ဒီဇင်ဘာ ၂၇ ရက်နေ့တွင် စတင်မည့် ၄ ရက်ကြာ နိုင်ငံခြားရေး ဝန်ကြီး အဆင့် အစည်းအဝေးတွင် နှစ်နိုင်ငံကြား အပြန်အလှန် ဥပဒေကြောင်း အထောက်အကူပေးရေး စာချုပ် (MLAT) ကို လက်မှတ်ထိုးဖွယ်ရှိကြောင်း သိရသည်။ ယင်းစည်းဝေးပွဲတွင် အိန္ဒိယ-မြန်မာ နယ်စပ်တလျှောက် ခွဲထွက်ရေးသူပုန်များ ကိစ္စ၊ ထောက်လှမ်းရေးသတင်းများ မျှဝေရေး၊ လက်နက်နှင့် မူးယစ်ဆေးဝါး ကုန်ကူးမှု တိုက်ဖျက်ရေးများ ပါဝင်မည်ဟု သိရသည်။

ကရင်ပြည်နယ် မြ၀တီခရိုင် ဖလူးဒေသတွင် တိုးတက်သော ဗုဒ္ဓဘာသာ ကရင်အမျိုးသား တပ်မတော်(DKBA)နှင့် နအဖ ခြေလျှင် တပ်ရင်း(၂၃၀) ၊ ခြေမြန်တပ်ရင်း(၅၄၇) (၃၅၆) တို့ ယနေ့နံနက်(၆)နာရီကျော်မှ မွန်းလွဲ(၁)နာရီခန့်အထိ ၇ နာရီနီးပါးကြာ ဖြစ်ပွားခဲ့သည့် တိုက်ပွဲတွင် ဖလူးရွာသားတဦး လက်နက်ကြီးကျည် ထိမှန်ခဲ့ကြောင်း၊ နှစ်ဘက် ထိခိုက်ကျဆုံးမှုများကိုမူ မသိရှိရသေး ကြောင်း DKBA က ပြောသည်။

ရန်ကုန်မြို့ ဗိုလ်တထောင်မြို့နယ်၊ ဗိုလ်အောင်ကျော်လမ်းရှိ ဂန္ဒီခန်းမကြီးကို ရန်ကင်းမြို့နယ်ရှိ လယ်/ဆည် ဝန်ကြီးဌာန ရုံးဟောင်းသို့ အာဏာပိုင်များက မကြာမီပြောင်းရွှေ့ပေးရန် ညွှန်ကြားထားကြောင်း သိရသည်။ ဂန္ဒီခန်းမသည် သမိုင်းဝင် အဆောက်အအုံတခု ဖြစ်ပြီး ၁၉၉၀ ရွေးကောက်ပွဲ အနိုင်ရပြီးနောက် NLD သည် ဂန္ဒီခန်းမတွင် အစည်းအဝေးကျင်းပကာ လွှတ်တော် ခေါ်ယူရေးအတွက် “ဂန္ဒီခန်းမ ကြေညာစာတမ်း” ကို ထုတ်ပြန်ခဲ့သည်။

လူကြိုက်များခဲ့သည့် ထာဝရနှင်းဆီအငြိမ့်ကို မလေးရှားနိုင်ငံနှင့် စင်ကာပူနိုင်ငံတို့တွင် ဖျော်ဖြေရန် ပွဲလက်မှတ်များ စတင် ရောင်း နေကြောင်း သိရသည်။ ထာဝရနှင်းဆီ ရုပ်ရှင်၊ ဂီတ ပဒေသာ ကပွဲကို မလေးရှားရှိ မြန်မာ့ဥယျာဉ်က စီစဉ်ကာ၂၀၁၁ ဖေဖော်ဝါရီ ၄ ရက်နေ့တွင် ကွာလာလမ်ပူ၌ လည်းကောင်း၊ ဖေဖော်ဝါရီ ၆ ရက်နေ့တွင် ပီနန်၌ လည်းကောင်း၂ နေရာ ဖျော်ဖြေမည်ဖြစ်သည်။ စင်ကာပူရောက် အနုပညာချစ်သူများ စီစဉ်သော ထာဝရနှင်းဆီ နှစ်ပါးသဘင်ကိုလည်း မတ်လ ၆ ရက်နေ့၌ စင်ကာပူနိုင်ငံ ချိုင်း နား တောင်း ရပ်ကွက်ရှိ Kreta Ayer People’s Treatre ဇာတ်ရုံတွင် ဖျော်ဖြေမည်ဖြစ်ကြောင်း နီးစပ်သူများက ပြောသည်။

ကျားဖြူပါတီ (SNDP) သည် ပါတီရန်ပုံငွေ အတွက် ကုမ္ပဏီ ထူထောင်မည် ဖြစ်ပြီး ကုမ္ပဏီ အမည်ကိုလည်း ကျားဖြူ ကုမ္ပဏီ ဟုသတ်မှတ်မည် ဖြစ်ကြောင်း မကြာသေးခင်က ကျင်းပသည့် ပါတီညီလာခံတွင် ဆုံးဖြတ်လိုက်သည်။ သစ်၊ စိုက်ပျိုးရေး၊ သတ္ထုတွင်း လုပ်ငန်းများကို အဓိကထား လုပ်ကိုင်မည် ဖြစ်ပြီး ထွက်ကုန်များကို တရုတ်နိုင်ငံသို့ တင်ပို့မည် ဖြစ်ကြောင်း၊ ရရှိသည့် အကျိုးအမြတ်များကို အချိုးကျခွဲဝေပြီး ပါတီအတွက် သုံးမည်ဖြစ်ကြောင်း SNDP ဗဟိုကော်မတီဝင် ဦးစိုင်းလှကျော်က ပြောသည်။

