အောက်တိုဘာလ ၂ ရက်နေ့တွင် စတင်ဖွဲ့စည်းသည့် ပါတီ ၆ ပါတီ ပါဝင်သည့် အဆိုပါအဖွဲ့မှ နုတ်ထွက်မည့် ဒီမိုကရေစီနှင့် ငြိမ်းချမ်းရေးပါတီ (ဒီငြိမ်းပါတီ) ဥက္ကဋ္ဌ ဦးအောင်သန်းက ယခုရက်ပိုင်းအတွင်း ဖြစ်ပေါ်ခဲ့သော ငွေကြေးဆိုင်ရာကိစ္စများ သေသေချာချာ မရှင်းလင်းခြင်းကြောင့် ပူးပေါင်း လုပ်ဆောင်ရန် ဆန္ဒမရှိတော့ကြောင်း ဆိုသည်။
“အဓိက ကတော့ ဦးလှမောင်ရွှေက ထောက်ပံ့ငွေကိစ္စကို တိတိကျကျ မရှင်းပြတာပါ။ ဒီလူက အစိုးရက ခန့်ထားတဲ့ တာဝန် တွေ၊ ရာထူးတွေကို ရယူထားသူပါ၊ ကျနော်တို့က ဒီလိုလူတွေနဲ့ မပတ်သက်ချင်ပါဘူး၊ ပါတီနိုင်ငံရေး သီးသန့်သာ သွားချင်ပါ တယ်။ ၆ ပါတီအဖွဲ့နဲ့ မပူးပေါင်းလည်း ကျနော်တို့က ကိုယ့်ဟာနဲ့ကိုယ် အဆင်ပြေပါတယ်”ဟု ဦးအောင်သန်းက ဧရာဝတီ သို့ ပြောသည်။
ဒီငြိမ်းပါတီသည် မည်သည့် စီးပွားရေး လုပ်ငန်းရှင်များထံမှ ငွေကြေးတစုံတရာ လက်ခံထားခြင်းမရှိဘဲ ပါတီအဖွဲ့ဝင်များ၏
ကိုယ်ပိုင်ငွေကြေးဖြင့်သာ ရပ်တည်နေကြောင်းလည်း ဦးအောင်သန်းက ရှင်းပြသည်။
ဒီမိုကရေစီ မိတ်ဆွေပါတီများ အဖွဲ့အတွင်းမှ အမျိုးသား ဒီမိုကရေစီ အင်အားစု (NDF) ပါတီနှင့် တိုင်းရင်းသားပါတီ တချို့အား စစ်အစိုးရနှင့် နီးစပ်သော စီးပွားရေးလုပ်ငန်းရှင် ဦးလှမောင်ရွှေက ငွေကြေးထောက်ပံ့ပေးထားသည့် သတင်းများ ပြီးခဲ့သည့်
ရက်ပိုင်းအတွင်း ထွက်ပေါ်ပြီးနောက် ဤသို့ အကွဲအပြဲများ ပေါ်ပေါက်လာခြင်းဖြစ်သည်။
ဦးလှမောင်ရွှေသည် မြန်မာနိုင်ငံ ငါးလုပ်ငန်း အဖွဲ့ချုပ်၏ တာဝန်ရှိသူ တဦးဖြစ်သည့်အပြင် ပြည်ထောင်စု မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ် (UMFCCI) တွင်လည်း ဗဟိုအလုပ်အမှုဆောင်တဦး ဖြစ်သည်။ ထို့အပြင် Myanmar Egress အဖွဲ့ကို တည်ထောင်သူ ၇ ဦးတွင်လည်း တဦးအပါအဝင် ဖြစ်သည်။
ထိုပြဿနာများကို အောက်တိုဘာလ ၁၂ ရက်နေ့တွင် ဒီမိုကရေစီ မိတ်ဆွေပါတီများ အဖွဲ့က ဆွေးနွေးပွဲ လုပ်ခဲ့သော်လည်း ဒီငြိမ်းပါတီအနေဖြင့် ကျေနပ်မှုမရှိ၍ ခွဲထွက်ရန် ဆုံးဖြတ်လိုက်ခြင်းဖြစ်ကြောင်း သိရသည်။
ဆွေးနွေးပွဲသို့ ဒီငြိမ်းပါတီ အထွေထွေ အတွင်းရေးမှူး ဦးသန်းထွန်း တက်ရောက်ခဲ့ပြီး ရှေ့ဆက်ပူးပေါင်းရန် သဘောတူညီမှု ရရှိခဲ့ကြောင်း၊ ၎င်းက သဘောတူညီသော်လည်း ဒီငြိမ်းပါတီ၏ တခြားခေါင်းဆောင်ပိုင်းက မပူးပေါင်းနိုင်ဟု နောက်တနေ့တွင် မီဒီယာများသို့ ပြောဆိုခဲ့ခြင်း ဖြစ်ကြောင်း ပြည်ထောင်စု ဒီမိုကရေစီပါတီ ဥက္ကဋ္ဌ ဦးသိန်းဌေးက ဧရာဝတီကို ပြောသည်။
