အစိုးရနှင့် နီးစပ်ပြီး စီးပွားရေးလုပ်ငန်းများကို လက်ဝါးကြီးအုပ်ထားသည့် စီးပွားရေးသမားများနှင့် ဝါဒဖြန့်သူ၊ အစိုးရလုပ်ရပ်ကို ထောက်ခံသူ ၄၂ ဦးကို အမည်ပျက်စာရင်းသွင်းပြီး ယင်းတို့၏ စီးပွားရေး လုပ်ငန်းများကို ပစ်မှတ်ထားသည့် ဘဏ်ဏ္ဍာရေးဆိုင်ရာ ဒဏ်ခတ်မှု ပြုလုပ်ရန် US Campaign for Burma က အမေရိကန် လွှတ်တော်အား တိုက်တွန်းလိုက်သည်။ စီးပွားရေးသမားများထဲတွင် ဦးအောင်ကိုဝင်း၊ ဦးအိုက်ထွန်း၊ ဦးထွန်းနိုင်ရွှေ၊ ရုပ်ရှင်သရုပ်ဆောင် လွင်မိုး၊ နေရွှေသွေးအောင် စသူတို့ ပါဝင်ပြီး ဝါဒဖြန့်သူ၊ အစိုးရလုပ်ရပ်ကို ထောက်ခံသူများတွင် ဒေါက်တာ တင်ထွန်းဦး၊ ဒေါက်တာ နေဝင်းမောင်၊ မြတ်ခိုင်၊ ဇင်ယော်မောင်မောင် စသူတို့ ပါဝင်သည်။

ကမ္ဘာကျော် ဟောလိဝုဒ် ရုပ်ရှင်မင်းသမီး မီရှဲလ်ယိုးကို မြန်မာ အာဏာပိုင်များက နာမည်ပျက် စာရင်းသွင်း၍ ပြည်ဝင်ခွင့် မပေးတော့ကြောင်း သိရသည်။ မီရှဲလ်ယိုးအား ရန်ကုန်မြိ်ု့ နိုင်ငံ တကာ လေဆိပ်မှပင် ပြန်ခိုင်းလိုက်သည်ဟု အမည် မဖော် လို သည့် မြန်မာအရာရှိ တဦး၏ ယနေ့ပြောကြားချက်ကို ကိုးကား ၍ AFP သတင်း၌ ရေးသား ထားသည်။ မီရှဲလ်ယိုးသည် ယမန်နှစ် ဒီဇင်ဘာလအတွင်းက မြန်မာနိုင်ငံသို့ ရောက်ရှိလာပြီး ဒေါ်အောင်ဆန်းစုကြည်နှင့် တွေ့ဆုံခဲ့သည်။ ၎င်းမှာ ပြင်သစ် လူမျိုး ဒါရိုက်တာ Luc Besson က ဒေါ်အောင်ဆန်းစုကြည် အကြောင်း ထိုင်းနိုင်ငံ ဘန်ကောက်မြို့တွင် ရိုက်ကူးသည့် “The Lady” ဟု အမည် ပေးထားသော ရုပ်ရှင်ကား၌ ဒေါ်အောင်ဆန်းစုကြည် အဖြစ် သရုပ်ဆောင်ထားသည်။