ထိုင်းနိုင်ငံ ချင်းမိုင်မြို့တွင် ကျင်းပသည့် ၁၅ ကြိမ်မြောက် အာဆီယံ တက္ကသိုလ်များ အားကစားပြိုင်ပွဲ အမျိုးသား ဘောလုံး ပွဲစဉ် တတိယလုပွဲ၌ မြန်မာအသင်းက ဗီယက်နမ်အသင်းအား ၂ ဂိုး - ၁ ဂိုးဖြင့် နိုင်ကာ ကြေးတံဆိပ်ဆု ရရှိခဲ့သည်။ မြန်မာ အသင်းခေါင်းဆောင် နောက်တန်းကစားသမား စည်သူဇော်ဦးမှာ ပွဲချိန် ၅၇ မိနစ်က ၂ ၀ါ ၁ နီဖြင့် ထုတ်ပယ်ခံခဲ့ရသော်လည်း တိုက်စစ်မှူးများဖြစ်သည့် စောစိန်ဘမြင့်နှင့် ချစ်မိုးဦးတို့က ဦးဆောင် ဂိုးများသွင်း နိုင်ခဲ့သည်။

ဂီရိဆိုင်ကလုန်း လေဘေးဒုက္ခသည်များအား ကူညီနိုင်ရန် ရန်ပုံငွေ ဖျော်ဖြေပွဲတရပ်ကို ဒီဇင်ဘာလ ၃၀ ရက်နေ့ ညနေ၌ ရန်ကုန် သုဝဏ္ဏ အားကစားကွင်းရှိ မိုးလုံလေလုံ ခန်းမတွင် ကျင်းပမည်ဟု သိရသည်။ ဖျော်ဖြေပွဲတွင် ရခိုင်အနုပညာရှင်များ ဖြစ်ကြသော မင်းသားနေတိုး၊ ခန့်စည်သူ၊ မင်းသားကြီး ဦးအောင်လွင် အပါအဝင် တခြားသော ရခိုင်အနုပညာရှင်များ၊ အဆိုတော်များက ပါဝင်တင်ဆက်မည် ဖြစ်သည်။ ရရှိသောငွေများအား ဂီရိဒုက္ခသည်များအား ကူညီ ထောက်ပံ့ ပေးသွားမည်ဖြစ်ပြီး ယခုပွဲသည် ရခိုင်အနုပညာရှင်များ၏ ပထမဆုံးသော တေးဂီတ ပဒေသာပွဲဟု သိရသည်။

အမျိုးသားဒီမိုကရေစီ အင်အားစု (NDF) ၏ ဗဟိုဦးစီး အဖွဲ့သစ်နှင့် အမျိုးသမီး အဖွဲ့အား ၂၀၁၁ နှစ်ဆန်းပိုင်းတွင် တိုးချဲ့ ဖွဲ့စည်းသွားမည် ဖြစ်ကြောင်းသိရသည်။ ထိုသို့ဖွဲ့စည်းရခြင်းမှာ ပါတီ ကျစ်လျစ်ခိုင်မာရေး၊ အင်အားကောင်းရေး၊ အနာဂတ် လုပ်ငန်းစဉ်များ ပိုမိုလုပ်ဆောင်သွားနိုင်ရေးအတွက် ရည်ရွယ်ဖွဲ့စည်းခြင်း ဖြစ်ကြောင်း ပါတီ၏ ခေါင်းဆောင် တဦးဖြစ်သူ ဦးခင်မောင်ဆွေက ပြောသည်။

၁၅ ကြိမ်မြောက် အာဆီယံ တက္ကသိုလ်များ အားကစားပြိုင်ပွဲ အမျိုးသား ဘောလီဘောပွဲစဉ်တွင် ယနေ့ ကျင်းပသည့် တတိယနေရာလုပွဲ၌ မြန်မာက မလေးရှားအသင်းအား ၃ ပွဲပြတ် ရှုံးနိမ့်ကာ ကြေးတံဆိပ်ဆုနှင့် လွဲချော်သွားသည်။ အမျိုးသမီး တစ်ဦးချင်း တင်းနစ်ပြိုင်ပွဲ တတိယနေရာလုပွဲတွင်မှု မြန်မာက စင်ကာပူကို ၂ ပွဲပြတ်ဖြင့်နိုင်ပြီး ကြေးတံဆိပ်ဆုရရှိသည်။ မြန်မာနိုင်ငံက ယနေ့အထိ ကြေးတံဆိပ် ဆု ၂ သာ ရရှိထားပြီး အိမ်ရှင် ထိုင်းနိုင်ငံက စုစုပေါင်း ဆုတံဆိပ် ၁၁၁ ခုရရှိထားသည်။

မြန်မာနိုင်ငံ၌ ယခုနှစ်အတွင်း ဖမ်းဆီးရမိသော စိတ်ကြွဆေး အရေအတွက်သည် ယခင်နှစ်များထက် ၃ ဆများပြားလာ ကြောင်း ဒီဇင်ဘာလ ၂၁ ရက်နေ့ထုတ် UNDOC ၏အစီရင်ခံစာ၌ ဖော်ပြထားသည်။ ဖမ်းဆီးရမိသော မူးယစ်ဆေးဝါး အများစု သည် မြန်မာနယ်စပ် ဒေသများတွင် ဖြစ်ကြောင်းလည်း သိရသည်။ ထိုင်း-မြန်မာနယ်စပ်၌ ၂၀၁၀ ဇန်န၀ါရီလမှ စက်တင်ဘာလ အတွင်းဖမ်းမိခဲ့သော ဆေးပြားအလုံးရေ ၄၄ သန်း ရှိသည်ဟု ဆိုသည်။