AAPP ၏ ယမန်နေ့ရက်စွဲဖြင့် Burma’s Prisons and Labor Camps: Silent Killing Fields အမည်ရှိ ထုတ်ပြန်ချက်တွင် မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်၊ ထင်ရှားသည့် လူရွှင်တော် ဇာဂနာ၊ လူ့အခွင့် အရေးလှုပ်ရှားသူ မစုစုနွေးနှင့် ၈၈ မျိုးဆက်ကျောင်းသားခေါင်းဆောင် ကိုမင်းကိုနိုင်တို့ အပါအ၀င် နိုင်ငံရေး အကျဉ်းသား အနည်းဆုံး ၁၂၇ ဦး ကျန်းမာရေးဆိုးဝါးလျှက်ရှိပြီး ၎င်းတို့အထဲမှ ၁၉ ဦးသည် အရေးပေါ် ဆေး ကုသမှု ခံယူရမည့် အခြေအနေဖြစ်နေကြောင်း ဖော်ပြထားသည်။
ယင်းထုတ်ပြန်ချက် အစီရင်ခံစာတွင် စစ်အစိုးရက နိုင်ငံရေး အကျဉ်းသားများအား ယခုကဲ့သို့ ကျန်းမာရေးစောင့် ရှောက်မှု လုံလောက်စွာပြုလုပ် မပေးခြင်းသည် စနစ်တကျဖြင့် လူမဆန်စွာ နှိပ်စက်ညှဉ်းပန်းမှုကိုပြုလုပ်နေခြင်း ပင်ဖြစ်သည်ဟုလည်း ပါရှိသည်။
“နိုင်ငံရေး အကျဉ်းသားအများစုဟာ ပြင်းပြင်း ထန်ထန် ပြစ်ဒဏ်ချခံထားရသူများလည်း ဖြစ်ပါတယ်၊ အကျဉ်းကျ နိုင်ငံရေးလှုပ်ရှားမှု ဦးဆောင်သူ အများစုကို နယ်ဝေးထောင်တွေကို ပြောင်းပစ်ပါတယ်၊ အဲဒီ ထောင်တွေမှာလည်း ကျန်းမာရေးစောင့်ရှောက်မှုအတွက် ဆရာဝန်မရှိပါဘူး၊ သူတို့ဟာ တီဘီ ရောဂါ၊ ငှက်ဖျားရောဂါတွေနဲ့ သဘော တူ စာချုပ် အချုပ်ခံထားရသူတွေလိုဖြစ်နေပါတယ်”ဟု AAPP တွဲဖက် အတွင်းရေးမှူး ဦးဘိုကြည်က ပြောသည်။
နိုင်ငံရေးလှုပ်ရှားသူ ၃၅၀ ကျော်သည် ပြီးခဲ့သည့်နှစ် အောက်တိုဘာလကတည်းက ပြစ်ဒဏ်ချမှတ်ခံခဲ့ကြရပြီး အများစုမှာ မိသားစုနှင့်ဝေးရာ နယ်ထောင်များသို့ ပြောင်းရွှေ့ခံထားရသူများ ဖြစ်ကြောင်း၊ ၎င်းထောင်များသည် မိသားစုများက လိုအပ်သည့်အသုံးအဆောင်နှင့် ဆေးဝါးအထောက်အပံ့များပေးပို့ရန်အတွက် ထောင်ဝင်စာ သွား ရောက် တွေ့ဆုံရန်ခရီးလမ်းပန်းခက်ခဲသည့် နေရာများဖြစ်ကြောင်းလည်း AAPP ၏ အစီရင်ခံစာအရ သိရသည်။
ဦးဘိုကြည်က ဆက်လက်ပြီး “ဒီထောင်တွေထဲမှာ နိုင်ငံရေးအကျဉ်းသားပေါင်းများစွာ သေဆုံးခဲ့ပြီးပါပြီ၊ စစ်အစိုးရ အနေနဲ့ ဒီလို လူမဆန်တဲ့ နှိပ်စက်ညှဉ်းပန်းမှုတွေကို ရပ်တန်းက ရပ်ပြီးတော့ နိုင်ငံရေးအကျဉ်းသား အားလုံး ပြန်လွှတ်ပေးရပါမယ်”ဟု ပြောဆိုသည်။
၂၀၀၈ ခုနှစ် နိုဝင်ဘာလမှ စပြီး နိုင်ငံရေး အကျဉ်းသား အနည်းဆုံး ၂၂၈ ဦးကို မိသားစုနှင့် ဝေးရာ နယ်ထောင် များသို့ ပြောင်းရွှေ့ခဲ့ပြီး ရေရှည်တွင် ၎င်းနယ်ထောင်များ၌ နေရသော အကျဉ်းသားများမှာ ကျန်းမာရေး လွန်စွာ ဆိုးဝါးလာသည့် အခြေအနေများနှင့် ရင်ဆိုင်ရနိုင်ကြောင်း အဆိုပါ အစီရင်ခံစာက ဆိုသည်။
မြန်မာနိုင်ငံတွင် အကျဉ်းထောင်ပေါင်း ၄၄ ခု ရှိပြီး အကျဉ်းသားများကို အလုပ်ကြမ်းခိုင်းစေသည့် ရဲဘက် စခန်း ပေါင်း အနည်းဆုံး ၅၀ ခန့် ရှိကာ တချို့ထောင်များတွင် ထောင်ဆေးရုံမရှိကြောင်းနှင့် အနည်းဆုံး ထောင် ၁၂ ခုတွင် ထောင်ဆရာဝန် မရှိကြောင်းလည်း AAPP ၏ ထုတ်ပြန်ချက်အရ သိရသည်။
< Prev | Next > |
---|