ရခိုင်ပြည်နယ် ကျောက်ဖြူမြို့ပေါ်နှင့် ကျေးရွာ တချို့တွင် မဲလာပေးသူ အနည်းငယ် ရှိကြောင်းသိရသည်။ မဲလာပေးသူ အများစုမှာ လေဘေးဒဏ် ဆိုးဆိုးဝါးဝါး ခံခဲ့ရသသည့် ရပ်ကွက်များနှင့် ကျေးရွာများမှ မဟုတ်ကြောင်းလည်း သိရသည်။ ကျောက်ဖြူမြို့ပေါ်မှ မဲပေးခဲ့ပြီးသူတချို့ကို ဧရာဝတီက မေးမြန်းကြည့်ရာ ရခိုင်မိဘများမှ မွေးထား၍ ရခိုင်လူမျိုး သီးသန့် ပါတီကိုသာ ရွေးချယ် ပေးခဲ့သည်ဟု ပြောဆိုပြီး တဦးကမူ ကြံ့ဖွံ့ပါတီနှင့် နီးစပ်သူဖြစ်၍ ကြံ့ဖွံ့ပါတီကို ပေးခဲ့ကြောင်း ဖြေသည်။

ရန်ကုန်မြို့ ရန်ကင်းမြို့နယ်တွင် မဲရုံအမှတ် ၁ နှင့် ၂ တို့ကို မဲလာပေးသူ များပြားကြောင်း၊ သို့ရာတွင် အများစုမှာ မဲ မဖြစ်မနေ လာပေးရမည်ဟု ပြောဆိုထားသောကြောင့် အာဏာပိုင်နှင့် ပြဿနာမတက်ချင် သောကြောင့် လာပေးကြခြင်း ဖြစ်ကြောင်း၊ အများစုမှာ ပယ်မဲဖြစ်သွားရန်သာ ပြုလုပ်ခဲ့ကြကြောင်း ကြားသိရသည်။ အဆိုပါ မဲရုံတရုံစီအတွက် မဲပေးရမည့်ဦးရေ ၈၀၀ ကျော်စီ ရှိကြောင်း သိရသည်။

မြစ်ကြီးနားတွင် ယမန်နေ့ညက ကြံ့ဖွံ့ပါတီ မဲဆွယ်သည့် ကားနှင့် အဆိုတော် ရေဘက္ကာဝင်းက လိုက်လံ သီချင်းဆို မဲဆွယ်ပေး နေကြောင်း သတင်းရရှိသည်။ ယနေ့ နံနက်တွင် မြစ်ကြီးနား ဒေသခံများ မဲထွက်ပေးကြကြောင်း၊ သို့ရာတွင် နည်းပါးကြောင်း ဒေသခံတဦးက ပြောသည်။

ဧရာဝတီတိုင်း ဘိုကလေးမြို့နယ်တွင် မဲပုံးအများစုမှာ ချိတ်ပိတ်ထားခြင်း မရှိကြောင်း၊ ယမန်နေ့ ညကတည်းက ရယကများက ကြိုတင်မဲများ ထည့်ထားသဖြင့် လာရောက်မဲပေးသူ နည်းသော်လည်း မဲပုံးများမှာ ပြည့်လုနီးပါးဖြစ်နေကြောင်း သတင်းရရှိသည်။ ထို့အပြင် (၇) ရပ်ကွက်၌ သတင်းထောက်တဦးက မဲရုံရှေ့တွင် ဓာတ်ပုံရိုက်သဖြင့် ကော်မရှင်က တားမြစ်ရာမှ ရုတ်ရုတ်သဲသဲ ဖြစ်သွားကြောင်းလည်း သိရသည်။

အစ္စလမ် ဘာသာဝင်များ မဲပေးလျှင် ကြံ့ဖွံ့ပါတီကို မဲပေးရန် မန္တလေးတိုင်း ဒေသကြီး(ကြံ့ဖွံ့)က ယမန်နေ့တွင် ကြေညာချက် ထုတ်ပြန်ပြီး ဗလီများသို့ ပေးအပ်ခဲ့ကြောင်း သတင်းရသည်။ ယင်းစာတွင် အစ္စလမ်သာသနာ မိသားစု အဖွဲ့ဝင်များ အနေဖြင့် ရွေးကောက်ပွဲတွင် မိမိတို့၏ လွတ်လပ်သည့် စိတ်ဆန္ဒအလျောက် မဲပေးရာ၌ ပြည်သူ့အတွက် အင်အားတောင့်တင်းပြီး စိတ်ချ ရသည့် ၀န်ကြီး ဦးအောင်သောင်း ဦးဆောင်သည့် ကြံ့ဖွံ့ပါတီမှ ကိုယ်စားလှယ်လောင်းများကို ထောက်ခံမဲပေးရန် အသိပေး ကြောင်း ပါရှိသည်ဟု သိရသည်။

စစ်အစိုးရက ထောင်ဒဏ် ၁၀၆ နှစ် ချမှတ်ထားသော အသက် ၇၄ နှစ်အရွယ်ရှိ ရှမ်း တိုင်းရင်းသား ခေါင်းဆောင် ဗိုလ်ချုပ် ဆေထင်၏ မိသားစုဝင် ၄ ဦးကို မဲထည့်ခွင့် မရကြောင်း သိရသည်။ “နန်းခမ်းပေါဝ်ကတော့ ဒီနေ့ ကော်မရှင်ရုံးကို သွားအရေးဆိုမယ်ပြောတယ်၊ သူတို့ လက်ဖက်ရည်ဆိုင် မန်နေဂျာ ကိုတင်နွယ်ထွန်း ကိုလည်း မဲပေးခွင့် မပေးဘူး” ဟု ဗိုလ်ချုပ် ဆေထင် မိသားစုနှင့် နီးစပ်သူ တဦးက ပြောသည်။