မကွေးတိုင်း ရေနံချောင်း မြို့မတောင်ရပ်ကွက်တွင် ယမန်နေ့က ကြိုတင်မဲယူရာ မဲပေးသူ ၇၀ ရှိကြောင်း၊ ကြံ့ဖွံ့ပါတီက ၆၈ မဲ ရရှိပြီး တစည ပါတီက ၂ မဲ ရရှိကြောင်း သတင်းရသည်။ ကြိုတင်မဲကို တရားဝင်မဲပေးသည့်နေ့မှသာ အများရှေ့၌ ထုတ်ယူ ရေတွက်ရမည် ဖြစ်ကြောင်း၊ ယခုကဲ့သို့ ရွေးကောက်ပွဲ ကော်မရှင်နှင့် တာဝန်ရှိသူများက ကြိုတင်ဖွင့်ပြီး ရေတွက်ခြင်းသည် တရားမ၀င်ကြောင်း ရေနံချောင်းမြို့ခံတဦးက ပြော သည်။

ရွေးကောက်ပွဲ တရားမျှတလျှင် ကရင်ပြည်နယ် မဲဆန္ဒနယ်များ၌ အနိုင်ရမည်ဟု ဘားအံမြို့ရှိ ဖလုံ - စဝေါ် ဒီမိုကတစ် ပါတီ ဥက္ကဌ ဦးခင်မောင်မြင့်က ဧရာဝတီသို့ ပြောသည်။ “ အကယ်၍များ စစ်တပ်က ဘာမှ ဖိအားတွေ မပါဘူးဆိုရင်တော့ ကရင်ပြည်နယ် အတွင်း မှာ တရေးနိုး ထပြိုင်လို့ ရဲသေးတာပေါ့” ဟု ၎င်းက ဆိုသည်။ လတ်တလောတွင် ၎င်းတို့ အနေနှင့် ပြည်ပမီဒီယာများနှင့် ဆက်သွယ်ပြောဆိုသည့် အကြောင်း အရာများကို အက်စ်ဘီ သို့ ပြန်လည် သတင်း ပေးပို့ရကြောင်း သိရသည်။

မွန်ပြည်နယ် ရေးမြို့နယ်တောင်ပိုင်း ရင်းဒိန်း ကျေးရွာ ဥက္ကဋ္ဌသည် အောက်တိုဘာ ၂၇ က မွန်ဒေသလုံး ဆိုင်ရာ ဒီမိုကရေစီ ပါတီ (AMRDP) စည်းရုံးရေးမှူး တဦးကို ပစ္စတို သေနတ်ဖြင့် ရိုက်သဖြင့် ရေးမြို့နယ် ဆေးရုံ တွင် ဆေးကုသမှု ခံယူနေရကြောင်း၊ ရင်းဒိန်း ဥက္ကဋ္ဌ က စစ်တပ်ဘက်က ဖြစ်ကြောင်း၊ စည်းရုံးရေးမှူးကို ရွာထဲ ပေးမဝင်သဖြင့် သူနဲ့ရင်းနှီးသည့် SB နှင့်အတူ သွားရာ ဝင်ခွင့် ရသွားသဖြင့် SB အားကိုးသည် ဆို၍ ခေါင်းကို ရိုက်ခြင်း ဖြစ်ကြောင်း  AMRDP ဥက္ကဋ္ဌ နိုင်ငွေသိန်း ကပြောသည်။

“ဝ” အမျိုးသား စည်းလုံးညီညွတ်ရေးပါတီ (WNUP) သည် “ဝ”· ပြည်သွေးစည်းညီညွတ်ရေး တပ်မတော် (UWSA) ထိန်းချုပ် နယ်မြေ ပန်ဆန်းမြို့နယ်၌ စည်းရုံးမှုများ ပြုလုပ်နေစဉ် UWSA တပ်ဖွဲ့ဝင်များ က နှင်ထုတ်ခဲ့ ကြောင်း သိရသည်။ UWSA အရာရှိတဦးက “ကျနော်တို့ နယ်မြေကို လာပြီးတော့ သူတို့က ဝ လူမျိုးတွေ ကို ကိုယ်စား ပြုပါတယ် ဆိုပြီး ပြောတဲ့အတွက် ပြီးခဲ့တဲ့ ၂ ရက်လောက် မှာ အခုလို နှင်ထုတ်ခဲ့တာ” ဟု ပြောသည်။

မရမ်းကုန်းမြို့နယ်တွင် ယမန်နေ့ညက ကြိုတင်မဲများကို ညပိုင်းအချိန်အထိ ကောက်ယူလျက်ရှိရာ မဲရုံစောင့်မည့် ဆရာ၊ ဆရာမများ၊ ဝန်ထမ်းများနှင့် ခြိမ်းခြောက်အကျပ်ကိုင် ခံထားရဖြင့် ထိတ်လန့်နေသော ရပ်ကွက်သူ ရပ်ကွက်သား စုစုပေါင်း ၂၀ ကျော်ခန့် မဲလာပေးကြသည်ဟု မျက်မြင်တဦးက ပြောဆိုသည်။

မန္တလေးတိုင်း ပလိပ်ချည်မျှင်နှင့် အထည်စက်ရုံ ၀န်ထမ်းများ ကြံ့ဖွံ့ပါတီကို မဲထည့်ရမည်ဖြစ်သည်ဟု စက်ရုံမှူး ဗိုလ်မှူး သိန်းလွင်က ပြီးခဲ့သည့်ရက်က ညွှန်ကြားကြောင်း သတင်းရသည်။ ၀န်ထမ်းများသည် ယခင်ကတည်းက ကြံ့ဖွံ့အသင်းဝင်များဖြစ်ကြောင်း၊ ပါတီအသွင်ကူးပြောင်းသွားသော်လည်း မိမိကိုယ်မိမိ ပါတီဝင် အဖြစ်ခံယူပြီး ကြံ့ဖွံ့ကိုသာ မဲထည့်ရမည်ဖြစ်သည်ဟု စက်ရုံမှူး က ပြောကြောင်း ၀န်ထမ်းတဦးက ဧရာဝတီသို့ ပြောသည်။