စီးပွားရေး လုပ်ငန်းရှင် ဦးဌေးမြင့်၏ ယုဇနကုမ္ပဏီကို ကချင်ပြည်နယ်မှ မြေယာ အသိမ်းခံရသည့် တောင်သူများက လျော်ကြေး ရလိုမှုဖြင့် တရားစွဲဆိုထားခြင်းနှင့် ပတ်သက်၍ မြစ်ကြီးနားမြို့ ပြည်နယ် တရားရုံး၌ ဒီဇင်ဘာလ ၃၁ ရက်နေ့တွင် အမိန့်ချမည် ဖြစ်ကြောင်း တောင်သူများ၏ အကျိုးဆောင်ရှေ့နေ ဦးမြင့်သွင်က ဧရာဝတီသို့ ပြောသည်။ “ပြင်ပ နစ်နာမှုတွေပါ၊ တောင်သူတွေ လယ်တွေ ပျက်စီးတယ်၊ လယ်တွေ၊ ယာတွေ၊ ဥယျာဉ်တွေ၊ စိုက်ပျိုးသီးနှံတွေ ပျက်စီးတဲ့ အတွက် နစ်နာ ဆုံးရှုံး တာတွေ တောင်း ထားတာပါ”ဟု ၎င်းက ဆိုသည်။ ယုဇန ကုမ္ပဏီက ကချင်ပြည်နယ် ဟူးကောင်းချိုင့်ဝှမ်းရှိ မြေယာများ သိမ်းယူခြင်းကို ၂၀၀၇ ခု နှစ် ကတည်းက မိုးညှင်းခရိုင် ဖားကန့် မြို့ရှိ ကျေးရွာများတွင် စတင်ခဲ့ခြင်းဖြစ်ပြီး တောင်သူဦးရေ ၆၀၀ ကျော်၏ မြေ ၁၃၃၈ ဧကကို သိမ်းယူခဲ့ခြင်းဖြစ်သည်။

ရန်ကုန်- မန္တလေး အမြန်လမ်းမကြီး၏ နေပြည်တော်-မန္တလေး လမ်းပိုင်းကို ဒီဇင်ဘာ ၂၉ ရက်နေ့တွင် ဖွင့်လှစ်မည်ဖြစ်ကြောင်း ဆောက် လုပ်ရေးဝန်ကြီးဌာန တာဝန်ရှိ သူ တဦးက ပြောသည်။ အဆိုပါလမ်း ဖွင့်ပြီးချိန်တွင် ခရီးသည်တင်ယာဉ်များမှာ ရန်ကုန်နှင့်   မန္တလေး သို့ ၇ နာရီခန့်ဖြင့် သွားလာနိုင်မည်ဖြစ်ကြောင်း ယနေ့ ထုတ် မြန်မာ့ အလင်း သတင်းစာ၌ ဖော်ပြထားသည်။ ရန်ကုန်-နေပြည်တော် အမြန်လမ်းကို ၂၀၀၉ ခုနှစ် မတ်လ ၂၅ ရက်နေ့က ဖွင့်လှစ်ခဲ့သည်။

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ကို ဂုဏ်ထူးဆောင် နိုင်ငံသား တဦးအဖြစ် လက်ခံ၍ ကနေဒါ နိုင်ငံသို့ လာရောက် လည်ပတ်ရန် ၀န်ကြီးချုပ် မစ္စတာ စတီဖင် ဟာပါ က ဖိတ်ခေါ်လိုက်သည်ဟု အေအက်ဖ်ပီ သတင်းတွင် ရေးသား ထား သည်။ ၂၀၀၇ ခုနှစ် ကတည်းက တောင်အာဖရိက သမ္မတဟောင်း နယ်လ်ဆင်မင်ဒဲလား၊ တိဘက် ဘာသာရေး ခေါင်းဆောင် ဒလိုင်းလားမား၊ အစ္စလမ် ဘာသာရေး ခေါင်းဆောင် အဂ္ဂါခန် တို့ ကဲ့သို့ ဒေါ်အောင်ဆန်းစုကြည်ကို ဂုဏ်ထူးဆောင် ကနေဒါနိုင်ငံ သား တဦးအဖြစ် ကနေဒါ ပါလီမန်က ပေးအပ်ခဲ့ခြင်းဖြစ်ကြောင်း သိရသည်။

