ဧရာဝတီ

ပြီးခဲ့သည် တနင်္လာနေ့က သမ္မတဦးသိန်းစိန် လက်မှတ်ရေးထိုး ထုတ်ပြန်ခဲ့သော လွတ်ငြိမ်းချမ်းသာခွင့်သည် အနှစ်သာရ မရှိသော အစီအမံ တရပ်သာဖြစ်ပြီး ကမ္ဘာပေါ်တွင် အရက်စက်ဆုံး အာဏာရှင်များအနက် တဦးဖြစ်သည့် သူ့ဆရာဟောင်း ဗိုလ်ချုပ်မှူးကြီး သန်းရွှေပုံစံအတိုင်း ဥပဒေကို လိုသလို အသုံးချသည်ကို ပြသလိုက်ခြင်း ဖြစ်သည်။

အာဏာလွှဲပြောင်းရယူပြီး ရက်သတ္တပတ် ၆ ပတ် ကြာမြင့်ခဲ့ပြီဖြစ်သော်လည်း ဦးသိန်းစိန်အစိုးရသည် တိုင်းပြည်၏ နိုင်ငံရေး ဖြစ်ထွန်းမှုအတွက် ရေရေရာရာတခုမှ မလုပ်ရသေးပေ။ သို့သော် နိုင်ငံတကာ အသိုင်းအ၀န်း၊ တိုင်းပြည်အတွင်းနှင့် အပြင်ရှိ အတိုက်အခံ အုပ်စုများကမူ အစိုးရသစ်အောက်တွင် နိုင်ငံရေးအကျဉ်းသားများ လွတ်မြောက်လာနိုင်သည်ဟူသော မျှော်လင့်ချက်ကို ဆက်လက် ဆွဲကိုင်ထားနေဆဲ ရှိသေးသည်။

သို့သော် ဦးသိန်းစိန်၏ လွတ်ငြိမ်းချမ်းသာခွင့် အစီအစဉ်ကြောင့် အပြုသဘော ဖြစ်ထွန်းမှုများအတွက် မျှော်လင့်ချက်များ သဲထဲရေသွန်ဖြစ်ခဲ့ရသည်။

၁၉၈၈ ခုနှစ် ဒီမိုကရေစီအရေး တောင်းဆိုသော လူထုအုံကြွမှုကြီး ပြီးသည့် အချိန်မှစ၍ ဗိုလ်ချုပ်မှူးကြီး သန်းရွှေ ဦးဆောင်သော စစ်အစိုးရသည် နိုင်ငံရေး လှုပ်ရှားတက်ကြွသူ ထောင်ပေါင်းများစွာကို နှစ်ရှည်ထောင်ဒဏ်များ ချမှတ်ရန် မတရားသော ဥပဒေများအား လိုသလို အသုံးချခဲ့ကြသည်။ နိုင်ငံရေးအကျဉ်းသား ၂၂၀၀ ကျော် အကျဉ်းထောင်များတွင် ဆက်လက် အကျဉ်းကျ ခံနေရဆဲဖြစ်သည်။

ထိုအထဲတွင် ၂၀၀၇ ခုနှစ်မှစ၍ ထောင်ဒဏ် ၆၅ နှစ် ကျခံနေရသော ၈၈ မျိုးဆက် ကျောင်းသားများအဖွဲ့မှ ခေါင်းဆောင်များ၊ ၂၀၀၀ ပြည့်နှစ် အစောပိုင်းကာလ များတွင် ထောင်ဒဏ် နှစ်ပေါင်း ၁၀၀ နီးပါး ပြစ်ဒဏ်ကျခံနေရသော တိုင်းရင်းသား ခေါင်းဆောင်များ နှင့် ၂၀၀၇ ခုနှစ် ရွှေဝါရောင် တော်လှန်ရေးကြီးကို ဦးဆောင်ခဲ့သော သံဃာတော်များလည်း ပါဝင်သည်။ အဆိုပါ သံဃာတော်များအနက် အများစုသည်လည်း နှစ်ရှည်ထောင်ဒဏ်များ ကျခံနေရသည်။