ဝက်နားရွက်ပြာ ရောဂါပြန့်ပွားမှုကို ကာကွယ်သည့် အနေဖြင့် အိန္ဒိယ-မြန်မာနယ်စပ် မဏိပူရ် ပြည်နယ် အင်ဖားမြို့သို့ မြန်မာနိုင်ငံမှ ၀က်သားတင်သွင်းမှုကို ရပ်ဆိုင်းလိုက်ကြောင်း မဏိပူရ်ပြည်နယ် အစိုးရက ထုတ်ပြန်လိုက်သည်။ ဖေဖော်ဝါရီ လကုန်ပိုင်းမှ စတင်၍ မြန်မာနိုင်ငံတွင်း ၀က်နားရွက်ပြာရောဂါ ဖြစ်ပွားနေရာ အိန္ဒိယနိုင်ငံ၌ ယင်းရောဂါဖြစ်ပွားမှု မတွေ့ရသေးကြောင်း၊ ရောဂါကူးစက်မှုကို ကာကွယ်သည့် အနေဖြင့် မြန်မာနယ်စပ်မှ ၀က်နှင့်ဝက်သား တင်သွင်းမှုကို ရပ်ဆိုင်းရခြင်း ဖြစ်ကြောင်း၊ မဏိပူရ် နယ်စပ်အပြင် အခြားသော နယ်စပ်များမှ ၀က်တင်သွင်းမှုများကို ရပ်ဆိုင်းထားကြောင်း မဏိပူရ်အစိုးရ တာဝန်ရှိသူက ဆိုသည်။

မန္တလေးမြို့ မဟာအောင်မြေ မြို့နယ်အတွင်းရှိ ကျောက်မျက် အရောင်းအဝယ် ဈေးကွက်အတွင်း မြန်မာနှင့် တရုတ်တို့ အချင်းများရာမှ ရန်ပွဲဖြစ်လာ သောကြောင့် ထိုလမ်းကို ရဲများက ပိတ်ထားလိုက်ကြောင်း သိရသည်။ မဟာအောင်မြေ အမှတ် ၇ ရဲစခန်းမှ တာဝန်ရှိသူ တဦးက ယင်းသို့ ဖြစ်ပွားသည်မှာ ဟုတ်မှန်ကြောင်း အတည်ပြုသည်။ ယင်း ပြဿနာကြောင့် ရဲကား ၇ စီး၊အချုပ်ကား ၁ စီးကို လုံခြုံရေး ချထားကြောင်းလည်း မျက်မြင်သက်သေများက ပြောသည်။

ထိုင်းကုမ္ပဏီများက ထားဝယ်ရေနက်ဆိပ်ကမ်း စီမံကိန်း၌ ရင်းနှီးမြှုပ်နှံကြရာတွင် ထိုင်းအစိုးရအနေဖြင့် မြန်မာနိုင်ငံ၏ လုံခြုံတည်ငြိမ်ရေးကိစ္စများကို သေချာအောင် ပြန်လည်စိစစ်ရန်လိုသည်ဟု ထိုင်း PTT ကုမ္ပဏီက ပြောဆိုလိုက်သည်။ ထားဝယ်ရေနက်ဆိပ်ကမ်း စီမံကိန်းတွင် အဓိက ရင်းနှီးမြှုပ်နှံနေသည့် အီတာလျံ-ထိုင်း ဖွံ့ဖြိုးရေး ကုမ္ပဏီ၏ ပူးတွဲရင်းနှီးမြှုပ်နှံရေးတွင် အလားအလာရှိနေသော PTT ကုမ္ပဏီမှ အကြံပေးပုဂ္ဂိုလ်က ထိုသို့ ထုတ်ဖော်ပြောဆိုလိုက်ခြင်း ဖြစ်ကြောင်း ဘန်ကောက်ပို့စ် သတင်းစာတွင် ဖော်ပြထားသည်။

အပြည်ပြည်ဆိုင်ရာ မူးယစ်ဆေးဝါး အလွဲသုံးမှုနှင့် တရားမဝင် ရောင်းဝယ်မှု တိုက်ဖျက်ရေးနေ့ အထိမ်းအမှတ်ဖြစ် မြန်မာအစိုးရက ဖမ်းဆီးရမိထားသော ဘိန်းနှင့် မူးယစ်ဆေးဝါး ဒေါ်လာ သန်း ၅၀ ကျော်ဖိုးကို မီးရှို့ဖျက်ဆီးကြောင်း အစိုးရ သတင်းစာများတွင် ဖော်ပြထားသည်။ ပြီးခဲ့သည့် သီတင်းပတ်တွင် ကုလသမဂ္ဂက ထုတ်ပြန်သည့် အစီရင်ခံစာအရ မြန်မာနိုင်ငံသည် အာဖဂန်နစ္စတန်ပြီးလျှင် ဘိန်းအများဆုံး ထွက်ရှိရာ ဒေသဖြစ်နေပြီး ၂၀၀၇ မှ ၂၀၁၀ အတွင်း ၅ ရာခိုင်နှုန်းမှ ၁၂ ရာခိုင်နှုန်းအထိ မြင့်တက်လာသည်ဟု သိရသည်။