မွန်ဒေသလုံးဆိုင်ရာ ဒီမိုကရေစီပါတီ (AMDP) သည် ရေရှည်ရပ်တည်ရေး အတွက် စီးပွားရေးလုပ်ငန်း တချို့လုပ်ဆောင် သွားမည်ဖြစ်ကြောင်း၊ အဓိကစီးပွားရေး လုပ်ငန်းများမှာ ရာဘာလုပ်ငန်း၊ ရေလုပ်ငန်း၊ ဆန်စပါးလုပ်ငန်း၊ သယ်ယူပို့ဆောင်ရေး စသည့် လုပ်ငန်းများကို လုပ်ဆောင်သွားမည်ဟု AMDP ဥက္ကဋ္ဌ ဦးနိုင်ငွေသိန်းက ပြောသည်။ ၎င်းတို့ ပါတီသည် လွှတ်တော် အတွက် ကြိုတင်ဆွေးနွေးပွဲကို ဒီဇင်ဘာလ ၂၇ ရက် နှင့် ၂၈ ရက်တို့တွင် အစည်းအဝေး လုပ်နေကြောင်း သိရသည်။

မန္တလေးတိုင်း အမျိုးသားဒီမိုကရေစီ အဖွဲ့ချုပ် (NLD) က နိုင်ငံရေးအကျဉ်းသား ၄ ဦးအတွက် ထောက်ပံ့ငွေ ၅၀၀၀၀ ကျပ်စီကို ၎င်းးတို့၏ မိသားစုများထံ ယနေ့ ပေးအပ်ခဲ့ကြောင်း သိရသည်။ မန္တလေးတိုင်းတွင် နိုင်ငံရေးမှုဖြင့် ထိန်းသိမ်းခံရသူ ၄၀ ဦးရှိနေရာ လစဉ်အလှည့်ကျ ထောက်ပံ့မှုပေးနေကြောင်း၊ ဒေါ်အောင်ဆန်းစုကြည်၏ ၆၅ နှစ်ပြည့်မွေးနေ့မှ စတင်ကူညီမှုပေးခဲ့ရာ ယခုအချိန်ထိ နိုင်ငံရေးအကျဉ်းသား ၂၂ ဦးကို ထောက်ပံ့ပေးခဲ့ကြောင်း၊ ယခု တကြိမ်ထောက်ပံ့မှုတွင် NLD ပါတီဝင် ၂ ဦးနှင့် ပါတီဝင်မဟုတ်သည့် နိုင်ငံရေးအကျဉ်းသား ၂ ဦးလည်း  ပါဝင်ကြောင်း မန္တလေးတိုင်း NLD စည်းရုံးရေးအဖွဲ့ဝင် ဦးကိုကိုလေးက ပြောသည်။

ကယားပြည်နယ် ဖရှုးဆိုးမြို့နယ်တွင် သံလွင် ရေကာတာ တည်ဆောက်ရေး စီမံကိန်းအတွက် သွားနေသည့် အစီး၂၀ ခန့်ရှိ နအဖ ယာဉ်တန်းကို ကရင်နီ အမျိုးသား တိုးတက်ရေးပါတီ(KNPP)တပ်ဖွဲ့ဝင်များက ပြီးခဲ့သည့် သောကြာနေ့၌ ခြုံခို တိုက်ခိုက်ခဲ့သောကြောင့် နအဖ ဘက်မှ ၃ ဦး ကျဆုံးကြောင်း KNPP အတွင်းရေး မှူး (၁) ခူဦးရယ်က ဧရာဝတီသို့ ပြောသည်။