ထိုကဲ့သို့ ပြောင်ကျကျ မတရားသော ပြစ်ဒဏ်များ ချမှတ်နေဆဲအချိန်တွင် သမ္မတ ဦးသိန်းစိန်က အကျဉ်းသားအားလုံးကို ထောင်ဒဏ် ၁ နှစ်လျော့ချပေးပြီး သေဒဏ် ကျခံနေရသူများအတွက် ထောင်ဒဏ်တသက်သို့ လျှော့ပေးသည် ဆိုသည့် လွတ်ငြိမ်း ချမ်းသာခွင့်ကို ကြေညာခဲ့သည်။

ဆယ်စုနှစ် များစွာကြာ ထောင်ကျခံနေရသော အပြစ်မဲ့သူများအတွက် ထောင်ဒဏ် ၁ နှစ်လျှော့ပေးလိုက်သည် ဆိုခြင်းမှာ နိုင်ငံရေး အကျဉ်းသားများနှင့် ၎င်းတို့၏ မိသားစုများကိုသာမက နိုင်ငံတကာ အသိုင်းအဝန်းကိုပါ စော်ကား လိုက်ခြင်းသာ ဖြစ်သည်။

ထောင်ဒဏ် သက်တမ်းနည်းသော နိုင်ငံရေး အကျဉ်းသားများအတွက်ပင် အစိုးရသစ်၏ အစီအစဉ်အောက်၌ များများစားစား လွတ်လာနိုင်စရာအကြောင်း မရှိသည်မှာ ထင်ရှားသည်။ ထို့ကြောင့် လွတ်ရက်စေ့ခါနီး နိုင်ငံရေးအကျဉ်းသား ၄၀ မှ ၅၀ ခန့်သာ ဦးသိန်းစိန်၏ လွတ်ငြိမ်းချမ်းသာခွင့် အစီအစဉ်အောက်တွင် ပါဝင်ခွင့် ရခဲ့သည်။

ဤနေရာတွင် နှိုင်းယှဉ်ကြည့်မည်ဆိုပါက ဗိုလ်ချုပ်မှူးကြီး သန်းရွှေကပင် သူ့ထက်သာသေးသည်။ ၁၉၉၂ ခုနှစ်က ၁၉၉၀ ရွေးကောက်ပွဲ ရလဒ်ကို အသိအမှတ်ပြုရန် ငြင်းဆန်ခဲ့ပြီး ၎င်း အာဏာရယူစဉ်က ဗိုလ်ချုပ်မှူးကြီးသည် လွတ်ငြိမ်းချမ်းသာခွင့် ကြေညာကာ နိုင်ငံရေးအကျဉ်းသား ၄၀၀ ခန့်ကို လွှတ်ပေးခဲ့သည်။

ဦးသိန်းစိန် အစိုးရသည်လည်း ဗိုလ်ချုပ်မှူးကြီးသန်းရွှေ၏ လုပ်ထုံးလုပ်နည်းအတိုင်း နိုင်ငံရေး အကျဉ်းသားများကို နယ်ရုပ် ကလေးများသဖွယ် သဘောထားကာ နိုင်ငံတကာဖိအား အတက်အကျအတွက် ကစားတတ်သည်ဟု ဆိုရမည်။ အစိုးရသစ်က လွတ်ငြိမ်းချမ်းသာခွင့်ကို ကမ္ဘာ့ကုလသမဂ္ဂ အထွေထွေ အတွင်းရေးမှူးချုပ်၏ အထူး အကြံပေးပုဂ္ဂိုလ် မစ္စတာ ဘီဂျေ နမ်ဘီယား၏ အလည်အပတ် ခရီးစဉ်အပြီး ရက်အနည်းငယ် အကြာ၌ ကြေညာခဲ့ခြင်း ဖြစ်သည်။ သို့သော် နိုင်ငံရေး အကျဉ်းသား မဆိုစလောက်သာ လွှတ်ပေးခြင်းကြောင့် မျှော်မှန်းသည့် သတ်ရောက်မှုနှင့် ဆန့်ကျင်ဘက် အကျိုးဆက်ကို အစိုးရသစ်က ခံရမည် ဖြစ်သည်။ ထိုအကျိုးဆက်မှာ အစိုးရသစ်အပေါ် ကျရောက်နေသည့် ဖိအားများ လျော့နည်းသွားမည် မဟုတ်ဘဲ ပိုတိုး လာမည်သာဖြစ်သည်။ ထိုသို့ ဖြစ်လာမည်ဟုလည်း မျှော်လင့်ထားသည်။ အဘယ်ကြောင့်ဆိုသော် အစိုးရ သစ်အပေါ် နိုင်ငံတကာ ဖိအားများ ဆက်လက်တိုးမြှင့် သင့်သောကြောင့်ဖြစ်သည်။

