နေပြည်တော် မြို့မဈေးတွင် ဇွန်လ ၁၀ ရက်နေ့ ည ၈ နာရီကျော်ခန့်က ဗုံးတလုံးပေါက်ကွဲခဲ့ကြောင်း သိရသည်။ မြို့မဈေးရှိ အမျိုးသား အိမ်သာအတွင်း ပေါက်ကွဲခြင်းဖြစ်ပြီး ရုန်းရင်းဆန်ခတ်ဖြစ်စဉ် နှစ်ဦးထက်မနည်း ဒဏ်ရာ ရကြောင်း၊ အာဏာပိုင်များက စုံစမ်းစစ်ဆေးလျက်ရှိကြောင်း အမည်မဖော်လိုသူအရာရှိတဦးကို ကိုးကား၍ AFP သတင်းဌာနက ဖော်ပြသည်။ မြို့မဈေးသည် နေပြည်တော်ဝန်ထမ်းများနှင့် စည်ကားရာဈေးတခုဖြစ်ကြောင်း သိရသည်။

မကွေးတိုင်း ရေနံချောင်းမြို့ မြို့မရဲစခန်းမှ ရဲဝန်ထမ်းများသည် မြို့နယ်မှူး၏ အစီအစဉ်ဖြင့် အလှူငွေဟု ဆိုကာ ဒေသခံ ကျေးရွာများရှိ ဆိုင်ကယ်စီးပြည်သူများထံမှ ကျပ် ၃၀၀၀ မှ ၅၀၀၀ အကြား ငွေကြေးကောက်ခံမှုများ ပြုလုပ်နေကြောင်း ရေနံချောင်း  သားတဦးက ပြောပြသည်။ ယင်းသို့ ကောက်ခံနေသည်မှာ တလ ခန့်ရှိပြီဖြစ်ကြောင်း၊ နေ့စဉ် နံနက် ၈ နာရီမှ ၁၂နာရီ ခန့်အထိ ကောက်ခံလျက်ရှိရာ ဒေသခံပြည်သူများ အခက်အခဲ ကြုံနေကြရကြောင်း သိရသည်။

ရခိုင်ပြည်နယ် တောင်ကုတ်မြို့၏ အေးရိပ်ငြိမ် အဝေးပြေးဂိတ် အနီး၌ ရပ်ကွက်အုပ်ချုပ်ရေးမှူး ဦးသန်းနုက ငွေကြေးရယူ၍ ပြည့်တန်ဆာလုပ်ငန်းများကို ခွင့်ပြုနေကြောင်း တောင်ကုတ် မြို့ခံ များက ပြောသည်။ အေးရိပ်ငြိမ် ကားဂိတ်အနီး မီးစက် ကွက် သစ် ရှိ ပြည့်တန်ဆာအိမ် ၁၀ အိမ်ကျော်မှ ပြည့်တန်ဆာ အမျိုးသမီး ၄၀ ၀န်းကျင်သည် တဦးလျှင် တလ ကျပ် တသောင်းစီ ဦးသန်းနုကို ပေးရကြောင်း၊ မြို့ခံကျောင်းသား လူငယ် မိဘများစုပေါင်း၍ ခရိုင်အာဏာပိုင်များ ကိုတိုင်ကြား သော်လည်း အရေး ယူမှု တစုံတရာ မရှိကြောင်း သိရသည်။

ဗီယက်နမ် ဒု ၀န်ကြီးချုပ် H.E Mr Hoang Trung Hai ဦးဆောင်သည့် ကိုယ်စားလှယ်အဖွဲ့ယမန်နေ့က နေပြည်တော် သို့ ရောက်ရှိ လာပြီး သမ္မတ ဦးသိန်းစိန်၊ ဒုသမ္မတ သီဟသူရ ဦးတင်အောင်မြင့်ဦး၊ ပြည်ထောင်စု ကာကွယ်ရေး ၀န်ကြီး ဗိုလ်ချုပ်လှမင်း၊ ပြည် ထဲရေး ၀န်ကြီး ဒု ဗိုလ်ချုပ်ကြီး ကိုကို စသည့် အစိုးရ ၀န်ကြီးများနှင့် တွေ့ဆုံကာ နှစ်နိုင်ငံအကျိုး ပူးပေါင်းဆောင်ရွက်ရေး ကိစ္စများနှင့် ပတ်သက်၍ လက်မှတ် ရေးထိုးကြောင်း ယနေ့ထုတ် အစိုးရသတင်းစာတွင် ရေးသား ထားသည်။ ဗီယက်နမ်နိုင်ငံသည် မြန်မာနိုင်ငံ၌ လေကြောင်း လိုင်း၊ ဘဏ်လုပ်ငန်း၊ ခရီးသွားလုပ်ငန်း၊ စိုက်ပျိုးရေးနှင့် မွေးမြူရေး လုပ်ငန်းများတွင် ရင်းနှီးမြုပ်နှံရန် ကြိုးစားနေသည့် နိုင်ငံဖြစ်သည်။

