကန်းဝင် ကပ်မယ်” ဟု ဧရာဝတီသို့ ပြောသည်။
ထို့နောက် သနပ်ပင်မြို့နယ်ရှိ NLD ပါတီဝင်များ ကြီးမှူးဖွင့်လှစ်သည့် စာဖတ်ခန်းနှင့် အင်္ဂလိပ်စာ ပညာဒါနကျောင်းကို သွားရောက်ဖွင့်လှစ်မည် ဖြစ်ကြောင်း၊ သနပ်ပင်မြို့နယ်မှအပြန် ပဲခူးမြို့တွင်လည်း နောက်ထပ် စာဖတ်ခန်းနှင့် အင်္ဂလိပ်စာ ပညာဒါနကျောင်းကို ဖွင့်လှစ်ပေးရန်ရှိပြီး ပဲခူး ခရိုင်အတွင်းရှိ လူငယ်ကွန်ရက်အဖွဲ့ဝင်များနှင့် တွေ့ဆုံမည်ဖြစ်ကြောင်း ဦးဉာဏ်ဝင်းက ဆက်လက်ပြောသည်။
ရန်ကုန်မြို့မှ နံနက် ၆ နာရီခန့်တွင် စတင်ထွက်ခွာမည်ဖြစ်ပြီး ညနေ ၄ နာရီခန့်တွင် ရန်ကုန်မြို့သို့ အရောက်ပြန်ရန် စီစဉ်ထားကြောင်း၊ ဒေါ်အောင်ဆန်းစုကြည်၏ လုံခြုံရေးကို ပါတီဝင်များသာမက အာဏာပိုင်များဘက်ကလည်း အပြည့်အ၀ ပူးပေါင်း ဆောင်ရွက်ပေးကြောင်းလည်း သိရှိရသည်။
ပြီးခဲ့သည့် လအတွင်းက ဒေါ်အောင်ဆန်းစုကြည်သည် အလုပ်သမား ဝန်ကြီးဌာနနှင့် လူမှုဝန်ထမ်း ကယ်ဆယ်ရေးနှင့် ပြန်လည်နေရာ ချထားရေးဝန်ကြီးဌာန ၀န်ကြီး ဦးအောင်ကြည်တို့ အစိုးရ ဧည့်ဂေဟာတွင် တွေဆုံဆွေးနွေးပြီးနောက် ယခုကဲ့သို့ ပဲခူးမြို့သို့ သွားရောက်မည် ခရီးစဉ်ထွက်ပေါ်လာခြင်း ဖြစ်သည်။
မကြာသေးမီကလည်း သမ္မတ ဦးသိန်းစိန်၏ နိုင်ငံရေး အကြံပေး ဒေါက်တာ နေဇင်လတ်က နေပြည်တော်တွင် ပြုလုပ်မည့် ဆင်းရဲနွမ်းပါးမှုလျှော့ချရေး အလုပ်ရုံဆွေးနွေးပွဲသို့ ဒေါ်အောင်ဆန်းစုကြည်အား လေ့လာသူအဖြစ် ဖိတ်ကြားမည်ဟု သိရကြောင်း ပြောဆိုခဲ့သေးသည်။
ဒေါ်အောင်ဆန်းစုကြည် နေအိမ်အကျယ်ချုပ် လွတ်မြောက်ပြီးနောက် သားဖြစ်သူ ကိုထိန်လင်းနှင့် ပုဂံ-ညောင်ဦးဒေသသို့ သွားရောက်ခဲ့ပြီး ယခုအကြိမ်သည် ဒုတိယမြောက် ရန်ကုန်မြို့ပြင်ပ ခရီးစဉ်ဖြစ်သည်။
< Prev | Next > |
---|