ဦးသိန်းစိန် အစိုးရအနေဖြင့် နိုင်ငံရေး အကျဉ်းသားများအား လွှတ်ပေးရန် ဆန္ဒမရှိကြောင်း ပွင့်ပွင့်လင်းလင်း ပြသလိုက်ခြင်းသည် နိုင်ငံရေး ပြိုင်ဘက်များကို ထောင်ချ၊ ပြင်ပနှင့် အဆက်အသွယ်ဖြတ်ရန် မတရားသည့် ဥပဒေကို လိုသလို အသုံးချ တတ်သော ယခင်စစ်အစိုးရ၏ လုပ်နည်းလုပ်ဟန်ကို လက်ခံလိုက်သည့်အပြင် ဆက်လက် အသုံးပြုဦးမည်ဟု ကြေညာလိုက်ခြင်းလည်း ဖြစ်သည်။

ယခုလုပ်ရပ်က အစိုးရသစ်အနေဖြင့် မြန်မာနိုင်ငံအား စစ်မှန်သော ဒီမိုကရေစီ စနစ်ဆီသို့ တွန်းပို့ရန် ဆန္ဒမရှိပါ ဟူသော အချက်ကို ပုံဖော်လိုက်သည့် အကောင်းဆုံး သာဓက တခုဖြစ်သည်။ အဘယ်ကြောင့် ဆိုသော် နိုင်ငံရေး အကျဉ်းသားများ အားလုံးကို လွှတ်ပေးခြင်းသည် တိုင်းပြည်အတွင်း စစ်မှန်သော နိုင်ငံရေး အပြောင်းအလဲများ အတွက် ပထမဦးဆုံး လုပ်ဆောင်ရမည့် ခြေလှမ်းတလှမ်း ဖြစ်သောကြောင့်ပင်။

နိုင်ငံတကာ အသိုင်းအ၀န်းအဖို့လည်း ဦးသိန်းစိန် ခေါင်းဆောင်သော အစိုးရသစ်တွင် နိုင်ငံရေးဆန္ဒမရှိ၊ နောက်ကွယ်က ဗိုလ်ချုပ်မှူးကြီး သန်းရွှေ ကြိုးဆွဲရာ ကနေသည့် ရုပ်သေးအစိုးရ သက်သက်သာ ဖြစ်သည်ဟူသော အချက်ကို ယခုအချိန်တွင် အလွယ်တကူ မြင်တွေ့သင့်သည်။

ဦးသိန်းစိန်၏ လွတ်ငြိမ်းချမ်းသာခွင့်သည် အတုအယောင်သာဖြစ်၍ ကမ္ဘာနှင့်မြန်မာပြည်သူအားလုံးက ရှုံ့ချသင့်သည်။ မြန်မာနိုင်ငံ အစိုးရသစ်အတွက် ရှက်ဖွယ်လိလိပင် ဖြစ်သည်။

< Prev		Next >