ဒေါ်အောင်ဆန်းစုကြည်၏ ဇွန်လ ၁၉ ရက်နေ့တွင် ကျရောက်မည့် ၆၆ နှစ်မြောက် မွေးနေ့ကို ဂုဏ်ပြုသောအားဖြင့် ကနေဒါနိုင်ငံ ဗန်ကူးဗားမြို့တွင် Burma Night for the Lady ဟူသည့် အထိမ်းအမှတ်ပွဲတခုကို ဇွန်လ ၁၁ ရက် နှင့် ဇွန်လ ၁၈ ရက်နေ့ များ၌ ကျင်းပမည်ဖြစ်ကြောင်း သိရသည်။ အဆိုပါပွဲတွင် ဖျော်ဖြေရေး အစီအစဉ်များ အပါအ၀င် မြန်မာ့ရိုးရာ အစားအသောက် များဖြင့် ရန်ပုံငွေပွဲအဖြစ် လုပ်ဆောင်သွားမည်ဖြစ်ကြောင်း ကနေဒါ မိတ်ဆွေများအဖွဲ့(Canadian Friends of Burma-CFOB) က ဇွန်လ ၈ ရက်နေ့က ကြေညာထားသည်။

သမ္မတ ဦးသိန်းစိန်သည် မကြာမီကာလအတွင်း အိန္ဒိယ နိုင်ငံသို့ ချစ်ကြည်ရေးခရီး သွားရောက်မည်ဖြစ်ကြောင်း သတင်းရရှိသည်။ ပြီးခဲ့သည့် မေလ၂၆ ရက်ကလည်း ဦးသိန်းစိန်သည် တရုတ်နိုင်ငံသို့ ချစ်ကြည်ရေးခရီး သွားရောက်ခဲ့ပြီး၂ နိုင်ငံဆက်ဆံရေး တိုးမြှင့် ရန် အပါအ၀င် သဘောတူ စာချုပ် ၉ ခု နှင့် တရုတ်ဘက်မှ အမေရိကန်ဒေါ်လာ ၇၆၃ သန်း ချေးရန် သဘောတူစာချုပ်များ ချုပ်ဆို ခဲ့သည်။

တနင်္သာရီတိုင်း ထားဝယ် ရေနက်ဆိပ်ကမ်း စီမံကိန်း နယ်မြေအတွင်းရှိ ဒေသခံ ပြည်သူ ၁၀၀၀၀ ခန့် ရွှေ့ပြောင်းရဖွယ်ရှိကြောင်း သိရသည်။ ထိုဒေသခံများသည် နေရာသစ် တနေရာသို့ ပြောင်းရွှေ့ရမည်ဖြစ်သည်ဟု စီမံကိန်း တည်ဆောက်ရေး လုပ်ကိုင်ခွင့် ရထားသော Italian-Thai Development ကုမ္ပဏီ အကြီးအကဲကို ကိုးကား၍ AFP သတင်း၌ ဖော်ပြထားသည်။ Italian-Thai Development ကုမ္ပဏီသည် ထားဝယ် ရေနက်ဆိပ်ကမ်းနှင့် အထူးစီးပွားရေးဇုန် တည်ဆောက်ရန် ၂၀၁၀ ပြည့်နှစ် နိုဝင်ဘာ ၂ ရက်နေ့တွင် မြန်မာ အာဏာပိုင်များနှင့် သဘောတူ လက်မှတ် ရေးထိုးခဲ့ခြင်းဖြစ်သည်။