ဆူဇူကီးဖလား ၂၀၁၀ ဗိုလ်လုပွဲ ပထမ ပွဲစဉ်တွင် အိမ်ရှင် မလေးရှားအသင်းက အင်ဒိုနီးရှားအသင်းကို ၃ ဂိုးပြတ်နိုင်သည်။ ယခု ကဲ့သို့ ယမန်နေ့က ဂိုးပြတ်နိုင်ထားသော်လည်း ဒုတိယ ပွဲစဉ်အဖြစ် ဒီဇင်ဘာ ၂၉ ရက်နေ့တွင် အင်ဒိုနီးရှားနိုင်ငံ၌ ကစားရမည်ဖြစ် သောကြောင့် အကောင်းဆုံးဖြစ်ရန် ကြိုးစားမည်ဖြစ်ကြောင်း မလေးရှားနည်းပြ ရာဂျာဂိုဗယ်က ပြောသည်။ မြန်မာ အသင်းသည် အုပ်စု အဆင့်တွင် ဗီယက်နမ်၊ စင်ကာပူ တို့အား ရှုံးပြီး ဖီလစ်ပိုင်အား သရေကျခဲ့သည့်အတွက် ဒီဇင်ဘာလ ၈ ရက်နေ့ ကတည်းက  အုပ်စု အဆင့်မှ လှည့်ပြန်ခဲ့ရသည်။

ရန်ကုန်မြို့ ဗိုလ်တထောင်မြို့နယ်၊ ဗိုလ်အောင်ကျော်လမ်းရှိ ဂန္ဒီခန်းမကြီးကို ရန်ကင်းမြို့နယ်ရှိ လယ်/ဆည် ဝန်ကြီးဌာန ရုံးဟောင်းသို့ အာဏာပိုင်များက မကြာမီပြောင်းရွှေ့ပေးရန် ညွှန်ကြားထားကြောင်း သိရသည်။ ဂန္ဒီခန်းမသည် သမိုင်းဝင် အဆောက်အအုံတခု ဖြစ်ပြီး ၁၉၉၀ ရွေးကောက်ပွဲ အနိုင်ရပြီးနောက် NLD သည် ဂန္ဒီခန်းမတွင် အစည်းအဝေးကျင်းပကာ လွှတ်တော် ခေါ်ယူရေးအတွက် “ဂန္ဒီခန်းမ ကြေညာစာတမ်း” ကို ထုတ်ပြန်ခဲ့သည်။

ဒေါ်အောင်ဆန်းစုကြည် အပါအဝင် အတိုက်အခံများကို အစိုးရသစ်နှင့် ပူးပေါင်းဆောင်ရွက်ရန် အင်္ဂလိပ်ဘာသာပိုင်း မြန်မာ့အလင်း သတင်းစာ ခေါင်းကြီးပိုင်းက သတိပေး ရေးသားထားသည်။ ဒေါ်အောင်ဆန်းစုကြည်သည် စစ်ဗိုလ်ချုပ်များနှင့် တွေ့ဆုံဆွေးနွေးရေးကို တောင်းဆိုထားပြီး အနောက်နိုင်ငံများ၏ စီပွားရေးပိတ်ဆို့ အရေးယူမှုကိုလည်း ထောက်ခံထားသည်။ ယမန်နေ့က ဆေးတက္ကသိုလ် ဗိုလ်လောင်းသင်တန်းဆင်းပွဲ မိန့်ခွန်းတွင်လည်း ဗိုလ်ချုပ်မှူးကြီး သန်းရွှေက တိုင်းရင်းသား စည်းလုံးညီညွတ်ရေး တိုးတက်ကောင်းမွန်နေသည်ဟု ပြောသွားသည်။

နယ်စပ်တိုက်ပွဲများကြောင့် ထိုင်းနိုင်ငံ ဘက်ကမ်းသို့ ထွက်ပြေး တိမ်းရှောင်နေသော စစ်ပြေး ဒုက္ခသည် ၂၃၃ ဦးကို ထိုင်း ဒေသခံ ရွာသားများက ကူးစက်ရောဂါပိုးများ ပါရှိနိုင်သည့် အကြောင်းပြချက်ဖြင့် မြန်မာဘက်ကမ်းသို့ ပြန်ပို့ရန် တောင်းဆိုနေကြသည်။ ဒုက္ခသည်အားလုံးကို ဆေးစစ်ချက်များအရ မည်သည့် ရောဂါလက္ခဏာမျှ မတွေ့ရကြောင်း နောက်ဆုံးရရှိသည့် သတင်းများအရ သိရသည်။