NDF ပါတီ ခေါင်းဆောင် တဦးဖြစ်သူ ဦးခင်မောင်ဆွေက “ဒီလို နိုင်ငံရေးခိုင်မာမှု မရှိတဲ့လူတွေ ထွက်သွားတာကို ကြိုဆိုပါ တယ်။ အခုလို ပြောဆိုနေမယ်ဆိုရင် သူတို့မထွက်လည်း ကျနော်တို့က ထုတ်ပယ်ရလိမ့်မယ်။ ဘာကြောင့်လည်းဆိုတော့ ပါတီအတွင်းမှာ ပြောရမယ့်စကားတွေကို စည်းဘောင်ကျော်ပြောတာဟာ ဒီမိုကရေစီ စံနဲ့ မကိုက်ညီလို့ပါ”ဟု ဝေဖန်ပြောဆို သည်။
ဒီငြိမ်းပါတီ၏ လုပ်ရပ်သည် ပြည်သူအကျိုးကို မျက်ကွယ်ပြုပြီး မိမိတို့ပါတီအကျိုးကိုသာ လုပ်ဆောင်ခြင်းဖြစ်ကြောင်း၊ လက်ရှိ အငြင်းပွားနေသော ငွေကြေးထောက်ပံ့မှု ကိစ္စသည် ယခင်ကပင် ပြည်တွင်းမီဒီယာများတွင် ဖော်ပြထားပြီးသား ဖြစ်၍ ယခု အချိန်မှ ထုတ်ဖော်ပြောဆိုလာခြင်းမှာ ထိုးနှက်မှုသာဖြစ်ကြောင်း၊ ဒီငြိမ်းပါတီ၏ နောက်ကွယ်တွင် ကြိုးကိုင် လှုံ့ဆော်နေသူ များ ရှိပြီး NDF ပါတီအား ပြိုင်ဘက်ဟု ပြောဆိုနေသည့်ပါတီနှင့် တသီးပုဂ္ဂလ ကိုယ်စားလှယ်လောင်းတချို့က လုပ်ဆောင်နေခြင်း ဖြစ်ကြောင်း ဦးခင်မောင်ဆွေက ဆက်လက် ပြောသည်။
ဒီမိုကရေစီ မိတ်ဆွေပါတီများ ပူးပေါင်းသည့်နေ့က ထုတ်ပြန်ခဲ့သော ကြေညာချက်တွင် ဒီမိုကရေစီ မိတ်ဆွေပါတီများအနေဖြင့် အမျိုးသား လွှတ်တော် ကိုယ်စားလှယ်လောင်း ၆၈ ဦး၊ ပြည်သူ့လွှတ်တော် ကိုယ်စားလှယ်လောင်း ၁၇၆ ဦး၊ တိုင်းဒေသကြီးနှင့် ပြည်နယ် လွှတ်တော် ကိုယ်စားလှယ်လောင်း ၁၅၂ ဦး၊ စုစုပေါင်း ၃၉၆ ဦး ၀င်ရောက် ယှဉ်ပြိုင်သွားမည် ဖြစ်ကြောင်း ဖော်ပြ ထားသည်။
ရွေးကောက်ပွဲကို သပိတ်မှောက်ခြင်းသည် အကျိုးမရှိ၍ ဒီမိုကရေစီ မိတ်ဆွေပါတီများကို မဲပေးကြရန်၊ ရွေးကောက်ပွဲလွန် ကာလတွင်လည်း ဥပဒေပြုရေးဆိုင်ရာ လုပ်ငန်းများကို အတူပူးပေါင်း ဆောင်ရွက်သွားကြရန်လည်း ကြေညာချက်တွင် ပါဝင် သည်။
ဒီမိုကရေစီ မိတ်ဆွေပါတီများမှာ ပြည်ထောင်စုဒီမိုကရေစီပါတီ (UDP)၊ NDF ၊ ရခိုင်တိုင်းရင်းသားများ တိုးတက်ရေးပါတီ (RNDP)၊ ရှမ်းတိုင်းရင်းသားများ ဒီမိုကရက်တစ်ပါတီ (SNDP)၊ ချင်းအမျိုးသား ပါတီနှင့် ယခု နုတ်ထွက်လိုက်သော ဒီငြိမ်းပါတီ တို့ဖြစ်သည်။
| < Prev | Next > |
|---|
