“ချိုစိမ့်က ဒီနေ့သောက်မှာနော်” “ရေနွေးကြမ်းတအိုး ထပ်ပေးပါဦး” ဟူသော မြန်မာပြည် လက်ဖက်ရည်ဆိုင်များမှ အသံများကို ဘန်ကောက် စိတ်တိုင်းကျဆိုင်အတွင်းတွင်လည်း ကြားနေရသည်။
လက်ဖက်ရည်နှင့် ကော်ဖီအပြင် နန်းကြီးသုတ်၊ ခေါက်ဆွဲသုတ် စသည့် မြန်မာပြည်သားတို့ နှစ်သက်သော အစားအစာများလည်း ရရှိနိုင်သည်။
ဤဆိုင်မှ မြန်မာအငွေ့အသက်နှင့် မြန်မာအစားအစာများက ဘန်ကောက်မှ မြန်မာပြည်သားများကို ဆွဲဆောင် လျက်ရှိ သည်။ တခါတရံ ဆိုင်ဝန်ထမ်းများက မြန်မာသီချင်းများ ဖွင့်ထားကြသည်။ ဆိုင်နံရံတွင် ဘာသာရေး စီးပွားရေး ကြော်ငြာများ ကပ်ထားသည်။ စားသုံးသူများ ဖတ်ရှုနိုင်ရန် မြန်မာပြည်ထုတ် ဂျာနယ်များကို ဆိုင်အဝင်ဝတွင် ချထားသည်လည်း တွေ့ရ သည်။
ရန်ကုန်မြို့မှ စိတ်တိုင်းကျ လက်ဖက်ရည်ဆိုင်လုပ်ငန်းသည် သက်တမ်း ၂၁ နှစ် ရှိပြီဖြစ်ပြီး ရန်ကုန်တွင် ဆိုင်ခွဲပေါင်း ၆ ခုရှိသည်ဟု သိရသည်။ ဘန်ကောက်မြို့ဆိုင်ခွဲမှာ သက်တမ်း ၁ နှစ်ပြည့်ပြီဟု ဆိုသည်။
ဘန်ကောက်မြို့ စိတ်တိုင်းကျမှာ မြန်မာကျောင်းသား ၄၀၀ ၀န်းကျင် တက်ရောက် ပညာသင်ယူနေသော အေပက် (ABAC) တက္ကသိုလ် အနီးတွင် တည်ရှိသောကြောင့်လည်း ဘန်ကောက်ရှိ မြန်မာပြည်သားများ သွားရောက် ရှာဖွေရန် လွယ်ကူသည့် နေရာတခု ဖြစ်နေသည်။
မနက် ၈ နာရီ မှ ည ၈ နာရီအထိ ဖွင့်သော ဘန်ကောက်မြို့ စိတ်တိုင်းကျတွင် အလွှာအသီးသီးမှ မြန်မာပြည်သားများကို တွေ့ရသည်။ အေပက် တက္ကသိုလ်မှ နိုင်ငံတကာ ကျောင်းသူ ကျောင်းသားများ၊ ဆရာ ဆရာမများကိုလည်း တွေ့နိုင်သည်။
စိတ်တိုင်းကျတွင် ဘောလုံးပွဲအကြောင်း ပြောနေသည့် ကျောက်ကုန်သည်များကို တွေ့နိုင်သကဲ့သို့ မြန်မာသံရုံးသို့ သွားရန် ချိန်းဆို တိုင်ပင်နေသည့် လုပ်ငန်းရှင်များကိုလည်း တွေ့ရတတ်သည်။
စိတ်တိုင်းကျသို့ ပုံမှန် သွားတတ်သူများထဲတွင် ဘလော့ဂါ ကဗျာဆရာ ကောင်းကင်ကိုလည်း တဦး အပါအဝင် ဖြစ်သည်။ တပတ်လျှင် သုံးလေးကြိမ်ခန့် လက်ဖက်ရည်ဆိုင်သို့ ရောက်လေ့ရှိသည်ဟု သူက ဆိုသည်။
“ဒီဆိုင်မှာ ထိုင်လို့ ကောင်းတယ်၊ သူငယ်ချင်းတွေနဲ့လည်း ချိန်းတွေ့လို့ရတယ်” ဟု ဘန်ကောက်တွင် ကျောင်းတက် နေသော ကဗျာဆရာက ရေနွေးကြမ်းတခွက် သောက်ရင်း ပြောသည်။
သီးလေးသီး အငြိမ့်အဖွဲ့မှ လူရွှင်တော် ပန်းသီးကလည်း ဘန်ကောက် ရောက်စဉ်က ဤဆိုင်တွင် စိတ်တိုင်းကျ စားသောက်ခဲ့သည်ဟု ဆိုသည်။
“ကောင်းတယ်၊ သိပ်ကောင်းတယ်။ ပဲပြုတ်နဲ့ ထမင်း မှာစားတယ်။ လက်ဖက်ရည်ကို ကျောက်ပန်းတောင်း မှာသောက်တယ်” ဟု သူက ဧရာဝတီကို ပြောပြသည်။ပဲပြုတ်နှင့် ထမင်းကြိုက်သူမှာ လူရွှင်တော် ပန်းသီး တယောက်တည်း မဟုတ်ပေ။
‘ဒီဆိုင်မှာက ဒန်ပေါက် နာမည်ကြီးတယ်၊ ဒါပေမယ့် ကျနော်ကတော့ ပဲထမင်းနယ်ကို ကြိုက်တယ်”ဟု စိတ်တိုင်းကျ လက်ဖက်ရည် ဆိုင်သို့ ပုံမှန် သွားလေ့ရှိသူ ကိုခင်ဦးက ပြောသည်။
“မြန်မာတွေကတော့ ကြိုက်လို့ လာစားကြတာပဲလေ၊ အရည်အသွေးကိုတော့ သူတို့ ထိန်းဖို့လိုတယ်၊ နန်းကြီးသုတ်ကို ဆိုင်က အလုပ်သမားတွေ ဘယ်သူဖြစ်ဖြစ် ဝင်သုတ်ပေးနေတာ တွေ့ရတယ်” ဟု သူက ဆက်ပြောသည်။
ဆိုင်အစားအသောက် စာရင်းတွင် လက်ဖက်ရည် ကော်ဖီအပါအဝင် ခေါက်ဆွဲ၊ ကြက်သားပလာတာ စသဖြင့် အစားအစာ ၁၉ မျိုးကို တွေ့ရသည်။ ထိုစာရင်းတွင် “အလှူ၊ မွေးနေ့၊ မင်္ဂလာပွဲများ အတွက်လည်း order လက်ခံ ဆောင်ရွက်ပေးနေ ပါပြီ” ဟု ဖော်ပြထားသည်။
ခေါက်ဆွဲကြော်၊ ရွှေတောင်ခေါက်ဆွဲ တို့၏ တန်ဖိုးမှာ ၃၅ ဘတ် ( ၁ဒေါ်လာ) ဖြစ်ပြီး လက်ဖက်ရည်၊ ပဲပြုတ်ဆီထမင်း တို့မှာ ဘတ် ၂၀ ဖြစ်ကြောင်း တွေ့ရသည်။
| < Prev | Next > |
|---|