အစိုးရစစ်တပ်က မြန်မာပြည်မြောက်ပိုင်း ဒေသ၌ ကချင် လက်နက်ကိုင်တိုင်းရင်းသားများကို တိုက်ခိုက်နေခြင်းအား ရပ်တန့်ရန် အမေရိကန်က ထပ်မံတောင်းဆိုလိုက်သည်။ ထို့အပြင် တိုက်ပွဲဖြစ်ပွားရာ နယ်မြေများမှ ထိခိုက်သေကြေ ပျက်စီးမှုများ၊ ဒုက္ခသည် ထောင် နှင့် ချီ၍ ထွက်ပြေး တိမ်းရှောင်ရမှုများ၊ ဒေသခံ အမျိုးသမီးများကို အဓမ္မပြုကျင့်မှုများနှင့် လူ့အခွင့်အရေး ချိုးဖောက် ကျူးလွန်မှုများအပေါ် စိုးရိမ်ကြောင်းလည်း အမေရိကန်နိုင်ငံခြားရေး ၀န်ကြီးဌာန ပြောခွင့်ရသူ Victoia Nuland က သောကြာနေ့က ပြောကြားသည်ဟု AP သတင်းတွင် ရေးသားထားသည်။

မန္တလေးမြို့ ၃၁ လမ်းနှင့် ၃၂ လမ်းကြား၊ ၈၄ လမ်းမကြီးပေါ်ရှိ စိန်စပယ်ဖူး ရွှေဆိုင်အနီးတွင်  ညနေ ၃ နာရီကျော်က ဒုတိယမြောက် ဗုံးတလုံးကို တွေ့ရှိပြီးနောက် အချိန်မီ ရှင်းလင်းနိုင်လိုက်ကြောင်း သိရသည်။ ပထမအကြိမ်တွင် ဈေးချိုတော် ဟိုတယ်ရှေ့၌ ပေါက်ကွဲ ခဲ့ပြီး ယခု ဒုတိယမြောက် ဗုံးကို အမှိုက်ပုံတွင် တွေ့ရှိရခြင်းဖြစ်သည်။

မေမြို့တွင်လည်း ယနေ့ နေ့လယ်က ဗုံးကွဲကြောင်း သတင်းရရှိသည်။ ရပ်ကွက်ကြီး ၃၊ အကွက် ၄ ရှိ လူမနေသည့် အိမ်တလုံးတွင် ပေါက်ကွဲခြင်းဖြစ်ပြီး ဗုံးက ပြင်းထန်သဖြင့် အိမ်တခုလုံး ပြိုကျသွားသည်ဟု သိရသည်။

မန္တလေး ဈေးချိုတော်ရှေ့ ၂၇ လမ်းနှင့် ၂၈ လမ်းကြား ဈေးချိုဟိုတယ်ရှေ့တွင် ယနေ့ နေ့လယ် ၁၂ နာရီခွဲခန့်က ကားဗုံးတလုံး ပေါက်ကွဲသည်။ တချိန်းတည်းမှာပင် နေပြည်တော် သပြေကုန်း ရပ်ကွက်ရှိ နေအိမ်တလုံးတွင်လည်း ဗုံးတလုံးပေါက်ကွဲသည်။ မန္တလေးဗုံးကြောင့် လူနှစ်ဦးထိခိုက်ဒဏ်ရာရရှိသည်ဟု ဆိုသော်လည်း နေပြည်တော်ဗုံးနှင့် ပတ်သက်၍ အထိအခိုက်စာရင်းကို အတိအကျ မသိရသေးပေ။