အင်းစိန်မြို့နယ်အတွင်း နေထိုင်သည့် အမျိုးသမီးတဦးက“ည လူခြေ တိတ်ချိန် ၁၁ နာရီ ၁၂ နာရီ လောက်ကနေ မနက် ၂ ချက်တီးလောက်ထိ စစ်ရေးလေ့ကျင့် နေကြတာ ကြားနေရတယ်၊ ဘယ်တပ်ရင်းလဲတော့ မသိဘူး” ဟုဆိုသည်။
ဒေါ်အောင်ဆန်းစုကြည်အမှု ကြားနာချိန် မေလလယ်ပိုင်းမှစတင်၍ ရန်ကုန်မြို့ တွင်ယခင်ထက် လုံခြုံရေး တင်းကျပ်လျက် ရှိပြီး အင်းစိန်မြို့နယ်အတွင်းရှိ အာလိမ်ငါးဆင့် ဘုရားဝန်းအတွင်း၌လည်း ရဲတပ်ရင်းတရင်း တပ်စွဲလျက်ရှိကြောင်း ရန်ကုန်အခြေစိုက် သတင်းဌာနတချို့မှ သိရသည်။
စစ်အစိုးရ အနေဖြင့် ရန်ကုန်မြို့ အတွင်း ယခုရက်ပိုင်း လုံခြုံရေးပိုမို တင်းကျပ်လျက်ရှိပြီး အင်းစိန်မြို့နယ် ထဲတွင် ဧည့်စာရင်း စစ်ဆေးမှုများ ရက်ခြားဆိုသလို ပြုလုပ်လာကြောင်း ဒေသခံတဦးက ပြောသည်။
ဒေါ်အောင်ဆန်းစုကြည်ဘက်မှ တင်ပြသော သက်သေ ၃ ဦးကို ပယ်ခဲ့ခြင်းအတွက် တိုင်းတရားရုံးတွင် အပြီးသတ်လျှောက်လဲချက် အမိန့်ချနေသည့် ဇွန် ၉ ရက်နေ့ကလည်း မဟာဗန္ဓုလပန်းခြံနှင့် မြို့တော်ခန်းမ အနီးတဝိုက်၌ လုံထိန်းကား အစီး ၃၀ နီးပါး ချထားသည်ကို တွေ့မြင်ရသည်။
“အရင်ကဆိုရင် လက်နက်ကိုင်တပ်တွေကို မြင်ချင်တိုင်းမမြင်ရဘူး၊ ၂၀၀၇ စက်တင်ဘာ နောက်ပိုင်းမှာ နေရာအနှံ့ တွေ့လာရတယ်၊ ၈၈ အနှစ် ၂၀ ပြည့်တို့၊ ရွှေဝါရောင်တော်လှန်ရေး တနှစ်ပြည့်တို့မှာ ပိုပြီး အင်အားများများ ချထားတယ်” ဟု အင်းစိန်မြို့နယ်တွင် နေထိုင်သူ တဦးကဆိုသည်။
ယခုကဲ့သို့ ရန်ကုန်မြို့လယ်တွင် လက်နက်ကိုင် တပ်များကို ချထားခြင်း ဒေါ်အောင်ဆန်းစုကြည်ကို ဖမ်းဆီး ထားသည့် အကျဉ်းထောင်ရှိရာ အင်းစိန်မြို့နယ်အတွင်း စစ်ရေး လေ့ကျင်းခြင်းများ ပြုလုပ်နေခြင်းမှာ ပြည်သူလူထုကို ခြောက်လှန့်ရန်ဟု ယူဆရကြောင်း ရန်ကုန်အခြေစိုက် သတင်းအယ်ဒီတာတဦးက သုံးသပ်သည်။
“တခုခုဖြစ်ရင် လုံခြုံရေးတွေချ၊ စစ်ကားတွေ မောင်းပြနဲ့ လုပ်နေတာ ကြာတော့ လူတွေက မြင်ပါများပြီး ရိုးနေပြီ၊ ဘယ်သူကမှလည်း မကြောက်ဘူး” ဟု သူက ဆက်ပြောသည်။
အဆိုပါ စစ်ရေးလေ့ကျင့်မှုမျိုးကို ၂၀၀၇ ခုနစ်၊ စက်တင်ဘာ ရွှေဝါရောင်တော်လှန်ရေး ဖြစ်ပွားပြီးကာစကလည်း ၀န်ကြီးများရုံး အနီးပတ်ဝန်းကျင်၌ ပြုလုပ်ခဲ့ဖူးသည်။
| < Prev | Next > |
|---|