ထိုင်း ဘုရင့်တပ်မတော် ကာကွယ်ရေးဦးစီးချုပ် General Songkitti Jaggabatara ဦးဆောင်သည့်အဖွဲ့သည် ယမန်နေ့က နေပြည် တော်သို့ရောက်ရှိလာပြီး သမ္မတ ဦးသိန်းစိန်၊ ဒု သမ္မတ ဒေါက်တာ စိုင်းမောက်ခမ်း၊ ကာကွယ်ရေးဦးစီးချုပ် ဗိုလ်ချုပ်ကြီး မင်းအောင် လှိုင် အပါအ၀င် အစိုးရ၀န်ကြီးများနှင့် တွေ့ဆုံကြောင်း၊ တွေ့ဆုံရာ၌ နယ်စပ်ဒေသ တည်ငြိမ်ရေးနှင့် ၂ နိုင်ငံတပ်မတော် ညှိနှိုင်း ဆောင်ရွက်ရေး ကိစ္စများကို ဆွေးနွေးကြောင်း ယနေ့ထုတ် အစိုးရ သတင်းစာများတွင် ဖော်ပြထားသည်။ သီတင်းတပတ် အတွင်း ဒုတိယ အကြိမ် ထိုင်းစစ်ဘက်ဆိုင်ရာ အကြီးအကဲများ လာရောက်ခြင်းဖြစ်ပြီး မေလ ၃၁ ရက်နေ့ကလည်း ထိုင်းဘုရင့် ရေတပ် ဦးစီးချုပ် Admiral Khamthorm Pumhiran လာရောက်ခဲ့သေးသည်။

ရပ်ကွက်၊ ကျေးရွာအုပ်ချုပ်ရေးမှူးများကို ဇွန် ၁၃ ရက်နေ့မှ စတင်ကာ ၃ ရက်ကြာ သင်တန်းပေးသွားမည် ဖြစ်ကြောင်း ပြည်ထဲရေး ၀န်ကြီးဌာနမှ သိရသည်။ ပထမဦးစွာ နေပြည်တော်တွင် သင်ကြားမည်ဖြစ်ကြောင်း၊ ထုတ်ဝေ ထားသည့် ရပ်ကွက် အုပ်ချုပ်ရေးမှူး လက်စွဲ စာအုပ်ထဲမှ အကြောင်းအရာများကို သင်ကြားသွားမည်ဖြစ်ကြောင်း ပျဉ်းမနားမြို့နယ်ရှိ ရပ်ကွက် အုပ်ချုပ်ရေးမှူး တဦးက ပြောသည်။ ပြည်နယ်နှင့် တိုင်းဒေသကြီးများတွင်မူ သင်တန်း စနိုင်လိမ့်ဦးမည် မဟုတ်ဟု သိရသည်။

၁၉၇၄၊ ဇွန် ၆ အလုပ်သမားအရေးအခင်း နှစ်ပတ်လည်နေ့ကို ယမန်နေ့က ရန်ကုန်မြို့ တနေရာတွင် ပြုလုပ်ရာ ထိုလှုပ်ရှားမှုတွင် ပါဝင်၊ ဦးဆောင်ခဲ့သူ ၅၀ ခန့် တက်ရောက်ကြသည်။ ၎င်းတို့က ဒေါ်အောင်ဆန်းစုကြည် ဦးဆောင်သည့် ဒီမိုကရေစီအရေး လှုပ်ရှားမှုကို ဆက်လက် ထောက်ခံသွားကြမည်ဟု နှစ်ပတ်လည်နေ့ အစီအစဉ်သို့ တက်ရောက်လာသည့် ၇၄ မျိုးဆက် ခေါင်းဆောင် တဦးက ပြောသည်။ “(၁၉၇၄ ကတည်းက) အလုပ်သမား အခွင့်အရေး တောင်းဆိုခဲ့တယ်။ ထောင်ဒဏ်တွေ အသီးသီး ကျခံခဲ့ရပေမယ့် ၁၉၈၈ ခုနှစ်မှာလည်း ပူးပေါင်း ပါဝင်ခဲ့တယ်။ အခုလည်း ဒီမိုကရေစီနဲ့ လူ့အခွင့်အရေးတို့ အတွက် တိုက်ပွဲ ၀င်နေဆဲဖြစ်တယ်” ဟု သူက ရှင်းပြသည်။